Salmos 91:1-16
91 Tataãxẽ ya yíxema naxme̱xwa ngẽxmaxe ya Yimá Guxãétüwa Ngẽxmacü ya Tupana, erü nüma rü tüxna nadau.
2 Rü choma rü ñachagürü cuxü̃: —Pa Corix, cuxicatama nixĩ i chorü cu̱xchicaxü̃ quixĩxü̃, rü chorü poxü̃ruxü̃ quixĩxü̃ rü chorü Tupana ya cuxü̃́ chayaxõcü quixĩxü̃ —ñachagürü cuxü̃.
3 Rü Tupanaxicatama nixĩ ya cuxü̃ ípoxü̃cü nüxna i ngẽma ãũcümaxü̃ i cuechita duü̃xü̃gü cuxca̱x ixügüxü̃, rü nüxna i ngẽma da̱xaweanegü i yuwa tüxü̃ gaxü̃.
4 Rü nüma rü tá nügüpe̱xátütüü̃wa cuxü̃ nangẽxmaxẽxẽ rü ngéma rü taxuxü̃táma cuxü̃ nangupetü. Rü nüma rü tá aixcüma cuxna nadau rü tá cuxü̃ ínapoxü̃.
5 Rü ñu̱xma rü marü taxuca̱xma naxca̱x cumuü̃ i ngẽma ãũcümaxü̃gü i chütacü ngẽxmaxü̃ rü woo yima curü uanügüarü chuxchigü ya ngunecü cuxca̱x yamugüne.
6 Rü marü taxuca̱xma naxca̱x cumuü̃ i ngẽma da̱xaweane i chütacü ínguxü̃ rü woo ngẽma ãũcümaxü̃ i ngunecü ínguxü̃.
7 Rü woo curü to̱xoxwecüwagu tayuegu ya 1,000 rü curü tügünecüwagu tayuegu ya 10,000 natürü i cuxü̃ rü taxuxü̃táma nangupetü.
8 Rü cuma rü tá nüxü̃ cudau i ngẽma duü̃xü̃gü i chixexü̃arü poxcu. Natürü i cuma rü taxuxü̃táma cuxca̱x ínangu.
9 91:9-10 Erü ñu̱xma nax cunayaxuxü̃ ya Cori ya Tupana ya Guxü̃étüwa Ngẽxmacü nax curü cu̱xchicaxü̃ yixĩxü̃ca̱x rü curü poxü̃ruxü̃ yixĩxü̃ca̱x ¿rü ñuxũcürüwa ta̱xacürü chixexü̃ cuxna nangu rü woo ta̱xacürü da̱xaweane cupatawa nguxgux?
10 Nüü̃ nadau 91:9
11 Rü nüma rü tá norü orearü ngeruü̃gü i daxũcüã̱xü̃ namu nax cuxna nadaugüxü̃ca̱x i ngextá ícuxũxü̃wa.
12 Rü nümagü rü tá cuxü̃ ningĩgü rü ngẽmaãcü tá cuxü̃ nigagü nax tama guxchaxü̃gu cunguxü̃ca̱x.
13 Rü ngẽxguma tá leóü̃tanügu quixũxgu rü ngo̱xotanügu quixũxgu rü ãxtapetanügu quixũxgu, rü taxuxü̃táma cuxü̃ nangupetü.
14 Erü nüma ya Cori ya Tupana rü ñanagürü: —Rü yíxema choxü̃ ngechaxü̃xe rü choma rü tá tüxü̃ íchapoxü̃ rü tá tüxü̃ chatachigaxẽxẽ erü choxü̃́ tayaxõ.
15 Rü ngẽxguma choxna tacaxgu rü choma rü tá tüxü̃ changãxü̃ rü tá tümaxü̃tawa changexma. Rü ngẽxguma guxchaxü̃ tüxü̃ üpetügu rü tá nawa tüxü̃ íchanguxuchixẽxẽ rü poraãcü tá tümamaxã chataãxẽ.
16 Rü tá chanamaxẽxẽ i tümaarü maxü̃ i ñoma i naanewa. Rü tá tüxna chanaxã i maxü̃ i taguma gúxü̃ —ñanagürü ya Cori ya Tupana.
