Salmos 92:1-15
92 Pa Corix ya Guxãétüwa Ngẽxmacüx, name nixĩ nax moxẽ cuxna taxãgüxü̃ rü torü wiyaemaxã cuxü̃ ticua̱xüü̃güxü̃.
2 Rü wüxichigü i pa̱xmama rü wüxichigü i chütaxü̃ tanaxunagü nax cuma rü cumecümaxü̃ rü quixaixcümaxü̃.
3 ¡Ngĩxã Tupanaca̱x tawiyaegü ãcúnüxü̃ i paxetaruü̃maxã tüxü̃ napaxpe̱xegüãcüma!
4 Pa Corix, cuma rü ngẽma cha̱u̱xca̱x cuxüxü̃maxã choxü̃ cutaãẽxẽxẽ. Rü ngẽma mexü̃ i cuxüxü̃ rü taãxẽ choxna naxã.
5 Pa Corix, namexẽchi i ngẽma cuxüxü̃. Rü curü ĩnü rü taxumaama nawüxigu.
6 Rü ngẽma tama naãẽxü̃ icuáxü̃xicatama nixĩ i tama nüxü̃ cua̱xgüchaü̃xü̃ nax namexẽchixü̃ i curü puracü.
7 Rü ngẽma duü̃xü̃gü i chixexü̃gu rüxĩnüexü̃ rü chixexü̃ ügüxü̃ rü nimu ñoma maxẽ i baxcaxü̃rüxü̃, natürü yixcüra rü tá narüxoxochi.
8 Natürü i cumax, Pa Cori Pa Tupanax, rü guxü̃guma guxãétüwa cungexmaecha.
9 Rü ngẽma curü uanügü, Pa Cori Pa Tupanax, rü tá inayarüxo. Rü guxü̃ma i ngẽma chixexü̃ ügüxü̃ rü tá nawoone.
10 Rü cuma rü yexeraãcü choxü̃ quiporaxẽẽchigü ñoma wüxi i woca i yatüxü̃rüxü̃. Rü pumaramaxã choxü̃ cubaeru.
11 Rü tá choxü̃ nüxü̃ cudauxẽxẽ nax poxcu namaxã cuxueguxü̃ i chorü uanügü. Rü choma rü tá nüxü̃ chaxĩnü i norü axu i ngẽma chixri maxẽxü̃.
12 Rü ngẽma mea maxẽxü̃ i duü̃xü̃gü rü ñoma tema ya baxcacürüxü̃ tá nixĩgü. Rü tá nimexẽchi yima ocayiwa ya Líbanuwa ngẽxmagünerüxü̃.
13 Rü nümagü rü Cori ya Tupanapatawa tá nangẽxmagü rü ngéma tá nataãẽgü.
14 Rü woo ngẽxguma nayaegu rü tá nixãxacüetanüama rü guxü̃gutáma naporae.
15 Rü tá nüxü̃ nixugügü rü ñanagürügü tá: —Nüma ya Cori ya yimá chorü poxü̃ruxü̃ rü nixaixcüma rü nawa rü nataxuma i ta̱xacürü chixexü̃ —ñanagürügü tá.
