Salmos 95:1-11
95 ¡Nua pexĩ rü ngĩxã taãẽãcü naxca̱x tawiyaegü ya Cori ya Tupana! ¡Rü ngĩxã naxca̱x tawiyaegü ya yimá tórü poxü̃ruxü̃ rü tórü Maxẽxẽxẽruxü̃!
2 ¡Rü ngĩxã naxca̱x taxĩ rü moxẽ nüxna taxã rü wiyaegümaxã nüxü̃ ticua̱xüxü̃gü!
3 Erü nüma ya Cori ya Tupana rü naporaxüchi rü naétüwa naxü i guxü̃ma i ngẽma tupanagüneta ixĩgüxü̃.
4 Rü naxme̱xwa nangẽxma i guxü̃ma i ngẽma mairaxü̃arü aixepewa ngẽxmagüxü̃ rü yima ma̱xpǘnegü ya máchanexü̃chigüne.
5 Rü ngẽma már rü noxrü nixĩ yerü nümatama nanango̱xẽxẽ. Rü nümatama nixĩ ga naxme̱xmaxã naxüaxü̃ ga ñoma ga naane.
6 ¡Rü nua pexĩ rü ngĩxã nape̱xegu tacaxã́pü̱xügü rü nüxü̃ ticua̱xüxü̃gü ya Cori ya Tupana ya tüxü̃ ücü!
7 Rü nüma nixĩ i tórü Tupana yixĩxü̃ rü yixema rü norü duü̃xü̃gü tixĩgü. Rü yixema rü ñoma norü carnérugürüxü̃ nüxü̃́ tixĩgü. ¡Rü ñu̱xma rü nüxü̃́ iperüxĩnüe i ngẽma pemaxã nüxü̃ yaxuxü̃!
8 Erü nüma rü ñanagürü: —Tama name nax choxü̃ pexoexü̃ yema perü o̱xigü choxü̃ oegurüxü̃ ga yexguma taxúema íxãpataxü̃wa nayexmagügu ga Meribáwa rü Macháwa.
9 Rü yéma nixĩ ga perü o̱xigü ga choxü̃ naxügüxü̃ rü woo nüxü̃ nax nadaugüxü̃ ga yema taxü̃ ga mexü̃gü ga nape̱xewa chaxüxü̃.
10 Rü 40 ga taunecü namaxã chanu ga yema duü̃xü̃gü rü ñachagürü: “Ñaa duü̃xü̃gü rü tama choxü̃́ inaxĩnüechaü̃ i chorü ucu̱xẽgü, rü ngẽma nümatama nagu naxĩnüexü̃gu naxĩ”, ñachagürü.
11 Rü yemaca̱x chorü numaxã namaxã chanaxuegu nax taxũtáma nawa nangugüxü̃ i ngẽma naane i nagu chanangü̃güxẽẽchaü̃xü̃ —ñanagürü ya Tupana.
