Sofonías 2:1-15
2 ¡Pengutaque̱xegüx, Pa Duü̃xü̃gü i Tama Ãnexü̃ Cua̱xgüxü̃x!
2 ¡Nüxü̃ perüxoe i ngẽma perü chixexü̃ i Tupanape̱xewa pexügüxü̃! ¡Rü naga pexĩnüe ñoma rü ta nangema i ngunexü̃ naxü̃pa nax pexü̃ ínawogüxü̃ ñoma maxẽchapa̱xa buanecü ngexta cuegüxü̃rüxü̃, rü naxü̃pa nax nawa nanguxü̃ i ngẽma ngunexü̃ i ãũcümaxü̃ i norü numaxã nagu pexü̃ napoxcuexü̃ ya Cori ya Tupana!
3 Rü ngẽmaca̱x name nixĩ i Cori ya Tupanaca̱x pedaugü, Pa Guxãma i Aixcüma Nape̱xewa Mecümagüxe rü Naga Ĩnüexe i Norü Mugüx. ¡Rü nape̱xewa pixaixcümagü rü tama pegü picua̱xüü̃gü! Rü bexmana ngẽmaãcü nüma ya Cori ya Tupana rü tá pexü̃ ínapoxü̃ i ngẽma ngunexü̃ i nagu norü numaxã poxcu ínangu̱xẽẽxü̃.
Poxcu i ngẽma nachixü̃anegüca̱x tá inguxü̃
4 Rü tá nachianemare ya yima ĩane ya Gácha. Rü yima ĩane ya Acharóü̃ rü tá nangeãcumare. Rü ngẽma Adúxwa maxẽxü̃ i duü̃xü̃gü rü ngunecü tátama ínawoxü̃. Rü ngẽma Ecróü̃wa maxẽxü̃ rü guxü̃táma ínawoxü̃.
5 ¡Rü pegümaxã pengechaxü̃gü, Pa Crétacüã̱xgü i Duü̃xü̃gü i Márpechinügu Ãpatagüxü̃x! Rü nüma ya Tupana rü pemaxã nanaxuegu i ñaa poxcu rü ñanagürü: —Pa Canaáü̃ane i Firitéugüchiane Ixĩxü̃, rü tá chanadai i curü duü̃xü̃gü rü taxũtáma íchayaxüxẽxẽ i bai i wüxi.
6 Rü ngẽma nachixü̃ane i márcutüwa ngẽxmaxü̃arü naane rü maxẽmaxã tá narüxü. Rü ngẽma carnérugüarü dauruü̃gü rü ngẽxma tá nangutaque̱xegü namaxã i norü carnérugü. Rü ngẽxma tá nayaxüxpüxü̃ i norü carnérugü —ñanagürü.
7 Rü ngẽma Yudátanüxü̃ i duü̃xü̃gü i íyaxügüxü̃ rü ngẽxguma Tupana nüxü̃ rüngü̃xẽẽgu rü tá nanayauxgü i ngẽma naane i márpechinüwa ngẽxmaxü̃. Rü ngéma tá nanachibüexẽxẽ i norü carnérugü, rü chütacü tá nagu nape ya yima ĩpatagü i Acharóü̃wa ngẽxmagüne.
Tupana tá nanapoxcue i Moátanüxü̃ rü Amóü̃tanüxü̃
8 2:8-9 Rü nüma ya Cori ya Iraétanüxü̃arü Tupana ya Guxãétüwa Ngẽxmacü rü ñanagürü: —Marü nüxü̃ chaxĩnü nax ñuxãcü ngẽma Moátanüxü̃ rü Amóü̃tanüxü̃ chorü duü̃xü̃güchiga chixri yadexagüxü̃. Erü nümagü rü chorü duü̃xü̃gümaxã naguxchigagü rü tümaarü naanegu nachocu. Rü ngẽmaca̱x i choma rü chauégagutama nüxü̃ chixu rü tá chayanaxoxẽxẽ i ngẽma Moátanüxü̃ rü Amóü̃tanüxü̃ guma ĩanegü ga Chodómarüxü̃ rü Gomórarüxü̃. Rü ngẽma norü naane rü tá chuxchuxü̃necü chayanguxuchixẽxẽ. Rü tá nayucüraane rü taxuxü̃táma i ta̱xacürü nanetü nawa narüxü, rü guxü̃gutáma nachipetüanemare. Rü ngẽma chorü duü̃xü̃gü i to i nachixü̃anewa gagüxü̃wa íyaxügüxü̃ rü tá nügüxü̃́ nanayauxgü i ngẽma Moátanüxü̃arü naane rü ngẽma Amóü̃tanüxü̃arü naane —ñanagürü.
9 Nüü̃ nadau 2:8
10 Rü ngẽma tá nixĩ i ngẽma Moátanüxü̃arü poxcu rü Amóü̃tanüxü̃arü poxcu nagagu nax Cori ya Tupanaarü duü̃xü̃gümaxã naguxchigagüxü̃, rü ñu̱xũchi nüxü̃ nacugüexü̃ i ngẽma Cori ya Tupana ya Guxãétüwa Ngẽxmacüarü duü̃xü̃gü.
11 Rü nüma ya Cori ya Tupana rü poraãcü tá namaxã nanu. Rü nagu tá nipogügü i ngẽma nachixü̃anearü tupananetachicüna̱xãgü. Rü ñu̱xũchi guxü̃ i nachixü̃anegüwa rü tá Cori ya Tupanaxü̃ nicua̱xüü̃gü, rü woo ngẽma duü̃xü̃gü i capaxũgüwa maxẽxü̃ rü tá nüxü̃ nicua̱xüü̃gü.
12 Rü ngẽxgumarüxü̃ tá ta i pemax, Pa Etiopíaanecüã̱xgüx, rü Cori ya Tupanaarü taragu tá peyue.
13 Rü nüma ya Cori ya Tupana rü nórteguama tá nawéxme̱x nax iyanaxoxẽẽãxü̃ca̱x i Achíriaane. Rü yima ĩane ya Nínibe rü tá nanangeãcuxẽẽmare, rü wüxi i chianexü̃ i ípamarexü̃xü̃ tá nayangucuchixẽxẽ.
14 Rü ngẽma napatagüarü poxeguxü̃ i mürapewagü rü tá ínanapoxü̃gü. Rü yima ĩpatamachixü̃gu tá nixĩ i nacagüxü̃ i carnérugü rü naguxü̃raü̃xü̃ i naeü̃gü i tama iyapuexü̃. Rü ngẽma ngú rü ngẽma ñaxĩ rü yima ĩpatagüarü caxtape̱xegu tá napegü. Rü ngẽma ngurucugü rü norü beü̃tánagüwa tá narüdoxe.
15 Rü ngẽma tá nüxü̃ nangupetü ya yima ĩane ya nügü írütaxü̃ne rü norü poragu yaxõxü̃ne. Rü ngẽma duü̃xü̃gü i nawa maxẽxü̃ rü ñaãcü nidexagü rü ñanagürügü: “Taxuxü̃ma i nachixü̃ane i ñoma i naanewa ngẽxmaxü̃maxã nawüxigu i tochixü̃ane”, ñanagürügü. Natürü yima ĩane rü tá nangeãcu rü ngẽmaca̱x naeü̃gü i idüraexü̃ tá nawa namaxẽ. Rü ngẽma duü̃xü̃gü i norü ngaicamana chopetüxü̃ rü tá nüxü̃ nacugüe rü nanexáerugü.
