Sofonías 3:1-20
3 Wüxi i ngechaü̃ nixĩ i cuxca̱x, Pa Yerucharéü̃x, erü curü duü̃xü̃gü rü tama Tupanaga naxĩnüe rü chixri togü i duü̃xü̃gümaxã inacua̱xgü. Rü ñu̱xma rü Tupanape̱xewa cuxãũãchi.
2 Rü tama Cori ya Tupanaarü ucu̱xẽ cuyaxu rü tama curü me nixĩ nax cuxü̃ naxucu̱xẽxü̃. Rü tama Cori ya Tupanaaxü̃́ cuyaxõ rü tama nüxna cungaicamachaü̃.
3 Rü ngẽma curü ãẽ̱xgacügü i cumaxã icua̱xgüxü̃ rü ñoma leóü̃gü i ngĩnetanücüüxü̃rüxü̃ nixĩgü. Rü ngẽma curü ãẽ̱xgacügü i guxchaxü̃güarü mexẽẽruü̃gü rü ñoma airugü i ínachianexü̃wa maxẽxü̃rüxü̃ nixĩgü. Rü ñoma airugü i guxü̃ma ngṍxü̃ rü bai i naxchina̱xã i norü moxü̃ãcüruxü̃ íyaxüxẽẽxü̃rüxü̃ nixĩgü i ngẽma curü ãẽ̱xgacügü i guxchaxü̃güarü mexẽẽruü̃gü.
4 Rü ngẽma orearü uruü̃gü i cuwa ngẽxmagüxü̃ rü nügü nicua̱xüü̃gü rü nacuechitawa̱xegü. Rü ngẽma curü chacherdótegü rü nanaxãũãchigü i ngẽma nachica i üünexü̃. Rü ínayatoxẽẽgü i Cori ya Tupanaarü mugü.
5 Natürü nüma ya Cori ya Tupana rü yima ĩanewa nangẽxma. Rü nüma rü mexü̃ naxü rü tama i chixexü̃. Rü wüxichigü i ngunexü̃gu rü meama duü̃xü̃gümaxã inacua̱x. Natürü ngẽma chixexü̃ üxü̃ rü tama ãnexü̃ nacua̱x.
6 Rü nüma ya Cori ya Tupana rü ñanagürü: —Marü ichayanaxoxẽxẽ i muxü̃ma i togü i nachixü̃anegü. Rü yima ĩanegüarü daxũtaechicagü rü norü poxeguxü̃tápü̱xgü rü chayawa̱xgüxẽxẽ. Rü yima ĩanegüarü namagü rü chanachianexẽẽgümare, rü taxuxü̃ma i duü̃xü̃ nagu nixũ. Rü yima norü ĩanegü ya ichianemarenewa rü taxuxü̃ma i duü̃xü̃ ínayaxü rü bai i wüxi.
7 Rü ngẽmaca̱x nagu charüxĩnü rü chaugümaxã ñachagürü: “Rü ngẽxguma ngẽma Yerucharéü̃cüã̱xgü nüxü̃ ĩnüegu ga yema naigü ga ĩanegümaxã chaxüxü̃, rü tá choxü̃ namuü̃e rü tá nanayauxgü i chorü ucu̱xẽgü rü ngẽmaãcü taxũtáma yima norü ĩanemaxã chanaxü ga yema noxri marü namaxã chaxueguchiréxü̃”, chaugümaxã ñachagürü. Natürü ngẽma duü̃xü̃gü i cuwa maxẽxü̃ rü nañu̱xãẽgü nax naguxü̃raü̃xü̃ i chixexü̃ naxügüxü̃.
8 ¡Rü ngẽmaca̱x choxü̃ ípeyangu̱xẽxẽ ñu̱xmata nawa nangu i ngẽma ngunexü̃ i nagu tá pexna naxca̱x chaca̱xü̃ i perü chixexü̃gü! Rü choma ya Cori ya Tupana rü ñachagürü: “Wüxigu tá chanangutaque̱xexẽxẽ i guxü̃ma i nachixü̃anecüã̱xgü rü guxü̃ma i ãẽ̱xgacügü nax chanapoxcuexü̃ca̱x naxca̱x i ngẽma chixexü̃ i naxügüxü̃. Rü guxü̃táma i ñoma i naane rü tá inayarüxo rü ngẽma chorü üxüema tá nayagu”, ñachagürü.
9 Rü ngẽxguma tá ngẽma ngunexü̃ ínguxgu rü mexü̃ i oremaxã tá chayadexagüxẽxẽ i duü̃xü̃gü nax ngẽmaãcü guxü̃ma i nümagü norü yumüxẽwa chomaxã yadexagüxü̃ca̱x rü guxü̃ma wüxigu choxü̃́ napuracüexü̃ca̱x.
10 Rü ngẽma Etiopíaanearü natügüarü tocutügu woonexü̃ i chorü duü̃xü̃gü rü nua tá naxĩ norü ãmaregümaxã. Rü choxna tá nayacagü nax nüxü̃ charüngü̃xẽxẽxü̃ca̱x.
11 Rü ngẽma ngunexü̃gu, Pa Chorü Duü̃xü̃güx, rü taxũtáma naxca̱x pexãnee ga yema chixexü̃ ga noxri chope̱xewa pexügüxü̃ ga yexguma tama chauga pexĩnüegu. Erü choma rü tá Yerucharéü̃na chayaxĩgachitanüxẽxẽ i ngẽma nügü icua̱xüü̃güxü̃ rü nügü írütagüxü̃. Rü ngẽmaãcü tagutáma yima chorü ma̱xpǘne ya üünenewa nangẽxmagü i ngẽma ãẽ̱xgacügü i nügü írütagüxü̃.
12 “Pa Yerucharéü̃x, cuwa tá chayaxügüxẽxẽ i ñuxre i duü̃xü̃gü i mecümaxü̃ i tama nügü icua̱xüü̃güxü̃. Rü nümagü rü tá choxü̃́ nayaxõgü.
13 Rü ngẽma Iraétanüxü̃ i Yerucharéü̃wa yaxǘgüxü̃ rü taxũtáma chixri natanüxü̃maxã inacua̱x, rü taxũtáma doraxü̃ nixugüe rü tagutáma texéxü̃ nawomüxẽẽgü. Rü mea tá ínachibüe, rü tama namuü̃eãcüma tá inarüngü̃gü” —ñanagürü.
Tupana rü tá nanataãẽxẽxẽ i Yerucharéü̃cüã̱xgü
14 ¡Pewiyaegü, Pa Duü̃xü̃gü i Chióü̃cüã̱x! ¡Rü taãẽãcü picagüxü̃, Pa Iraéanecüã̱xgüx! ¡Rü petaãxẽ, Pa Yerucharéü̃cüã̱xgüx, rü aixcüma perü maxü̃newa petaãẽgü!
15 Erü nüma ya Cori ya Tupana rü marü ínayachaxãchi nawa i ngẽma poxcu i pemaxã naxueguxü̃ rü marü ínanawoxü̃ i ngẽma perü uanügü. Rü nüma ya Cori ya Tupana ya Iraétanüxü̃arü ãẽ̱xgacü rü petanüwa nangẽxma, rü ngẽmaca̱x marü taxuca̱xma pemuü̃e.
16 Rü ngẽma ngunexü̃gu rü duü̃xü̃gü rü Yerucharéü̃cüã̱xgümaxã tá nüxü̃ nixu rü ñanagürügü tá: —¡Petaãxẽgü, Pa Chióü̃cüã̱xgü, rü taxṹ i pemuü̃exü̃! ¡Rü taxṹ i pegü peturaexẽẽxü̃!
17 3:17-18 Erü nüma ya Cori ya perü Tupana ixĩcü, rü petanüwa nangẽxma, rü nüma rü poracü nixĩ, rü pexü̃ tá namaxẽxẽxẽ. Rü nüma ya Cori ya Tupana rü tá pemaxã nataãxẽ. Rü ngẽma pexü̃ nax nangechaxü̃xü̃gagu rü ngexwaca̱xü̃xü̃ i maxü̃ tá pexna naxã. Rü ngẽma nax pemaxã nataãẽxü̃ rü nüma ya Tupana rü norü taãẽmaxã tá nawiyae ñoma petachigaarü ngunexü̃gurüxü̃ —ñanagürügü tá. Rü nüma ya Cori ya Tupana rü ñanagürü: —Choma rü tá pexü̃ íchanguxü̃xẽxẽ nawa i ngẽma chixexü̃ i pexü̃ ãxũnexü̃. Rü nawa tá pexü̃ íchanguxü̃xẽxẽ i ngẽma ãne i peétüwa ngẽxmaxü̃.
18 Nüü̃ nadau 3:17
19 Ngẽma ngunexü̃gu rü tá chanadai i guxü̃ma i ngẽma chixri pemaxã icua̱xgüxü̃. Rü tá pexü̃ charüngü̃xẽxẽxü̃ i pema nax pengearü poxü̃ruü̃ã́xü̃, ñoma wüxi i carnéru ibüyeparaxü̃ i ngearü poxü̃ã́xü̃rüxü̃. Rü pema nax pewoonexü̃ rü tá wena pexü̃ chanutaque̱xe. Rü ngẽma naanegü i ngextá duü̃xü̃gü pexü̃ ixoexü̃wa rü tá pexü̃ chatachigaxẽxẽ.
20 Rü ngẽma ngunexü̃gügu rü pechixü̃anegu tá pexü̃ changutaque̱xexẽxẽ. Rü ngẽma perü naanewa rü tá pexü̃ charüngü̃xẽxẽxü̃ nax wena mea pexü̃ nangupetüxü̃ca̱x. Rü ngẽmaãcü tá petachiga nape̱xewa i guxü̃ma i duü̃xü̃gü i ñoma i naanewa ngẽxmagüxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
