Santiago 1:1-27
1 Pa Chautanüxü̃ i 12 i Iraétücumügü i Ngechuchuaxü̃́ Yaxõgüxü̃ i Guxü̃ i Naanewa Nawogüxü̃x, choma i Chantiágu pexü̃ charümoxẽ. Rü choma nixĩ i Tanatü ya Tupanaaxü̃́ rü tórü Cori ya Ngechuchu ya Cristuaxü̃́ chapuracüxü̃.
Ngẽma cua̱x i Tupanawa ne ũxü̃chiga
2 Pa Chauenexẽgü i Yaxõgüxü̃x, name nixĩ nax petaãẽgüxü̃ i ngẽxguma naguxü̃raü̃xü̃ i guxchaxü̃gü pexca̱x ínguxgu.
3 Erü pema nüxü̃ pecua̱x rü ngẽxguma guxchaxü̃maxã perü õxü̃ naxü̱xgu, rü ngẽmawa pengúe nax yáxna namaxã pexĩnüexü̃ca̱x i ngẽma guxchaxü̃gü i pingegüxü̃.
4 Rü ngẽma nax yáxna namaxã pexĩnüexü̃ i guxchaxü̃gü rü wüxi i perü poraxẽẽruxü̃ nixĩ nax mea Tupanaga pexĩnüexü̃ca̱x, rü norü orearü cua̱xwa pengugüxü̃ca̱x, rü taxuwama nachixexü̃ca̱x i perü maxü̃.
5 Ngẽxguma chi petanüwa wüxíe tüxü̃́ nataxuxgu i tümaarü cua̱x, rü name nixĩ i Tupanana taca. Rü nüma rü norü ngúchaü̃maxã tá mea guxãna nanaxã rü taxũtáma tümamaxã naxaxü.
6 Natürü ngẽxguma naxca̱x ítacaxgu rü tanaxwa̱xe nax aixcüma tayaxõõcüma naxca̱x ítaca̱xaxü̃. Rü tama name i nagu tarüxĩnüxü̃ nax taxũtáma tanayaxuxü̃. Erü yíxema tama mea yaxṍxe, rü ñoma már arü yuape i buanecü guxü̃wama cuexü̃rüxü̃ tixĩ.
7 1:7-8 Rü yíxema duü̃xẽ ya ñu̱xma mea yaxṍxe rü moxü̃ rü tama mea yaxṍxe, rü taxucürüwama nagu tarüxĩnü nax ta̱xacü Cori ya Tupanaxü̃tawa tayaxuxü̃.
8 Nüü̃ nadau 1:7
9 Rü yíxema yaxṍxe ya tama muarü diẽruã́xẽ, rü name nixĩ i tataãxẽ erü Tupana rü tümamaxã nataãxẽ.
10 Rü yíxema yaxṍxe ya muarü diẽruã́xẽ rü name nixĩ i tataãẽãma ega woo wüxi i ngunexü̃ tüxü̃́ nataxu̱xgu i tümaarü diẽru. Erü ngẽma diẽruã́xü̃ i duü̃xü̃gü, rü ñoma putürachacurüxü̃ tama natai.
11 Rü ngẽxguma nangunagügu ya üa̱xcü rü poraãcü nangu̱xetügu, rü narüñexẽ i ngẽma putüra rü narüngu i nachacu, rü ngẽxma nagu̱x nax namexü̃. Rü ngẽxgumarüxü̃ tá ta nayu i ngẽma diẽruã̱xü̃chixü̃ rü ngẽxma tá guxü̃ma i norü ngẽmaxü̃gümaxã inayarüxo.
Tupana tüxü̃ naxü natürü tama chixexü̃gu tüxü̃ nanguxẽxẽ
12 Rü tataãxẽ ya yíxema yáxna namaxã ĩnüxe i ngẽxguma ta̱xacü tüxna ĩnügu. Erü ngẽxguma yáxna namaxã taxĩnügu, rü Tupana tá tümamaxã nataãxẽ rü tá tüxna nanaxã i norü ãmare i maxü̃ i taguma gúxü̃. Rü ngẽma nixĩ i ãmare ya Tupana tümamaxã ixunetaxü̃ ya yíxema nüxü̃ ngechaü̃güxe.
13 Natürü ngẽxguma texé ĩnü i chixexü̃ tümaca̱x ínguxgu nax chixexü̃ taxüxü̃ca̱x rü tama name i nagu narüxĩnü nax Tupana tümaãẽwa ínangu̱xẽẽxü̃ i ngẽma ĩnü i chixexü̃. Erü ya Tupana rü taguma naãxẽwa nangu nax chixexü̃ naxüxü̃, rü ngẽxgumarüxü̃ ta taguma chixexü̃ i ĩnü texéãẽwa nanguxẽxẽ nax chixexü̃ taxüxü̃ca̱x.
14 Natürü ngẽma chixexü̃ i tümatama nagu tarüxĩnüxü̃ nixĩ i chixexü̃gu tüxü̃ nguxẽẽxü̃.
15 Rü ngẽma chixexü̃ i tümatama nagu tarüxĩnüxü̃ nixĩ i tüxü̃ pecaduã̱xẽẽxü̃. Rü ngẽma pecadugagu nixĩ i düxwa itayarütaxuxü̃.
16 Pa Chauenexẽgü ya Pexü̃ Changechaü̃güxe, tama name i pegü ipexã nax texé pexü̃ womüxẽẽxü̃ca̱x.
17 Erü guxü̃ma i ngẽma aixcüma mexü̃ i tüxna naxãxü̃, rü naxü̃tawa ne naxũ ya Tupana ya daxũgucü ga naxücü ga üa̱xcü rü tauemacü rü woramacurigü rü ẽxtagü. Rü nüma rü guxü̃guma nanaxa̱i̱xrügumaraxü̃ rü taguma naxüchicüü.
18 Rü nüma nixĩ ga tüxna naxããxü̃ ga norü ore i aixcüma ixĩxü̃ nax ngẽmaãcü tüxü̃́ nangẽxmaxü̃ca̱x i maxü̃ i taguma gúxü̃. Rü yemaacü nanaxü yerü nanaxwa̱xe nax yixíra nüxü̃́ nax yaxõgüxü̃.
Name i nagu tamaxẽ i Tupanaarü ore
19 Rü guxãma i pemax, Pa Chauenexẽgü ya Pexü̃ Changechaü̃güxe, rü ngẽxguma texé pemaxã idexagu, rü name nixĩ i mea iperüxĩnüe. Rü tama name i penue rü tüxü̃ pechoxü̃gagü.
20 Erü ngẽxguma nanuxgu i wüxi i duü̃xü̃, rü tama Tupanaarü ngúchaü̃ naxü.
21 Rü ngẽmaca̱x name nixĩ i nüxü̃ perüxoe i guxü̃ma i ngẽma chixexü̃gü i guxü̃wama ngẽxmagüxü̃. ¡Rü mea penayaxu i ngẽma ore i petanügu toxü̃! Erü ngẽma ore rü nüxü̃́ nangẽxma i pora nax pexü̃ namaxẽxẽẽxü̃ca̱x.
22 Rü tama name i iperüxĩnüemare i ngẽma ore, natürü name nixĩ i penaxü i ngẽma pemaxã nüxü̃ yaxuxü̃. Erü ngẽxguma iperüxĩnüemaregu rü tama penaxü̱xgu, rü pegütama pewomüxẽẽgümare.
23 Rü yíxema irüxĩnümarexe i Tupanaarü ore natürü tama naxǘxe i ngẽma nüxü̃ yaxuxü̃, rü wüxi i yatü i daucüwa nügü dauchametüxü̃rüxü̃ tixĩ.
24 Erü nügü nadáuchametü, natürü ngẽxguma yaxũgachigu rü paxa nüxü̃ inayarüngüma nax nañuxchametüraü̃xü̃ i noxrix.
25 Natürü yíxema mea nawa ngúxe rü naga ĩnüxe i ngẽma ore i aixcüma ixĩxü̃ i pecaduwa tüxü̃ ínguxuchixẽẽxü̃, rü ngẽxguma tayangu̱xẽẽgu i ngẽma ore nüxü̃ ixuxü̃, rü Tupana tá tüxü̃ narüngü̃xẽxẽ.
26 Rü ngẽxguma chi wüxíe tügü ixuxgu nax wüxi i ore i mexü̃ tixõxü̃ natürü tama nüxna tada̱u̱xgu ya tümaarü conü, rü tügütama tawomüxẽxẽ rü taxuwama name i ngẽma ore i tixõxü̃.
27 Natürü tümaarü õ i Tanatü ya Tupanape̱xewa aixcüma mexü̃, rü ngẽma nixĩ nax nüxü̃ tarüngü̃xẽẽxü̃ i taxcutagü rü yutegüxü̃ rü tügüna tadauxü̃ nax tama ñoma i naanearü chixexü̃gu tanguxü̃.
