Santiago 2:1-26
2 Pa Chauenexẽgüx, pema rü nüxü̃́ peyaxõgü ya tórü Cori ya Ngechuchu ya Cristu ya üünecü. Rü ngẽmaca̱x tama name nax chixri penayaxuxü̃ i wüxi i duü̃xü̃ rü mea penayaxuxü̃ i to.
2 2:2-3 Rü ngẽxguma chi perü ngutaque̱xegu naxücu̱xgu i wüxi i yatü i úirumaxã ãneraã́xü̃ rü mexchiruxü̃, rü pema rü mea penayauxgü rü ñaperügügü nüxü̃, “¡Nua mexü̃ i nachicawa rüto!” ñaperügügü. Rü ngẽxgumarüxü̃ ta chi ngẽxma naxücu̱xgu i wüxi i yatü i ngearü diẽruã́xü̃ rü wexachiruxü̃ rü ñaperügügü nüxü̃, “¡Cuma rü ngẽxmatama nachi!” rüe̱xna “¡Ngéma ñatüanewa rütomare!” ñaperügügü nüxü̃.
3 Nüü̃ nadau 2:2
4 Rü ngẽxguma tama wüxigu mea penayauxgu i ngẽma taxre, rü pewatama nango̱x nax tama guxãmaxã pemecümaxü̃ rü chixexü̃ i duü̃xü̃gü nax pixĩgüxü̃.
5 Pa Chauenexẽgü ya Pexü̃ Changechaü̃güxe, ¡Iperüxĩnüe i ñaa ore! Tupana tüxü̃ nade ya yíxema ñoma i naanewa ngearü diẽruã̱xgüxe, erü nanaxwa̱xe nax nüxü̃́ tayaxõgüxü̃ rü tanayauxgüxü̃ i ngẽma maxü̃ i taguma gúxü̃ i tümamaxã inaxunetaxü̃ ya yíxema nüxü̃ ngechaü̃güxe.
6 Natürü pema rü penaxãnexẽxẽ rü nüxü̃ pexo i ngẽma ngearü diẽruã̱xgüxü̃. ¿Taux ẽ̱xna ngẽma diẽruã̱xgüxü̃ yixĩxü̃ i chixri pemaxã icua̱xgüxü̃ rü ãẽ̱xgacügüpe̱xewa pexü̃ itúxü̃ rü íyaxuaxü̃güxü̃?
7 ¿Taux ẽ̱xna ngẽma diẽruã̱xgüxü̃ yixĩxü̃ i chixexü̃ namaxã ixugüexü̃ i naéga i mexechixü̃ ya perü Cori ya Cristu?
8 Tupanaarü mu i guxü̃ i norü mugüarü yexera ixĩxü̃ rü ñanagürü:“¡Nüxü̃ nangechaü̃ i cumücü ngẽma cugütama cungechaü̃xü̃rüxü̃!”
ñanagürü. Rü ngẽxguma aixcüma naga pexĩnüegu i ngẽma mu, rü mexü̃ pexügü.
9 Natürü ngẽxguma mea penayauxgu i wüxi i yatü i mexchiruxü̃ rü chixri penayauxgu i ngẽma wexachiruxü̃, rü pecadu pexü. Rü Tupanaarü mugüpe̱xewa pegagutama chixexü̃ pexü.
10 Erü ngẽxguma chi texé naga ĩnügu i guxü̃ma i Tupanaarü mugü natürü chi wüxiwatama ítatüxgu nax tama naga taxĩnüxü̃, rü chi ñoma guxü̃ma i Tupanaarü mugü tama naga taxĩnüxü̃rüxü̃ tixĩ.
11 Erü nümatama ya Tupana ga ñacü:“Tama name i nai i nge i ãtecümaxã cumaxü̃”,
ñacü, rü ñanagürü ta:“Tama name i cumáeta”,
ñanagürü. Rü ngẽxguma chi tama nai i nge i ãtecümaxã cumaxü̃gu, natürü cumáetagu, rü cuma rü tama naga cuxĩnü i Tupanaarü mu.
12 Rü ngẽmaca̱x name nixĩ nax mea pidexagüxü̃ rü mea pemaxẽxü̃. Erü nüma ya Tupana rü ngẽma mugü i pecaduna tüxü̃ ínanguxü̃xẽẽxü̃maxã tá tüxna naca i tórü maxü̃chiga.
13 Erü guxãma ya yíxema tama tümamücügü tüxü̃́ ngechaü̃tümüü̃güxe, rü Tupana rü taxũtáma nüxü̃́ tangechaü̃tümüü̃güãcüma tüxna naca i tümaarü maxü̃chiga. Natürü yíxema tümamücügü tüxü̃́ ngechaü̃tümüü̃güxe, rü taxũtáma tamuü̃e i ngẽxguma Tupana tüxna caxgux, erü nüxü̃́ tangechaü̃tümüü̃güãcüma tá tüxna naca.
Ega aixcüma yaxõgügu, rü tanaxwa̱xe i mexü̃ taxügü rü nüxü̃ tarüngü̃xẽxẽ i togü
14 Pa Chauenexẽgüx, ¿Ta̱xacüwa namexü̃ ega wüxíe ñagügu: “Choma rü Tupanaaxü̃́ chayaxõ”, ñagügu, natürü tama tümamücüxü̃ tarüngü̃xẽxẽgu? ¿Pexca̱x rü ngẽmarüxü̃ i õ tá tüxü̃ maxẽẽxü̃?
15 2:15-16 Rü ngẽxguma chi wüxi i taenexẽ rü ẽ̱xna taeya̱x i yaxõxü̃ rü natauxchirugu rü nangewemügu, rü chi wüxíe i pema rü ñapegügu: “¡Mexü̃ cuxü̃ üpetü, rü icu̱xcuchi nax tama cuxü̃ nadeyuxü̃ca̱x, rü mea nachibü!” ñapegügu, rü ¿ta̱xacüwa name i ngẽma ega tama nüxna penaxãxgu i ngẽma nüxü̃́ taxuxü̃?
16 Nüü̃ nadau 2:15
17 Rü ngẽxguma yaxõmaregu natürü tama mexü̃ ixüxgu, rü tama togüxü̃ rüngü̃xẽẽgu, rü ¿ta̱xacüwa namexü̃ i ngẽmaãcü nax yaxõxü̃?
18 Erü ngẽxguma cuyaxõmaregu natürü tama mexü̃ cuxü̱xgu, rü ngürüãchi tá wüxíe ñatarügü cuxü̃: “Cuma rü cuyaxõmare natürü taxuxü̃ma i mexü̃ cuxü. Natürü choma rü chayaxõ rü naétü mexü̃ chaxü. ¿Rü ñuxãcü tá nüxü̃ chacuáxü̃ nax cuyaxõxü̃ ega tama mexü̃ cuxü̱xgu i cuma? Natürü choma rü chorü ü i mexü̃maxã tá cuxü̃ chanawe̱x nax aixcüma chayaxõxü̃”, ñatarügü tá cuxü̃.
19 Cuma cuyaxõ nax nangẽxmaxü̃ ya wüxitama ya Tupana. Marü name. Natürü ngẽma ngo̱xogü rü ta ngẽmaãcü nayaxõgü, rü poraãcü muü̃maxã nidu̱xruxe.
20 Pa Yatüx, tama name nax wüxi i duü̃xü̃ i tama naãxẽxü̃ cuáxü̃ quixĩ. ¿Tama ẽ̱xna nüxü̃ cucua̱x rü ngẽxguma cuyaxõmaregu, rü tama mexü̃ cuxü̱xgu, rü taxuwama name i ngẽma curü õ?
21 Nũxcümaü̃cü ga tórü o̱xi ga Abraáü̃ rü Tupanaga naxĩnü ga yexguma namaxã nüxü̃ yaxuxgu nax naxca̱x yamáaxü̃ca̱x ga nane ga Ichaá. Rü yemaca̱x ga Tupana rü nüxü̃ nixu nax gumá Abraáü̃ rü mexü̃ ücü nax yixĩxü̃.
22 Rü ngẽmawa nüxü̃ tacua̱x rü tama nayaxõmare ga Abráü̃, natürü Tupanaga naxĩnü rü ta. Rü yema Tupanaga naxĩnüxü̃wa tüxü̃ nüxü̃ nacua̱xẽxẽ nax aixcüma Tupanaaxü̃́ yaxõõxü̃.
23 Rü yemaacü ningu ga yema Tupanaarü ore ga ümatüxü̃ ga ñaxü̃:“Abraáü̃ rü Tupanaaxü̃́ nayaxõ rü yemaca̱x Tupana nüxü̃ nixu nax mexü̃ ücü yixĩxü̃.Rü yexgumarüxü̃ ta nüxü̃ nixu nax namücü yixĩxü̃ ga Abraáü̃”.
24 Rü ngẽmawa nüxü̃ tacua̱x nax Tupana namaxã taãẽxü̃ ya yimá yatü ya mexü̃ ücü rü tama yaxõmarecü.
25 Rü yemaacü ta ngĩmaxã nangupetü ga Raá ga ngexü̃ ga naxü̃nemaxã taxexü̃. Rü Tupana ngĩxü̃ nixu nax mexü̃ naxüxü̃ ga yexguma ngĩpatawa nayauxgüãgu ga yema orearü ngeruü̃gü, rü ñu̱xũchi to ga namagu iyamugü naxcha̱xwa ga norü uanügü.
26 Rü ngẽma naxü̃ne rü nayumare ega nataxuxguma i naãxẽ. Rü ngẽxgumarüxü̃ ta nixĩ nax taxuwama namexü̃ nax yaxõmarexü̃ ega taxuxü̃ma i mexü̃ ixüxgu.
