Santiago 3:1-18
3 Pa Chauenexẽgüx, tama name i muxẽma i pema rü ngúexẽẽruü̃gü pegü pixĩgüxẽxẽ. Erü pema nüxü̃ pecua̱x i yixema nax ngu̱xẽẽruü̃gü ixĩgüxü̃, rü Tupana rü ngẽma togüarü yexera tá tüxna naca i tórü maxü̃chiga rü tórü puracüchiga.
2 Guxãma i yixema rü muẽ̱xpü̱xcüna chixexü̃ taxüe. Yimá yatü ya taguma chixexü̃xü̃ ixucü rü aixcüma mecü nixĩ, erü nüxü̃ nacua̱x nax mea nügüna nadauxü̃ nax tama chixexü̃ naxüxü̃ca̱x.
3 Rü wüxi i cowaru, rü ngẽxguma inaxwa̱xegu nax taga naxĩnüxü̃ca̱x rü tanaxütü̱xünagu nax ngẽmaãcü yixema namaxã icuáxü̃ca̱x.
4 ¡Dücax, nagu perüxĩnüe ya wapurugü ya buanecüarü poramaxã ixũxü̃ne! Rü woo nitaxüchi rü buanecü ya taxüchicümaxã inicuegü, natürü íxracü ya quiyamaxã nanatoxchinü i norü toxpe̱xeruxü̃, rü ngextá nüma ínanaxwa̱xexü̃wa nanaxũxẽxẽ.
5 3:5-6 Rü ngẽxgumarüxü̃ ta nixĩ ya tórü conü rü woo nax naxírachiréxü̃, natürü poraxü̃ i orexü̃ nixu. Rü wüxitama i üxüarü ya̱u̱xraxü̃ i íraxü̃wa inaxügü nax yaxãxü̃ i taxü̃ma i naane. Rü tórü conü rü ñoma wüxi ya üxürüxü̃ nixĩ. Rü taxünewa rü wüxi i taxü̃ i chixexü̃ nixĩ ya yimá tórü conü erü nanachixexẽxẽ i guxü̃ma i tórü maxü̃. Rü ngẽma Tupana ngo̱xogüxü̃ ípoxcuexü̃gune ya üxüemawa ne naxũ i ngẽma chixexü̃ i namaxã yadexaxü̃ ya tórü conü. Rü ngẽma chixexü̃maxã nanachixexẽxẽ i guxü̃ma i tórü maxü̃.
6 Nüü̃ nadau 3:5
7 Duü̃xü̃gü rü nüxü̃ nacua̱x nax íyapuxẽẽãxü̃ rü nüxna nachogüxü̃ i naguxü̃raü̃xü̃ i naeü̃gü i idüraexü̃, rü werigü, rü ãxtapegü, rü naeü̃gü i márwa ngẽxmagüxü̃. Rü namaxã inacua̱xgü.
8 Natürü taxúema nüxü̃ tacua̱x nax nüxna tachogüxü̃ ya tümaarü conü. Rü wüxi i chixexü̃ i taxü̃ i taxucürüwama texé iyarüxoxẽẽxü̃ nixĩ. Rü ngẽma norü dexa rü üxüxü̃ i nawa iyuxü̃rüxü̃ nixĩ.
9 Rü yima tórü conümaxã nüxü̃ ticua̱xüxü̃ ya Tanatü ya Tupana, rü yimamaatama chixexü̃ namaxã tixugüe i duü̃xü̃gü ya Tupana nügüacü üxü̃.
10 Rü ngẽma taa̱xmaxã mexü̃ duü̃xü̃gümaxã taxuegu, rü ngẽmatama taa̱xmaxã chixexü̃ namaxã taxuegu. Pa Chauenexẽgüx, tama name nax ngẽmaãcü yixĩxü̃.
11 Wüxi i dexáarü chuxchuxü̃watama rü taxuacüma ínaxũxũ i dexá i mexü̃ rü dexá i chixexü̃.
12 Pa Chauenexẽgüx, wüxi i igunecü rü taxuacüma oribuarü omaxã naxo, rü wüxi i úba rü taxuacüma igunecüarü omaxã naxo. Rü ngẽxgumarüxü̃ ta wüxi i dexáarü chuxchuxü̃ i yucürachíüxü̃wa, rü taxuacüma ínaxũxũ i dexá i mexü̃.
Ngẽma cua̱x i aixcüma mexü̃
13 Ngẽxguma chi petanüwa nangẽxmagu i wüxi i duü̃xü̃ i cua̱x nüxü̃́ ngẽxmaxü̃ rü mea naãxẽxü̃ cuáxü̃, rü tama name i nügü nicua̱xüxü̃, natürü nanaxwa̱xe nax mexü̃ i nacümawa pexü̃ nüxü̃ nadauxẽẽxü̃ nax aixcüma cua̱x nüxü̃́ ngẽxmaxü̃.
14 Natürü ngẽxguma chi pixãũxãchiwa̱xegügu rü pegüchi pexaiegu rü togüarü yexera pegü pixĩxẽẽchaü̃gu, rü taxuca̱xma pegü picua̱xüü̃gü, rü ngẽma nagu perüxĩnüexü̃ rü wüxi i doramare nixĩ.
15 Erü ngẽma nax ixãũxãchiwa̱xegüxü̃ rü duü̃xü̃güchi nax ixaiexü̃ rü togüarü yexera yigü nax ixĩgüxẽẽchaü̃xü̃, rü tama Tupanawa ne naxũ, natürü ñoma i naanearü ĩnüwa rü ngo̱xo i Chatanáwa nixĩ i ne naxũxü̃.
16 Erü ngẽma ãũãchi íngẽxmaxü̃wa rü duü̃xü̃gü nügü írüyexeraxẽẽchaü̃xü̃wa, rü taxuxü̃ma mea inixũ rü naguxü̃raü̃xü̃ i chixexü̃ nangẽxma.
17 Natürü guxãma ya yíxema aixcüma tüxü̃́ nangẽxmagüxe i ngẽma cua̱x i Tupanawa ne ũxü̃, rü taxuxü̃ma i chixexü̃ taxü, rü tama tanuewa̱xe, rü timecüma, rü itarüxĩnüe i ucu̱xẽgü, rü tangechaxü̃tümüxü̃wa̱xegü, rü duü̃xü̃güétüwa tachogü, rü tixaixcümagü, rü mexü̃ taxügü.
18 Rü yíxema duü̃xü̃güxü̃ rüngü̃xẽẽgüxe nax tama nügüchi naxaiexü̃ca̱x, rü Tupana tá tüxü̃ narüngüxẽxẽ nax tataãẽxü̃ca̱x.
