Tito 1:1-16
1 1:1-2 Pa Títox, choma i Pauru i Tupanaarü puracütanüxü̃ nixĩ i cuxca̱x chanaxümatüxü̃ i ñaa popera. Rü Ngechuchu ya Cristu nixĩ ga choxü̃ mucü nax ngẽma duü̃xü̃gü ya Tupana dexü̃maxã nüxü̃ chixuxü̃ca̱x i norü ore nax Tupanaaxü̃́ yaxõgüãxü̃ca̱x rü nüxü̃ nacua̱xgüxü̃ca̱x i ngẽma norü ore i aixcüma ixĩxü̃ i tüxü̃ rüngü̃xẽẽxü̃ nax naxca̱x imaxẽxü̃ca̱x. Rü ngẽmaca̱x Tupanaaxü̃́ tayaxõgü erü tanayauxgüchaü̃ i ngẽma maxü̃ i taguma gúxü̃. Rü ngẽma maxü̃ i taguma gúxü̃ nixĩ ga nũxcümaxü̃chima ga tauta naane ü̱xgu Tupana ya taguma idoracü nüxü̃ ixuxü̃.
2 Nüü̃ nadau 1:1
3 Rü ñu̱xma rü marü nawa nangu nax Tupana tüxü̃ nüxü̃ cua̱xẽẽxü̃ i ngẽma norü ore i mexü̃ i tüxü̃ maxẽxẽẽxü̃. Rü ngẽmaca̱x nümatama ya Tupana ya tórü Maxẽxẽxẽruxü̃ choxü̃ namu nax nüxü̃ chixuxü̃ca̱x i ngẽma norü ore.
4 Pa Títox, cuma rü chaune quixĩ i Tupanaarü orewa.* Rü ñu̱xma rü chauxrüxü̃ cuyaxõ. Rü chanaxwa̱xe i cuxü̃ narüngü̃xẽẽgü rü cuxü̃ nataãẽxẽẽgü ya Tanatü ya Tupana rü Ngechuchu ya Cristu ya tórü Maxẽxẽxẽruxü̃.
Títoarü puracü ga yexguma Crétawa nayexmagu
5 Rü yexguma Crétaarü capaxũwa cuxna íchixũxgu, rü cumaxã nüxü̃ chixu nax yema yaxõgüxü̃tanüwa cunaxüxü̃ ga yema puracü ga tama chingu̱xẽẽxü̃ ga yexguma cuxna yéma chataegugu. Rü yemaca̱x cumaxã nüxü̃ chixu nax wüxichigü ya ĩanewa rü nüxü̃ cuxunetaxü̃ i yaxõgüxü̃arü ãẽ̱xgacügü nax ngẽma yaxõgüxü̃maxã inacua̱xgüxü̃ca̱x, yema cuxü̃ chamuxü̃rüxü̃.
6 Rü ngẽma yaxõgüxü̃arü ãẽ̱xgacü, rü name i mea namaxü̃ nax taxúema chixri nachiga idexagüxü̃ca̱x. Rü name i wüxitama tixĩ ya naxma̱x. Rü naxacügü rü name nax yaxõgüãxü̃ rü mea namaxẽxü̃ nax taxúema nüxü̃ ixuxü̃ca̱x nax tama nanatüga naxĩnüexü̃ rü chixri namaxẽxü̃.
7 Erü yíxema yaxõgüxü̃arü ãẽ̱xgacü ixĩxẽ, rü Tupanaarü puracümaxã nixĩ i tacuáxü̃. Rü ngẽmaca̱x tanaxwa̱xe i aixcüma mea tamaxü̃. Rü tama name i wüxi i yatü i chixecümaxü̃ tixĩ rü chixexü̃gu rüxĩnüxü̃ tixĩ. Rü tama name nax tangãxü̃xü̃, rü nuca̱x tadauxü̃, rü duü̃xü̃güxü̃ tawomüxẽẽxü̃ norü diẽruca̱x.
8 Natürü name nax duü̃xü̃güxü̃ mea tayaxuxü̃ i tümapatawa, rü mexü̃gu tarüxĩnüxü̃. Rü tanaxwa̱xe i wüxi i yatü i aixcüma tümaãẽxü̃ cuáxe tixĩ, rü duü̃xü̃gümaxã ixaixcümáxe tixĩ rü aixcüma Tupanaaxü̃́ yaxṍxe tixĩ, rü mea tügümaxã icuáxe tixĩ.
9 Rü yíxema yaxõgüxü̃arü ãẽ̱xgacü ixĩxẽ rü name i mea nagu tixũ ga yema ore i aixcüma ixĩxü̃ ga tüxü̃ ingu̱xẽẽxü̃ nax tüma rü ta togüxü̃ tangúexẽẽxü̃ca̱x i ngẽma ore i mexü̃, nax ngẽmaãcü nüxü̃́ tanangúchaü̃xẽẽxü̃ca̱x nax yaxõgüãxü̃ca̱x i ngẽma duü̃xü̃gü i tama yaxõgüchaü̃xü̃.
10 Erü nangẽxma i muxü̃ma i duü̃xü̃gü i tama yaxõgüchaü̃xü̃. Rü yexera nixĩ i ngẽma Yudíugü i naxwa̱xegüxü̃ nax nügü ínawiecha̱xmüü̃pe̱xechiraü̃güxü̃ i ngẽma yaxõgüxü̃. Rü nümagü rü ore i taxuwama mexü̃xü̃ nixugügü, rü ngẽmaãcü duü̃xü̃güxü̃ nawomüxẽẽgü.
11 Natürü ngẽma duü̃xü̃gü i ngẽmaãcü chixri ngu̱xẽẽtaegüxü̃, rü chanaxwa̱xe i noxtacüma icuyanangea̱xgüxẽxẽ. Erü muxü̃ma i duü̃xü̃güxü̃ nachixexẽẽgü rü ñu̱xmata ñuxre ya ĩpatawachigü rü nanachixexẽxẽ i guxü̃ma i duü̃xü̃gü nax tama aixcüma Tupanaaxü̃́ yaxõgüãxü̃ca̱x. Rü ngẽma ore i taxuwama mexü̃maxã duü̃xü̃güxü̃ nangúexẽxẽ nax ngẽmaãcü tüxü̃ nawomüxẽẽgüãcüma ngĩxü̃ nayauxgüxü̃ca̱x i diẽru.
12 Rü wüxi ga yematama capaxũcüã̱x ga norü orearü uruxü̃ nixĩ ga natanüxü̃xü̃tama ixuxü̃ rü ñanagürü: “Ñaa Crétacüã̱x i duü̃xü̃gü rü nidorata̱a̱xgü, rü nidürae, rü nitaanü, rü nixoxochi”, ñanagürü.
13 1:13-14 Rü aixcüma nixĩ ga yema ore ga nüxü̃ yaxuxü̃ ga yema yatü. Rü ngẽmaca̱x chanaxwa̱xe i poraãcü cuyaxucu̱xẽgü i ngẽma yaxõgüxü̃ nax aixcüma yaxõgüãxü̃ca̱x, rü tama nagu naxĩxü̃ca̱x i ngẽma Yudíugücüma. Rü tama name nax naga naxĩnüexü̃ i ngẽma duü̃xü̃gü i tama nüxü̃ cua̱xgüchaü̃xü̃ i ore i aixcüma ixĩxü̃.
14 Nüü̃ nadau 1:13
15 Rü yíxema aixcüma Tupanaaxü̃́ yaxṍxe rü guxü̃guma mexü̃gu tarüxĩnü. Natürü ngẽma tama Tupanaaxü̃́ yaxõxü̃, rü taxucürüwa mexü̃gu narüxĩnü erü norü ĩnü rü naxãũãchi rü naãxẽwa chixexü̃gu narüxĩnü.
16 Rü ngẽma duü̃xü̃gü i tama yaxõgüxü̃ rü nügü yaxugügu rü Tupanaxü̃ nacua̱xgü, natürü ngẽma naxügüxü̃wa nüxü̃ tacua̱x nax tama aixcüma Tupanaxü̃ nacua̱xgüxü̃. Rü nümagü rü Tupanape̱xewa nichixe, rü tama naga naxĩnüe, rü taxuwama name i ngẽma naxügüxü̃.
Notas
^ 1:4 Yerü chauxü̃tawa cunayaxu ga norü ore ga noxri.
