Tito 2:1-15
2 Natürü i cumax, Pa Títox, rü name i guxü̃gutáma ngẽma mexü̃ i ngu̱xẽẽtaemaxã cunangúexẽxẽ.
2 ¡Rü ngẽma yaxõgüxü̃ i yaxü̃ rü yaxucu̱xẽgü nax mea naãẽxü̃ yacuáxü̃ca̱x, rü taxúema chixri nachiga idexagüxü̃ca̱x, rü mexü̃gu naxĩnüexü̃ca̱x! ¡Rü nangúexẽxẽ nax mea Tupanaaxü̃́ yaxõgüãxü̃ca̱x, rü guxü̃ i duü̃xü̃güxü̃ nangechaü̃güxü̃ca̱x, rü yáxna namaxã naxĩnüexü̃ca̱x ega woo ta̱xacürü guxchaxü̃ naxca̱x ínguxgu!
3 Rü ngẽxgumarüxü̃ ta chanaxwa̱xe i mea cuyaxucu̱xẽgü i ngẽma ngexü̃gü i yáxü̃ nax mea Tupanape̱xewa namaxẽxü̃ca̱x. Rü tama name nax yaxoregüta̱a̱xgüxü̃, rü nangãxẽwa̱xegüxü̃. Rü name nixĩ i guxü̃ i duü̃xü̃güpe̱xewa mea namaxẽ.
4 2:4-5 Rü ngẽma ngexü̃gü i yaxguã̱xgü rü name nixĩ i mea nax nangúexẽẽãxü̃ i ngẽma ngexü̃gü i paxü̃gü nax aixcüma natexü̃ rü naxacügüxü̃ nangechaü̃güxü̃ca̱x, rü mea naãẽxü̃ nacua̱xgüxü̃ca̱x, rü mexü̃guxicatama nax naxĩnüexü̃ca̱x, rü mea napatana nadaugüxü̃ca̱x, rü guxü̃ i duü̃xü̃gümaxã namecümagüxü̃ca̱x, rü aixcüma natega naxĩnüexü̃ca̱x nax taxúema chixri Tupanaarü orechiga idexagüxü̃ca̱x.
5 Nüü̃ nadau 2:4
6 ¡Rü ngẽxgumarüxü̃ ta meama yaxucu̱xẽgü i ngẽma ngextü̱xücügü nax aixcüma mea naãẽxü̃ nacuáãcüma namaxẽxü̃ca̱x!
7 ¡Rü cumax, Pa Títox, rü name i mea nape̱xewa cumaxü̃ i guxü̃ma i ngẽma yaxõgüxü̃ nax ngẽmaãcü wüxi i norü cua̱xruxü̃ i mexü̃ quixĩxü̃ca̱x! Rü ngẽxguma cunangúexẽẽgu, rü cunaxwa̱xe i mexü̃gu curüxĩnüãcüma cunangúexẽxẽ rü tama ĩnücaãcüma namaxã nüxü̃ quixu i ngẽma ore.
8 Rü ngẽxguma ngẽmaãcü mea cunangúexẽẽgu i ngẽma ore i mexü̃, rü taxúetama texé chixri nachiga tidexa. Rü ngẽxguma ya yíxema chixri tachiga idexagüchaü̃xe rü tá taxãnee erü taxucürüwa ta̱xacürü chixexü̃xü̃ tixugü i tachiga.
9 ¡Rü meama yaxucu̱xẽgü i ngẽma yaxõgüxü̃ i mugüruxü̃ ixĩgüxü̃! ¡Rü namaxã nüxü̃ ixu nax guxü̃guma mea norü coriga naxĩnüexü̃ca̱x, rü norü corimaxã namecümagüxü̃ca̱x, rü taguma norü corixü̃ nachoxü̃gagüxü̃ca̱x!
10 Rü tama name i norü coriaxü̃́ nangĩ̱xgü, natürü nanaxwa̱xe i aixcüma meama norü corixü̃ nangechaxü̃gü rü tama nanawomüxẽẽgü. Rü ngẽxguma ngẽmaãcü namaxẽgu, rü guxü̃ma i togü i duü̃xü̃gü rü tá nüxü̃ nadaugü nax aixcüma namexẽchixü̃ i ngẽma ore i duü̃xü̃güxü̃ namaxã ingúexẽẽxü̃ nachiga ya Tupana ya tórü Maxẽxẽẽruxü̃.
11 Tupana rü poraãcüxüchima tamaxã namecüma, rü yemaca̱x núma nanamu ga Nane nax guxü̃ma i duü̃xü̃güaxü̃́ nangẽxmaxü̃ca̱x i maxü̃ i taguma gúxü̃.
12 Rü Tupana rü tamaxã namecüma rü ngẽmawa nüxü̃ tacua̱x nax namexü̃ nax nüxü̃ rüxoexü̃ i ñoma i naanecüã̱xarü ngúchaü̃gü rü guxü̃ma i togü i chixexü̃gü i nape̱xewa ixügüxü̃. Rü ngẽma Tupana taxca̱x üxü̃ tüxü̃ nangu̱xẽxẽ nax mea yigümaxã icua̱xgüãcüma duü̃xü̃güpe̱xewa rü Tupanape̱xewa mea imaxẽxü̃ i ñoma i naanewa.
13 Rü name nax ngẽmaãcü mea imaẽxü̃ ñu̱xma nax ínangu̱xẽẽgüxü̃ nax nataeguxü̃ ya Ngechuchu ya Cristu ya tórü Maxẽxẽxẽruxü̃ ya tórü Tupana ya tacü ixĩcü.
14 Rü nüma ga Ngechuchu rü taxca̱x nayu nax tüxü̃ ínanguxü̃xẽẽxü̃ca̱x nawa i guxü̃ma i chixexü̃, rü mea tüxü̃ yamexẽẽgüxü̃ca̱x nax norü duü̃xü̃gü ixĩgüxü̃ca̱x rü guxü̃guma mexü̃ ixügüxü̃ca̱x.
15 Rü ngẽma ore tá nixĩ i Tupanaarü poramaxã duü̃xü̃güxü̃ namaxã cungúexẽẽxü̃ rü nüxü̃́ cunangúchaü̃xẽẽxü̃ rü namaxã cunaxucu̱xẽxü̃ nax Tupanaca̱x namaxẽxü̃ca̱x. Rü tama name nax texé cuxü̃ oxü̃.
