Tito 3:1-15
3 Rü ngẽma yaxõgüxü̃, ¡rü namaxã nüxü̃ ixu nax nachixü̃anearü ãẽ̱xgacügüga naxĩnüexü̃ rü guxü̃ma i ngẽma togü i ãẽ̱xgacügüga naxĩnüexü̃ca̱x! ¡Rü yaxucu̱xẽgü nax ínamemaregüxü̃ca̱x nax naxügüã̱xü̃ca̱x i guxü̃ma i ngẽma mexü̃ ixĩxü̃!
2 Rü tama name i texéchiga chixri nidexagü rü texémaxã nanue. Natürü name nixĩ i guxü̃ i duü̃xü̃gümaxã namecümagü, rü guxü̃ i duü̃xü̃güxü̃ nangechaü̃gü. Rü tama name i nügü nicua̱xüü̃gü.
3 Yerü ga ü̃pa ga yixema rü ta rü chixexü̃gu tamaxẽ, rü tama Tupanaga taxĩnüe. Rü itayarütauxe rü naguxü̃raü̃xü̃ i tórü ngúchaü̃ tamaxã inacua̱x. Rü chixexü̃gu rüxĩnüeãcüma tamaxẽ rü taxãũxãchiwa̱xegü. Rü yigütanüwa yigüchi taxaie.
4 Natürü nüma ya Tupana ya tórü Maxẽxẽxẽruxü̃ rü tüxü̃ nanawe̱x i norü mecüma rü norü ngechaü̃ naxca̱x i guxü̃ma i duü̃xü̃gü.
5 Rü woo tama ta̱xacürü mexü̃ nax ixügüxü̃, natürü tüxü̃ namaxẽxẽxẽ yerü nüxü̃́ tangechaü̃tümüü̃gü. Rü Naãxẽ ya Üünexü̃arü poramaxã tüxü̃ namaxẽxẽxẽ, rü tüxü̃́ nanayauxgü i tórü pecadugü, rü tüxna nanaxã i ngexwaca̱xü̃xü̃ i tórü maxü̃.
6 Rü Ngechuchu ya Cristu ya tórü Maxẽxẽẽruü̃gagu rü Tupana rü guxü̃ma ga norü ngúchaü̃maxã tüxna nanamu ga Naãxẽ ya Üünexü̃.
7 Rü yemaacü tamaxã namecüma rü tüxü̃ narüngü̃xẽxẽ ga Tupana nax nape̱xewa imexü̃ca̱x rü nayauxgüxü̃ca̱x i ngẽma ãmare i maxü̃ i taguma gúxü̃ i írüngu̱xẽẽgüxü̃.
8 Rü guxü̃ma i ngẽma marü cumaxã nüxü̃ chixuxü̃ rü aixcüma nixĩ. Rü ngẽmaca̱x chanaxwa̱xe i guxü̃guma nüxü̃ quixu i ngẽma ore nax aixcüma mexü̃ naxügüxü̃ca̱x i ngẽma duü̃xü̃gü i Tupanaaxü̃́ yaxõgüxü̃. Erü ngẽma ore rü guxü̃wama name i guxãca̱x.
9 ¡Natürü nüxna ixũgachi i ngẽma dexagü i taxuwama mexü̃, rü ngẽma oregü i nũxcümaxü̃güxü̃ i duü̃xü̃güchigamare ixĩgüxü̃! ¡Rü nüxna ixũgachi i ngẽma dexagü i duü̃xü̃gü nawa nügü ngaexü̃ rü naxca̱x nügümaxã nuexü̃ nachiga i ngẽma mugü ga Moiché ümatüxü̃! Erü guxü̃ma i ngẽma rü taxuwama name, rü natüca̱xmamare nixĩ.
10 Rü ngẽxguma chi petanüwa wüxíe ta̱xacürü ngu̱xẽẽtaemaxã ngẽma yaxõgüxü̃xü̃ titoyegu, rü name i wüxicana rüe̱xna taxree̱xpü̱xcüna tümaca̱x cuca rü tüxü̃ cuxucu̱xẽ nax tama ngexü̃ tawagüxü̃ca̱x. Rü ngẽxguma chi tama cuga taxĩnüchaü̃gu rü tanaxüamagu i ngẽma chixexü̃ rü name i noxtacüma tüxü̃ ícumuxũchi natanüwa i ngẽma yaxõgüxü̃.
11 Erü ngẽma chixexü̃ i taxüxü̃wa tá nango̱x nax tachixeãẽxü̃ ya yíxema duü̃xẽ, rü tümaarü pecadugagutama nixĩ i tapoxcuxü̃.
Títoxü̃ naxuxcu̱xẽ ga Pauru
12 Rü ngẽxguma cuxü̃tawa chanamuxgu i Artéma rü ẽ̱xna Tíquicu, rü chanaxwa̱xe i paxa Nicaporíchiuwa cuxũ nax choxü̃ ícuyadauxü̃ca̱x. Erü ngéma tá nixĩ i chanangupetüxẽẽxü̃ ya yimá tauemacügü ya nagu nagáuanecü.
13 Rü chanaxwa̱xe i nüxü̃ curüngü̃xẽxẽ i Chená i poxü̃ruxü̃ i Rómaarü mugüxü̃ cuáxü̃, rü Apóru nax paxa núma naxĩxü̃ca̱x. Rü chanaxwa̱xe i nüxna cunaxã i norü namawaxü̃ nax taxuxü̃ma nüxü̃́ taxuxü̃ca̱x.
14 Rü ngẽma taenexẽgü i yaxõgüxü̃, rü name nixĩ i naxca̱x nangúe nax mexü̃ naxügüxü̃ rü togüxü̃ nangü̃xẽẽgüxü̃ ega ta̱xacü nüxü̃́ taxu̱xgux. Rü ngẽmaãcü i ngẽma togü rü tá nayaxõgü.
Pauru rü wenaxarü Títoxü̃ narümoxẽ rü naxca̱x ínaca nax Tupana nüxü̃ rüngü̃xẽẽxü̃ca̱x
15 Rü guxü̃ma i taenexẽgü i nua chauxü̃tawa ngẽxmagüxü̃ rü cuxü̃ narümoxẽgü. Rü ngẽxgumarüxü̃ ta i choma rü chanaxwa̱xe i nüxü̃ curümoxẽ i taenexẽgü i yaxõgüxü̃ i cuxü̃tawa ngẽxmagüxü̃. Rü chanaxwa̱xe ya Tupana poraãcü pexü̃ narüngü̃xẽxẽ i guxãma i pemax.
