Zacarías 13:1-9
13 Nüma ya Cori ya Tupana rü ñanagürü ta: —Ngẽma ngunexü̃gu rü tá ningẽnaxü̃ i wüxi i dexáarü chuchuxü̃ nax ngẽmawa Dabítaagü rü Yerucharéü̃cüã̱xgü nügü iyauxgüxü̃ca̱x i norü pecadugü rü norü ãũãchixü̃gü.
2 Rü guxü̃wama i ñaa nachixü̃anewa rü tá ichayanaxoxẽxẽ i woo i naégagü i ngẽma tupananetachicüna̱xãgü nax ngẽmaãcü tama nüxü̃ yacua̱xüü̃güxü̃ca̱x i duü̃xü̃gü. Rü ñaa nachixü̃anewa rü ngẽxgumarüxü̃ tá ta ichayanaxoxẽxẽ i ngẽma tupananetagüarü orearü uruü̃gü rü guxü̃ma i chixexü̃ i naãẽgü. Rü choma ya Cori ya Tupana nixĩ i ngẽma ñachaxü̃.
3 Rü ngẽxguma chi tangexmagu ya wüxi ya Tupanaarü orearü uruxü̃neta i nüxü̃ ixuxechaxü̃ i ore i tama Tupanaarü ore ixĩxü̃, rü tümanatü rü tümaé tá ñanagürügü tüxü̃: “Cuma rü name nax cuyuxü̃ erü ngẽma ore i nüxü̃ quixuxü̃ rü doramare nixĩ rü tama aixcüma Cori ya Tupanaarü ore nixĩ!” ñanagürügü. Rü tümanatü rü tümaé tátama tüxü̃ nacana i ngẽxguma tügü tixuxgu nax Tupanaarü orearü uruxü̃ tixĩxü̃.
4 Rü ngẽma ngunexü̃gu rü ngẽma orearü uruü̃günetagü rü tá naxãnee nax nüxü̃ yaxugüxü̃ i ngẽma nanegüwa nüxü̃ nadaugüxü̃ erü doramare nixĩ. Rü taxũtáma Tupanaarü orearü uruü̃güchiru i carnérucha̱xmüü̃naxca̱xgu nicu̱x nax ngẽmaãcü doramare ixĩxü̃ i orexü̃ yaxuxü̃ca̱x.
5 Rü wüxichigü rü tá ñanagürü: “Choma rü tama orearü uruxü̃ chixĩ rü chabuxgutama naanewa chapuracü”, ñanagürü tá.
6 Rü ngẽxguma texé nüxna cagu: “¿Rü tü̱xcüü̃ cuwitüxüne?” rü nüma rü ñaãcü tá tüxü̃ nangãxü̃: “Chomücüpatagu choxü̃ nawigü” —ñanagürü.
Nüma ya Cori nixĩ ya chorü Tupana ixĩcü
7 Rü Cori ya Tupana ya Guxãxétüwa Ngẽxmacü rü ñanagürü: —¡Pa Tara i Taxrewa Ãmaguxü̃x, rü naxca̱x ixũ i chorü carnéruarü dauruxü̃ rü ngẽma chorü ngü̃xẽẽruxü̃! ¡Rü yama̱x ya yima carnéruarü dauruxü̃ nax nawoonexü̃ca̱x i carnérugü! Rü choma rü tá chanadai i ngẽma carnéruxacügü.
8 Rü guxü̃ma i ñaa nachixü̃anewa maxẽxü̃ i duü̃xü̃gü rü ngẽma norü tomaepü̱xarü üyetanüwa rü taxre i üye tá nayue. Rü wüxi i norü üyexicatama tá namaxẽ.
9 Rü ngẽma duü̃xü̃gü i íyaxügüxü̃ rü tá nüxü̃ chaxü, ñoma diẽrumü i üxüwa idexexü̃ nax ínayixü̃ca̱x i norü ãũãchixü̃rüxü̃. Rü ñoma úiru i üxüwa idexexü̃ nax ínayixü̃ca̱x i norü ãũãchixü̃rüxü̃ tá nüxü̃ chaxü i ngẽma duü̃xü̃gü. Rü ngẽxguma i nümagü rü tá choxna nacagüe rü choma rü tá chanangãxü̃. Rü ñachagürü tá: “Nümagü rü chorü duü̃xü̃gü nixĩgü”, ñachagürü. Rü nümagü rü ñanagürügü tá: “Nüma ya Cori rü tórü Tupana nixĩ”, ñanagürügü tá. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
