Zacarías 14:1-21
14 Rü marü ningaica i ngẽma ngunexü̃ i nagu Cori ya Tupana tá cuxü̃ poxcuxü̃, Pa Yerucharéü̃cüã̱xgüx. Rü ngẽxguma ínanguxgu, rü perü uanügü rü pepe̱xewa tátama nügü nayanu i perü ngẽmaxü̃gü i pexna napuxü̃xü̃.
2 ¡Rü dücax! Pa Yerucharéü̃cüã̱xgüx, rü ngẽma ngunexü̃gu rü nüma ya Cori ya Tupana rü tá guxü̃ i nachixü̃anecüã̱xgüxü̃ nangutaque̱xexẽxẽ nax pemaxã nügü nada̱i̱xü̃ca̱x. Rü nagu tá nachocu ya yima perü ĩane, rü wüxichigü ya ĩpatagü rü tá nanadeãcu. Rü ngea̱xgü rü tá tüxü̃ ínayauxü̃ rü tá tümamaxã namaxẽ. Rü ngãxü̃ i petanüxü̃ rü tá nayagagü. Rü ngẽma norü to i ngãxü̃xica tá ngéma nayaxügü.
3 Natürü ngẽmawena i nüma ya Cori ya Tupana rü tá ngẽma nachixü̃anegümaxã nügü nadai ñoma churaragü norü uanügümaxã nügü daixgurüxü̃.
4 Rü ngẽma ngunexü̃gu rü nüma ya Cori ya Tupana rü nagu tá nachi ya yima Oribuarü Ma̱xpǘne ya Yerucharéü̃arü to̱xma̱xtawa ngẽxmane i norü éstecüwawa. Rü tá narüngüte ya yima ma̱xpǘne. Rü wüxi i norü ngãxü̃ rü tá nórtewaama naxũgachi rü ngẽma to i norü ngãxü̃ rü tá súrwaama naxũgachi. Rü ngẽmaãcü tá nango̱x i wüxi i taxü̃ i ngate i éstewaama ne daxü̃ rü oéstewaama daxü̃.
5 Rü pema rü ngẽma ngategu tá pibuxmü nax pixüxü̃ca̱x. Erü ngẽma ngate rü tá nida ñu̱xmata Acháxwa nangu i norü tocüwawa ya yima ma̱xpǘne. Rü ngẽmaãcü tá pibuxmü naxrüxü̃ ga perü o̱xigü ga yexguma ĩã̱xãchianecha̱xwa nabuxmügu ga yexguma Uchía ãẽ̱xgacü ixĩxgu ga Yudáanewa. Rü Cori ya Tupana rü tá núma naxũ namaxã i guxü̃ma i ngẽma üünegüxü̃.
6 Rü ngẽma ngunexü̃gu rü taxũtáma nagáuane, rü taxũtáma nangẽxma i gáuxü̃te̱xe.
7 Rü ngẽma tá nixĩ i wüxi i ngunexü̃ i mexẽchixü̃ i tama to i ngunexü̃maxã nawüxiguxü̃. Rü Tupanaxicatama nüxü̃ nacua̱x i ñuxãcü tá nax yixĩxü̃ i ngẽma ngunexü̃. Rü ngẽma ngunexü̃ rü taxũtáma nangẽxma i chütaxü̃, erü guxü̃gutáma nangóoneecha.
8 Rü ngẽxguma rü Yerucharéü̃wa tá ne naya̱x i wüxi i dexá i mechiüxü̃ i woo mucü ínguxgu rü woo taunecü ínguxgu iyáxü̃. Rü ngãxü̃ i ngẽma dexá rü tá Már i Ngearü Maxü̃ã́xü̃wa naya̱x. Rü ngẽma to i norü ngãxü̃ i dexá rü tá Már i Mediteráneuwa naya̱x.
9 Rü ngẽma ngunexü̃gu rü nüma ya Cori ya Tupana rü ãẽ̱xgacü tá nixĩ nawa i ñoma i naane. Rü nüxica tátama nixĩ ya Tupana yixĩxü̃ rü nataxutama i to i naéga i duü̃xü̃gü nüxü̃ icua̱xüü̃güxü̃.
10 Rü guxü̃ma i nachixü̃ane rü naane i metachinüxü̃ tá nayanguxuchi. Rü Guebáwa tá inaxügü rü ñu̱xmata Rimóü̃wa nangu nax naane i meama i weanexü̃ yixĩxü̃ i Yerucharéü̃arü súrwa ngẽxmaxü̃. Rü Yerucharéü̃ rü máxpü̱xanexü̃wa tá nangẽxma. Rü duü̃xü̃gü rü tá ngẽxma naxãchiü̃gü. Rü Bẽyamíü̃arü ĩã̱xwa inaxügü nax yaxüchixü̃güxü̃ ñu̱xmata ngẽma nüxíraxü̃xü̃ i ĩã̱xwa nangu rü ñu̱xmata naxtapü̱x íyapoõchixü̃ i ĩã̱xwa nangu nax yaxüchixü̃güxü̃. Rü ngéma rü tá nida ñu̱xmata Ananéarü dauxü̃taechicawa nangu. Rü ngéma tá nidaama ñu̱xmata ãẽ̱xgacüarü úbaarü ma̱i̱xgütüxü̃wa nangu.
11 Rü yima ĩane ya Yerucharéü̃ rü tá namuarü duü̃xü̃güã̱x, rü taxũtáma wenaxarü norü uanügü nagu napogüe. Rü ngẽma duü̃xü̃gü i nagu ãpatagüxü̃ rü tá taãẽxãcü nawa namaxẽ.
12 Natürü ga yema nachixü̃anegü ga Yerucharéü̃cüã̱xgüxü̃ daixü̃ rü Cori ya Tupana tá poraãcü nanapoxcue. Rü maxãcü tátama niyixemachi, rü naxetüchicawa tá niyixe, rü naã̱xwa rü tá niyixarü conüã̱xgü.
13 Rü ngẽma ngunexü̃gu ya Cori ya Tupana rü tá nanamuü̃exẽxẽ i ngẽma togü i nachixü̃anecüã̱xgü. Rü wüxichigü rü tá namücüchacüüwa nichü̱xüx nax nügü nada̱i̱xü̃ca̱x.
14 Rü ngẽxguma i ngẽma Yudáanecüã̱xgü rü Yerucharéü̃wa tá naxĩ nax ngẽma nachixü̃anegü i Yerucharéü̃na ngaicamagüxü̃maxã nügü nada̱i̱xü̃ca̱x. Rü tá nüxna nanapuxü̃ i muxü̃ma i norü ngẽmaxü̃gü ngẽxgumarüxü̃ i norü diẽrumü rü norü úiru rü naxchirugü.
15 Rü ngẽma da̱xaweane i namaxã ida̱xawexü̃ i norü uanügü rü ngẽmatátama nixĩ i norü cowarugü namaxã ida̱xaweexü̃. Rü ngẽxgumarüxü̃ tá ta namaxã nida̱xawe i norü caméyugü rü norü mulagü rü norü búrugü rü guxü̃ma i ngẽma togü i naxü̃nagü i ngẽma ínapegüxü̃wa nüxü̃́ ngẽxmagüxü̃.
16 Rü yema uanügü ga ü̃pa Yerucharéü̃maxã nügü daixü̃ rü íyaxügüxü̃, rü guxcüma ya taunecügu tá Yerucharéü̃wa naxĩĩxü̃ nax Ãẽ̱xgacü ya Cori ya Tupana ya Guxãxétüwa Ngẽxmacüxü̃ nayanacua̱xüü̃güxü̃ca̱x rü naxüchigagüãxü̃ca̱x i düxenüchigaarü peta.
17 Rü ngẽxguma chi ngexü̃rüüxü̃ i nachixü̃ane i ñoma i naanewa ngẽxmagüxü̃ tama Cori ya Tupana ya Guxãxétüwa Ngẽxmacüarü cua̱xüü̃wa naxũxgu i Yerucharéü̃wa, rü Tupana rü taxũtáma norü naanegu nanapuxẽxẽ.
18 Rü ngẽxguma Equítuanecüã̱xgü rü tama ngéma naxĩxgu, rü Cori ya Tupana rü taxũtáma norü naanegu nanapuxẽxẽ. Rü ngẽxgumarüxü̃ ta i ngexü̃rüüxü̃ i to i nachixü̃ane i tama düxenügüchigaarü petawa ũxü̃ rü Tupana rü tá da̱xaweane naxca̱x ínanguxẽxẽ.
19 Rü ngẽmaãcü tá nixĩ nax napoxcuxü̃ i Equítuanecüã̱xgü i duü̃xü̃gü rü ngẽma to i nachixü̃anecüã̱xgü i duü̃xü̃gü i tama düxenügüchigaarü petawa ĩxü̃.
20 Rü ngẽma ngunexü̃gu rü ngẽma cowarugünaawa rütugüxü̃ i campanaxacügü rü ñaxü̃ tá nagu naxümatü Coriarü Ixĩxü̃, ñaxü̃. Rü ngẽma buetaregü i Tupanapata ya taxü̃newa ngẽxmagüxü̃ rü tá nixüüne ngẽma tacháũgü i ãmarearü guruü̃pe̱xegu nuxü̃rüxü̃.
21 Rü guxü̃ma i ngẽma buetaregü i Yerucharéü̃wa rü Yudáanewa ngẽxmagüxü̃, rü Cori ya Tupana ya Guxãétüwa Ngẽxmacüarü tá nixĩgü. Rü texé ya naxü̃na Tupanaca̱x imáxẽ, rü yimawa tá tanamuxra i ngẽma namachi i Cori ya Tupanana taxãxü̃. Rü ngẽma ngunexü̃gu rü marü taxũtáma Cori ya Tupana ya Guxãxétüwa Ngẽxmacüpata ya taxü̃newa texé ta̱xacümaxã ngéma tataxe.
