Zacarías 3:1-10
3 Rü yexguma chango̱xetügu rü nüma ga Cori ya Tupana rü choxü̃ nanawe̱x ga Yochué ga chacherdótegüarü ãẽ̱xgacü. Rü nüma ga Yochué rü Cori ya Tupanaarü duü̃xü̃ ga daxũcüã̱xpe̱xegu nachi. Rü Yochuéarü tügünecüwawa nayexma ga Chataná ga nüxü̃ ixugüchaü̃xü̃.
2 Rü nüma ga yema Tupanaarü duü̃xü̃ i daxũcüã̱x rü Chatanáxü̃ ñanagürü: —¡Nüma ya Cori ya Tupana cuxü̃ nangax! ¡Rü yimátama Cori ya Tupana ya Yerucharéü̃xü̃ ngechaxü̃cü rü cuxü̃ nangax! Erü ñaa yatü rü ñoma wüxi ya ã́xwe ya üxüétüwa yaxuxcürüxü̃ Babiróniawa taeguxü̃ nixĩ —ñanagürü.
3 Rü nüma ga Yochué rü poraãcü naxãũãchichiru rü yemaacü Cori ya Tupanaarü duü̃xü̃pe̱xegu nachi.
4 Rü yexguma ga yema daxũcüã̱x ga duü̃xü̃ rü noxrü ngü̃xẽẽruü̃güxü̃ namu rü ñanagürü: —Ngẽma ãũãchixü̃ i Yochuéchiru ¡rü ípenacuxuchix! —ñanagürü. Rü ñu̱xũchi Yochuéxü̃ ñanagürü: —¡Dücax! rü marü cuxna chanayaxu i ngẽma curü pecadu rü ñu̱xma rü tá nga̱xãẽchirugu cuxü̃ chicu̱xẽxẽ —ñanagürü.
5 Rü yexgumatama norü ngü̃xẽẽruü̃güxü̃ namu nax Yochuéxü̃ yanaixerugüxü̃ca̱x namaxã ga wüxi ga ngemataxü̃ ga naxchirutachinü. Rü yemawena rü nga̱xãẽchirugu nayacu̱xẽẽgü. Rü nüma ga yema daxũcüã̱x rü yexmatama nachiecha.
6 Rü ñu̱xũchi ga nüma ga Cori ya Tupanaarü duü̃xü̃ ga daxũcüã̱x rü Yochuéxü̃ ñanagürü:
7 —Cori ya Tupana ya Guxãétüwa Ngẽxmacü rü ñanagürü cuxü̃: “¡Chaucümagu ixũ rü yanguxẽxẽ i guxü̃ma i ngẽma cumaxã nüxü̃ chixuxü̃! Rü ngẽxguma ngẽmaãcü cunaxü̱xgu, rü cuxme̱xgu tá chanaxǘ ya chopata ya taxü̃ne rü naa̱xtü nax nüxna cudauxü̃ca̱x. Rü tá cuxna chanaxã i cuchica i natanüwa i ñaa chorü duü̃xü̃gü i daxũcüã̱x i choxü̃́ puracüexü̃.
8 ¡Rü dücax, Pa Yochuéx, rü mea rüxĩnü i cuma nax chacherdótegüarü ãẽ̱xgacü quixĩxü̃! Rü ngẽxgumarüxü̃ ta i cumücügü rü name nax mea inaxĩnüexü̃, erü pema rü wüxi i cua̱xruxü̃ pixĩgü nachiga ya yíxema tá nua chanaxũxẽxẽcü. Erü paxa tá nua petanüwa chanamu i wüxi i choxrü duü̃xü̃ i Dabítaxa i perü ãẽ̱xgacü tá ixĩcü.
9 Rü chomax rü Yochuépe̱xegu chanaxǘ ya wüxi ya nuta ya 7 i nacüwa nüxü̃́ ngẽxmacü. Rü chomatátama yima nutagu chanaxümatü i ore. Rü ñu̱xũchi i choma rü wüxitatama i ngunexü̃gu nüxna chanayaxu i norü pecadu i ñaa nachixü̃ane.
10 Rü ngẽxguma ngẽma ngunexü̃wa nanguxgu rü tá pegüna pixugü nax perü úbagüpechitawa rü perü igunecügüpechitawa pegümaxã petaãẽgüxü̃ca̱x. Rü choma ya Cori ya Tupana ya Guxãétüwa Ngẽxmacü nixĩ i nüxü̃ chixuxü̃ i ngẽma” —ñanagürü.
