Zacarías 5:1-11
5 Rü wena chango̱xetü rü nüxü̃ chadau ga wüxi ga popera ga ãmatüxü̃ ga dauxü̃gu chüxüxü̃.
2 Rü yexguma ga yema Tupanaarü orearü ngeruxü̃ i dauxü̃cüã̱x rü choxna naca rü ñanagürü: —Pa Chacaríax, ¿ta̱xacü yixĩxü̃ i ngẽma nüxü̃ cudauxü̃? —ñanagürü. Rü yexguma ga choma rü chanangãxü̃ rü ñacharügü: —Nüxü̃ chadau i wüxi i popera i ãmatüxü̃ i dauxü̃gu chü̱xüxü̃. Rü ngẽma popera rü 9 metru nixĩ i norü ma̱x, rü 4 metruarü ngãxü̃ nixĩ i norü tatachinü —ñacharügü.
3 Rü yexguma ga nüma rü ñanagürü: —Ngẽma popera rü nachiga nixĩ i ngẽma poxcu i guxü̃ma i ñoma i naaneca̱x tá ínguxü̃. Rü wüxicüwagu naxümatü i norü poxcu i ngẽma ngĩ́xta̱xagüxü̃. Rü ngẽma tocüwagu naxümatü i norü poxcu i ngẽma Tupanaégagu idorata̱xagüxü̃.
4 Rü ngẽma poxcu rü tá ngẽma ngĩta̱xagüxü̃patawa nangu rü ngẽma Tupanaégagu idorata̱xagüxü̃patawa nangu. Rü ngéma poxcu rü napatawa tá nangẽxma ñu̱xmatáta yanaxo ya yima napataarü omütagü rü nutagü. Rü Tupana ya Guxãétüwa Ngẽxmacü nixĩ i naxueguxü̃ i ngẽma —ñanagürü.
Wenaxarü nango̱xetü ga Chacaría rü nüxü̃ nadau ga wüxi ga pexchi ga tacü rü wüxi ga nge nawa yexmacü
5 Rü yemawena ga yema Tupanaarü orearü ngeruxü̃ i daxũcüã̱x ga chomaxã idexaxü̃ rü cha̱u̱xca̱x nixũ rü ñanagürü choxü̃: —¡Dücax, nüxü̃ nadau i ngẽma ñu̱xma ngóxü̃! —ñanagürü.
6 Rü yexguma ga choma rü nüxna chaca rü ñacharügü: —¿Ta̱xacü nixĩ i ngẽma? —ñacharügü. Rü yexguma ga nüma rü choxü̃ nangãxü̃ rü ñanagürü: —Ngẽma nüxü̃ cudauxü̃ i pexchi i taxü̃ rü tríguarü nguruxü̃ nixĩ, rü ngẽmamaxã nixĩ ya Tupana inangugüaxü̃ i norü pecadugü i ngẽma duü̃xü̃gü i ñoma i naanewa maxẽxü̃ —ñanagürü.
7 Rü gumá pexchi rü nüxü̃́ nayexma ga naxã́taxü̃ ga plomunaxca̱x. Rü nüma ga Tupanaarü duü̃xü̃ rü nayawãxna ga gumá pexchi rü yéma aixepewa nüxü̃ chadau ga wüxi ga nge ga yéma rütoxü̃.
8 Rü yexguma nüma ga yema Tupanaarü orearü ngeruxü̃ i daxũcüã̱x rü choxü̃ ñanagürü: —Ngẽma nge rü ngẽma pecaduchiga nixĩ —ñanagürü. Rü yexguma ga yema nge rü íixũxũchaü̃, natürü nüma ga yema Tupanaarü orearü ngeruxü̃ rü ngĩxü̃ nimucuchiama rü ngĩxü̃ narüngataxü̃ namaxã ga yema naxã́taxü̃ ga plomunaxca̱x.
9 Rü choma rü wena chadaunagü rü nüxü̃ chadau ga taxre ga ngexü̃ ga yéma ngóxü̃. Rü nümagü rü ñoma cowaruxü̃ nixãxpe̱xatü. Rü naxügü rü nayangegü ga gumá pexchi.
10 Rü nüxna chaca ga yema Tupanaarü duü̃xü̃ ga daxũcüã̱x ga chomaxã idexaxü̃ rü ñacharügü: —¿Ngextá nanangegü ya yima pexchi? —ñacharügü.
11 Rü yexguma nüma ga yema Tupanaarü orearü ngeruxü̃ i daxũcüã̱x rü choxü̃ nangãxü̃ rü ñanagürü: —Babiróniaanewa nanangegü erü ngẽxma tá nanaxügü ya wüxi ya napata. Rü ngẽxguma marü yanguxgu ya yima napata, rü wüxi i norü nachicaétügu tá nanaxǘgü ya yima pexchi —ñanagürü.
