Zacarías 7:1-14
7 Rü yexguma ãgümücü ga taunecü inguxgu nax Pérchiaarü ãẽ̱xgacü yixĩxü̃ ga Daríu, rü meama norü 9 ga tauemacü ga Quichéugu* ãégacüarü ãgümücü ga ngunexü̃gu, rü Cori ya Tupana rü norü Orearü uruxü̃ ga Chacaríamaxã nidexa.
2 7:2-3 Rü yexgumaxü̃cüü rü yema duü̃xü̃gü ga Betéwa maxẽxü̃ rü nanamu ga Charéche rü Requéü̃-mérex namaxã ga ñuxre ga norü duü̃xü̃gü nax Tupana ya Guxãétüwa Ngẽxmacüpata ya taxü̃newa naxĩxü̃ca̱x nax yema Tupanaarü orearü uruü̃güna rü chacherdótegüna nacagüxü̃ i aurechiga. Rü ñanagürügü: —¿Namexü̃ yixĩxü̃ nax norü wüxime̱e̱xpü̱xarü tauemacügu torü ngechaü̃maxã taxaurexü̃, yimá gucü ya taunecügu taxügüxü̃rüxü̃? —ñanagürügü.
3 Nüü̃ nadau 7:2
4 Rü yexguma ga Cori ya Tupana ya Guxãétüwa Ngẽxmacü rü chomaxã nidexa rü ñanagürü:
5 —Pa Chacaríax, ¡namaxã nüxü̃ ixu i guxü̃ma i duü̃xü̃gü i ñaa nachixü̃anewa maxẽxü̃ rü ñu̱xũchi ya chacherdótegü rü ñacurügü nüxü̃!: “Ñu̱xma i pema rü marü 70 ya taunecü pingegü nax norü wüxime̱e̱xpü̱x ya tauemacügu rü norü 7 ya tauemacügü pexauregüxü̃, natürü tama aixcüma cha̱u̱xca̱x nixĩ ga pexauregüxü̃.
6 Yerü yexguma pechibüegu rü pexaxegügu rü pegüguxicatama perüxĩnüeãcü penaxü” —ñanagürü.
7 ¿Rü ñaa ore rü tama ẽ̱xna yematama ore yixĩxü̃ ga ü̃pacürüwa Cori ya Tupana norü orearü uruü̃güwa pemaxã nüxü̃ ixuxü̃ ga yexguma Yerucharéü̃ rü mexü̃wa yexmagu rü duü̃xü̃gümaxã napaxgu rü yexgumarüxü̃ ta ga guma ĩanegü ga Yerucharéü̃cüwawa yexmagüne rü yema Négueanewa rü yema doxonexü̃wa duü̃xü̃gümaxã napaxgu?
Tama Tupanaga naxĩnüexü̃gagu rü to ga nachixü̃anewa nanagagü
8 7:8-9 Rü Cori ya Tupana rü norü orearü uruxü̃ ga Chacaríamaxã nidexa rü ñanagürü: —Ngẽma pexü̃́ chanaxwa̱xexü̃ nixĩ nax mea duü̃xü̃gümaxã ipecuáxü̃ rü namaxã pemecümaxü̃ rü wüxichigü pegüxü̃́ pengechaxü̃tümüxü̃güxü̃.
9 Nüü̃ nadau 7:8
10 Rü tama chanaxwa̱xe nax chixeãcü tümamaxã pixĩgüxü̃ ya yíxema yutegüxe rü yíxema taxcutagü rü yíxema to i nachixü̃anecüã̱x i petanüwa ngẽxmagüxe rü yíxema ngearü diẽruã̱xgüxe. ¡Rü taxṹ i nagu perüxĩnüexü̃ nax ñuxãcü tá pegümaxã chixexü̃ pexügüxü̃! —ñanagürü.
11 Natürü nüma ga duü̃xü̃gü rü tama naga naxĩnüe ga yema Tupanaarü ucu̱xẽ. Rü guxü̃ma rü na̱xcha̱xwa nidaugachitanü rü nügü nangauxchixẽgüxẽxẽ nax tama nüxü̃ naxĩnüexü̃ca̱x.
12 Rü ñoma nuta i diamánterüxü̃ nügü nataiarü maxü̃neã̱xgü nax tama naga naxĩnüexü̃ca̱x ga yema Tupanaarü ucu̱xẽ rü norü mugü ga Tupana ya Guxãétüwa Ngẽxmacü Naãxẽ ya Üünecüwa rü nũxcümaü̃güxü̃ ga norü orearü uruü̃gümaxã nüxü̃ ixuxü̃. Rü yemaca̱x ga Cori ya Tupana rü düxwa poraãcü namaxã nanu.
13 7:13-14 Rü ñanagürü: —Ñu̱xma nax tama chauga naxĩnüechaü̃xü̃ i ngẽxguma namaxã chidexagu, rü choma rü taxũtáma nüxü̃ chaxĩnü ega ta̱xacüca̱x choxna nacagüegu. Rü yemaca̱x ñoma buanecü ga íxã̱ũ̱xẽmacürüxü̃ düxwa yema togü ga nachixü̃anegü ga tama nüxü̃ nacua̱xgüxü̃gu chanawoone. Rü nawena ga yema norü naane rü chianexü̃xü̃ nayanguxuchi. Rü yema norü naane ga noxri namexẽchi rü nümagütama chianexü̃xü̃ nayangucuchixẽxẽ —ñanagürü ga Cori ya Tupana ya Guxãétüwa Ngẽxmacü.
14 Nüü̃ nadau 7:13
Notas
^ 7:1 Noviembre.
