Nguꞌ. Tupana nacaꞌ naoegaãẽ ngẽguma norü duü̃ü̃ nidaꞌawegu. Tupanaarü Ore tamaã nauneta: “Rü nüma ya Cori ya Tupana [ya Yeuwa] rü tá pora tüna naã ega ngúü̃ tingegügu.” (Salmo 41:3) Ngẽgumatchi ãũrima quidaꞌawegu, nhaã tamaepüꞌ i ucuꞌẽgü cuü̃ narüngü̃ẽẽ tá:

1.   Tupanacaꞌ nayumüẽ na tama nüü̃ narütchauü̃caꞌ. Ngẽguma cuyumüẽgu ‘Tupana rü tá cuü̃ nataãẽẽẽ namaã i wüi i taãẽ i meẽtchiü̃. Ngẽma taãẽ i Tupana cuna ãü̃ rü tá nüna cuü̃ ínapoü̃ i ngẽma tchieü̃ i nagu curüĩnüẽtchaü̃’ rü ngemaãcü tama nüü̃ curütchau tá.— Piripucü̃ãꞌ 4:6, 7.

2.   Meü̃gu narüĩnü. Tupanaarü Ore nhanagürü: “Ngẽguma itaãẽgu, rü ngẽma taãẽ rü nhama wüi i üüü̃ i meü̃rüü̃ niĩ, notürü ngẽguma ingetchaü̃gu rü ínarüĩ i ngẽma torü pora.” (Provérbios 17:22, Sociedad Bíblica Peruana) Name na inangiẽnü erü ngẽma rü cutaãẽẽẽ tá ngẽguma cungetchaü̃gu rü ta cuü̃ narüngü̃ẽẽ i ngẽma curü daꞌawegu.

3.   Nagu nayaõ na wipeꞌewa rü aicumaü̃tchitama name. Woo ãũrima quidaꞌawegu, ngẽguma nagu cuyaõgu na wipeꞌewa rü aicumaü̃tchitama name rü cutaãẽẽẽ tá. (Romacü̃ãꞌ 12:12) Tupanaarü Ore nüü̃ niu na wipeꞌewa ‘guü̃ma i ngẽma ngúü̃ rü marü inayarüo.’ (Apocaríchiu 21:4) Rü duturugü taucurüwama nanameẽgü i guü̃ma i daꞌawegüü̃, notürü Tupana nayarüoẽẽ tá i guü̃ma i daꞌawegüü̃. Wüi cuaꞌruü̃, Tupanaarü Ore nüü̃ niu na wipeꞌewa torü ‘natchaꞌmüü̃gü rü narüme rü wüi i buetchaꞌmüü̃rüü̃ niĩ.’ — 2 Reis 5:14.

 Wüi ore i ngẽmatchiga: Yeuwaarü Orearü Uruü̃gü Tupanagu nayaõgü, notürü ega idaꞌawegügu duturuwa naĩgü. (Marcu 2:17) Notürü tama wüi üü cucaꞌ nideagü, erü duturugürica duü̃ü̃gücaꞌ üü nüü̃ nauneta.