Tama. Rü meã nangugü rü noricürüwa naümatüü̃ i Tupanaarü Ore rü nüü̃ nanaweꞌ na nawa tama natoraü̃ẽẽ woo to naátügügu nayawügütchigü ga papirugügu rü nutagügu i natchaꞌmügügu.

 Muü̃tchiü̃ma natchipetagü i Tupanaarü Oretchiga inayangaugü. Norü nangẽmaü̃ irarüwa natoraü̃ü̃ naümatügüü̃, rü ngẽma nüü̃ nanaweꞌ na yeguma i Tupanaarü Ore nayawügütchigügu iĩü̃ nümaü̃ tchieü̃ nangupetüü̃. Nümaü̃gü yatoraü̃ẽü̃ nangẽma, rü nhaã tama nayatoraü̃ẽ i taꞌacü naümatüü̃ ngẽmaü̃. Notürü ngẽma taꞌacü nüü̃ idau rü na nümaü̃gü i duü̃ü̃gü niĩ nawaꞌegüü̃ nayatoraü̃ẽü̃ i taꞌacü Tupanaarü Ore nüü̃ niuü̃. Nüü̃ nadau tare cuaꞌruü̃gü:

1.   Rü 1 Juã́ũ 5:7wa, rü nümaü̃ Tupanaarü Orearü traduçãogü nhanagürü: “Rü dauü̃wa, rü Tanatü, rü Ore rü Naãẽ i Üüneü̃, rü ngẽma tamaẽꞌpüꞌ wüitama iĩü̃.” Notürü nũcüma ore i ümatüü̃ i aicumaü̃ iĩü̃ nanaweꞌ na ngẽma oregü rü tama noricürüwa naümatüü̃. Rü naümatüü̃ narümaꞌmae ngẽma oregü. a Rü ngẽmaãcü traduçãogü i aicumaü̃ weꞌguü̃ ínanawoü̃ ngẽma oregü.

2.   Mueꞌpüꞌcüna i Tupanaéga i noricürüwa ümatüü̃ i Bíbliawa nayemaü̃. Notürü muü̃ma i Bíbliaarü traduçãogü rü Tupanaéga nanaütchicüügü, cuaꞌãtchiruü̃, “Cori” urü “Tupana”.

 Nhuꞌmata rü nüü̃ tayangau i nũcümaü̃gü i poperagü ümatüü̃, ega nangugügu, natautcha nüü̃ idau norü gutchinü nawa ngẽmaü̃. b Ngẽguma ngẽma meã nangugügu, rü taꞌacü nanangúe natchiga i Tupanaarü Ore weꞌguü̃ niĩü̃?

•   Rü natchiga i Ore Ümatüü̃ i Hebraicogawa (na naãégaü̃ ta “Velho Testamento”), rü nguꞌẽẽtaeruü̃ William Henry Green nhanagürü: “Aicumaãcü nüü̃ tchiu na natauma to poperagü na nũcümaü̃ ümatüü̃ na nhama Tupanaarü Orerüü̃ na weꞌguü̃ niĩ.”

•   Rü natchiga i Ore Ümatüü̃ i Gregugawa, urü “Novo Testamento”, rü nũcümaü̃caꞌ daucü i Tupanaarü Orearü Frederick Bruce naümatüü̃: “Nangẽma yeera ngẽmaü̃gü naweꞌü̃ na Novo Testamento weꞌguü̃ niĩ na togü poperagü na nawa ümatüü̃ ga yatügü guü̃wa nüü̃ nacuaꞌgüü̃ rü na duü̃ü̃gücaꞌ aicuma yiĩü̃.”

•   Sir Frederic Kenyon, wüi yatü na nũcümaü̃caꞌ daucü i Tupanaarü Oretchiga, nanaunagü na wüi duü̃ü̃ ‘na nameꞌẽgu nangẽma i Bíblia rü nüü̃ niu na ngẽma aicuma Tupanaarü Ore niĩ, na marü muü̃ma séculowa ne taĩ rü nawa i ore tama natoraü̃ẽẽ’.

•   Tupanaarü Orewa taꞌacütchiga iraéutanüü̃gü tchieü̃ naügü rü ga yatügü nayawügütchigü ga Tupanaarü Orewa naümatüü̃. c (Números 20:12, 2 Samuel 11:2-4 rü Gárataanecü̃ãꞌ 2:11-14) Nawa nüü̃ niu ga iraeutanügüü̃ tama Tupanaga naĩnüẽgü yemacaꞌ niĩ ga Tupana guma iraeutanüü̃gü napocueü̃. Rü ta nanaweꞌ ga duü̃ü̃güarü nguꞌẽẽtaegüneta nangúeẽẽü̃. (Oséias 4:2, Malaquias 2:8, 9, Mateu 23:8, 9 rü 1 Juã́ũ 5:21) Ngẽmaãcü nüü̃ nanaweꞌ na nümagü aicumaü̃ niĩ, rü guü̃ma ga yema nũcüma ümatüü̃ ga taꞌacü Bíbliawa naümatüü̃ rü tüü̃ nüü̃ nacuaꞌẽẽü̃caꞌ na aicuma i Tupanaarü Ore iĩü̃. Rü ta nümagü Tupanaarü Oreü̃ nangetchaü̃gütchire.

•   Rü Tupana yema oreü̃ yaügügu rü naãẽ i üüneü̃ niĩ ga yadeagüeü̃, eꞌna nüma nüü̃ inapoü̃ü̃ i Bíblia? d (Isaías 40:8 rü 1 Pedru 1:24, 25) Rü Nüma nanawaꞌe guü̃ma i duü̃ü̃güü̃ i nũcümaü̃wa rü nhuꞌmatáta i nhuꞌma nüü̃ narüngü̃ẽẽ. (1 Corĩ́tiucü̃ãꞌ 10:11) “Rü guü̃ma ga yema nucüma ümatüü̃ ga Tupanaãrü orewa ... rü naümatü na tüü̃ nataãẽẽẽü̃caꞌ rü tüü̃ nüü̃ nacuaꞌ ẽẽü̃caꞌ na aicuma Tupanaãrü iĩgüü̃.” — Romacü̃ãꞌ 15:4.

•   Ngetchutchu rü norü ngúeü̃gü nideagü natchipeꞌe i taꞌacü ore ümatüü̃ i Hebraicogawa nayema. Rü nayaõ na ngẽma natchipeꞌe ngegumarüü̃ nüíra ümatüü̃. Taꞌacü togü ngẽmaü̃gu nüü̃ nanaweꞌ Tupanaarü Orewa ta nüü̃ nayaõgü. — Luca 4:16-21 rü Puracügü 17:1-3.