Tama. Rü Tupanaarü Ore nüü̃ niu na Tupana nanaü naguü̃raü̃ü̃ rü naeü̃gü rü nanetügü rü werigü. a (Gênesis 1:12, 21, 25, 27 rü Apocaríchiu 4:11) Rü ta nüü̃ niu na Tupana nanaü nüíra yatü rü ngeü̃ rü naãégaü̃ rü Adãũ rü Ewa niĩ rü guü̃ma duü̃ü̃gü nawa ne naĩ. (Gênesis 3:20 rü 4:1) Rü nümaü̃ i cientistagü nanayaõ na Tupana i evoluçãogagu nanaü guü̃ma i taꞌacü nhama i naanewa ngẽmaü̃. Ngẽma naãégaü̃ evolucionismo teísta. Notürü rü Tupanaarü Ore tama nananguꞌẽẽ na Tupana i evoluçãogagu nanaü guü̃ma i taꞌcü nhama i naanewa ngẽmaü̃. Rü nümaü̃ cientistagü nangugü na nhuguãcü rü ngẽmatama espéciewa nangupetü natoraü̃. Rü Tupanaarü Ore rü nawüigu ngẽmamaã. b

•  Taꞌacüwa duü̃ü̃gügu nayaõ?

•  Rü Tupanaarü Ore nananguꞌẽẽ i evolução?

•  Nhuguãcü rü ngẽmatama espéciewa nangupetü natoraü̃ü̃, eꞌna ngẽma naweꞌ na evolução aicuma niĩ?

 Rü ngẽma duü̃ü̃gü na nayaõgü na Tupana i evoluçãogagu nanaü i guü̃ma taꞌacü nhama i naanewa ngẽmaü̃, nangẽma ĩnügü natoraü̃ü̃ natchiga nhuãcü nangupetü i ngẽma. Rü Enciclopédia Britânicawa c nanaweꞌ na evolucionismo teísta nananguꞌẽẽ na Tupana ‘seleção naturalgagu meã nanu guü̃ma i taꞌacü nhama naanewa ngẽmaü̃’.

 Yimá nananguꞌẽẽ i evolucionismo teísta bemana ngẽmagu nayaõgü:

•   Guü̃ma na maü̃ nangẽma wuitama ancestralwa ne naĩ.

•   Wüi espécie to espécie nicaꞌitchigü. Ngẽma naãégaü̃ macroevolução.

•   Guü̃ma i ngẽma rü Tupanameꞌẽwa nangẽmaü̃.

 Rü evolucionismo teísta nananguꞌẽẽ na taꞌacü Tupanaarü Ore nüü̃ yau Gênesiswa rü tama weꞌguü̃ niĩ. Notürü Ngetchutchu nananguꞌẽẽ na Gênesiswa ore rü aicuma niĩ. (Gênesis 1:26, 27, 2:18-24 rü Mateu 19:4-6) Rü Tupanaarü Ore nüü̃ yau na Ngetchutchu naü̃pa nuã Naanewa naũ, rü nüma dauü̃wa namaü̃. Rü nanatüü̃ narüngü̃ẽẽ na guü̃ma ‘i taꞌacü i nhuꞌma ngẽmaü̃ naüü̃caꞌ’. (Juã́ũ 1:3) Nhuꞌmatchi tama Tupana i evoluçãogagu nanaü i tchonigü rü werigü rü to naeü̃gü rü duü̃ü̃gü.

 Rü Tupanaarü Orewa tama nüü̃ niu nhureeꞌpüꞌcüna ngẽmatama “espéciewa” natoraü̃ü̃ ngupetüü̃. Rü ta Tupanaarü Ore tama meã namaã nüü̃ niu tüꞌcüü̃ ngẽmatama espéciewa ngupetüü̃ natoraü̃ü̃. Cuaꞌãtchiruü̃, ngẽguma naeü̃gü naãacügügu urü nanayaeẽẽgu, nhuguãcü ngẽmagu nümaü̃ natoraü̃ü̃ ngupetüü̃, rü ngẽma ta nanetügümaã. Nümaü̃ i duü̃ü̃gü ngẽma naãégaü̃ i evolução. Notürü rü ngẽma rü tama nüü̃ niuü̃tchaü̃ na ngẽma espécie to espécie nicaꞌitchigü.