Ngẽgumarüü̃ wüi nguꞌ, yeera i 90% ngetüꞌü̃cügü rü pacügü ya Brasilcü̃ãꞌ nayumüẽ, notürü 16% rica nayumüẽ wiguta guü̃ i nguneü̃gü. Rü nhuꞌre i ngẽtüꞌü̃cügü rü pacügü nagu inarüĩnüẽ: ‘Rüeꞌna yumüẽ tchoü̃ narüngümüẽẽruü̃mare urü yeera niĩ?’

•  Taꞌacü niĩ yumüẽ?

•  EꞌnaTupana aicüma tüü̃ naĩnü torü yumüẽgü?

•  Taꞌacütchiga iyumüẽgü?

•  Taꞌacü nagu narüĩnüẽ to i ngetüꞌü̃cügü rü pacügü?

 Ngẽguma iyumüẽgügu aicüma Tupanamaã ideagü ya guü̃maarü Üruü̃ iĩcü. Nagu narüĩnü taꞌacü ngema nhaü̃tchiga niĩ! Yeuwa yeeraãcü nataütchima na guãma i duẽẽgü, “notürü nüma ya Tupana rü woetama guü̃guma tüna nangaicamatchireꞌ.” (Puracügü 17:27) Rü Tupanaarü Orewa nangẽma nhaã nameetchi ore: “Tupanana pengaicamagü! Rü nüma rü tá ta pena nangaicama.”—Tiagu 4:8.

 Nhuãcü Tupanana tangaicamagü?

•   Ngẽguma iyumüẽgügu—ngemaãcü yiema rü Tupanamaã ideagü.

•   Ngẽguma Tupanaarü Orewa tanguꞌegu—ngemaãcü Tupana rü tamaã nidea.

 Ngẽguma iyumüẽgügu rü Tupanaarü Orewa tanguꞌegu tüü̃ narüngü̃ẽẽ na yeera Tupanana tangaicamagü.

 “Ngẽguma Yeuwamaã tideagügu ãũritchima tüü̃ name erü torü Tupana Guü̃arü̃ Yeera Poracü niĩ”—Jeremy

 “Ngẽguma Yeuwamaã tchiugu natchiga taꞌacü nagu tcharüĩnü yeera Yeuwana tchangaicama”—Miranda

 Woo cuma rü Tupanaü̃ cuyaõgu rü nacaꞌ cuyumüẽ, rü bemana cuca tama natautcha na nüü̃ cuyaõü̃ na Tupana aicuma cuü̃ naĩnü. Notürü Tupanaarü Ore nüü̃ niu na Yeuwa rü ‘nüü̃ naĩnü i torü yumüẽ’. (Salmo 65:2) Rü ta Tupanaarü Ore nüü̃ niu i ngema: “Rü name niĩ i Tupanameꞌẽgu penaü i guü̃ma i perü oegaãẽgü.” Tüꞌcüü̃? “Erü nüma ya Tupana rü guü̃guma pegu narüĩnü rü aicuma pena nadau.”—1 Pedru 5:7.

 Nagu narüĩnü: Eꞌna guü̃guma cumücügümaã quideaü̃? Rü name niĩ guü̃ i nguneü̃gügu Tupanamaã quideaü̃. Ngẽguma Tupanamaã quiugu rü nüü̃ niu norü naéga Yeuwa. (Salmo 86:5-7; 88:9) Rü Tupanaarü Ore nhanagürü i ngema: “Rü guü̃guma peyumuẽgü!” —1 Techarónicacü̃ãꞌ 5:17.

 “Ngẽguma tchayumüẽgu Tchaunatümaã ya Dauü̃gucü tchidea rü guü̃ma i tchaoegaãẽ namaã tchiuü̃.”—Moises

 “Rü Yeuwamaã tchidea guü̃ma i tchaãẽwa ngemaü̃ rü ngẽgumarüü̃ tchauémaã rü tchamücümaã tchideagu.”—Karen

 Tupanaarü Ore nhanagürü: “Ngẽguma woo taꞌacü peü̃ üpetügu rü guü̃guma name niĩ na Tupanamaã nüü̃ peiuü̃ i perü yumuẽwa. Rü nacaꞌ ípeca i norü ngü̃ẽẽ i ngẽguma taꞌacü peü̃́ gutchagu, rü moẽ nüna peãgü! Rü ngẽmaãcü Tupanamaã nüü̃ peiu i guü̃ma i ngẽma nüna nacaꞌ pecagütchaü̃ü̃!”—Piripucü̃ãꞌ 4:6.

 Rüeꞌna inawaꞌe torü yumü̃ẽwa Tupanamaã tideagü natchiga torü gutchaü̃gü? Ngemaãcü! Erü Tupanaarü Ore nhanagürü i ngema: “Notürü i cuma, Pa Tchomücü rü Cori ya Tupanameꞌẽwa nangeꞌ i curü gutchaü̃gü!”—Salmo 55:22.

 Ngẽguma Tupanacaꞌ tayumüẽgügu tama nüü̃ niumare natchiga i torü gutchaü̃gü. Rü wüie pacü naãéga Chantelle rü ngĩgürügü: “Tama meü̃ Yeuwaarü namücü tchiĩü̃ tchi nacaꞌ ítchacamaregu na tchoü̃ narüngü̃ẽẽü̃caꞌ. Rü nagu tcharüĩnüẽ na name niĩ nüíra Tupanana tamoẽ rü tchanawaꞌe na Yeuwana tchamoẽ nagagu na guü̃ma tchona naã.”

 Nagu narüĩnü: Taꞌacü i ngemaü̃gü na nüna moẽ cuã? Rüeꞌna cuü̃ natautcha nagu narüĩnü i 3 i nhuꞌma ngemaü̃gü na Yeuwana moẽ cuãü̃caꞌ?

 “Ngẽguma wüi meetchi putüra nüü̃ tadaugügu rü tüü̃́ nanangútchaü̃ẽẽ na Yeuwana moẽ taãgü.”—Anita

 “Nagu narüĩnü i wüi wetchicurutchiga na Tupanaarü Orewa ngemaü̃ urü nawa i taꞌacü Yeuwa nanaü rü ngemawena Yeuwacaꞌ nayumüẽ na nüna moẽ cuã.”—Brian