Yiemagü ya Yeuwaarü Orearü Uruü̃gü yigü taporaẽẽgü na duü̃ü̃güpatacü̃ãꞌgü wüigu naĩnüẽü̃caꞌ erü nüü̃ ingetchaü̃gü ya Tupana ya Tanatü. (Gênesis 2:21-24; Epéchiucü̃ãꞌ 3:14,15) Tupanaarü Orewa nangẽma i ucuꞌẽgü na guü̃wama nüü̃ narüngü̃ẽẽ i duü̃ü̃güpatacü̃ãꞌgü na nataãẽgü.

 Yigü iporaẽẽgü na Tupanaarü Orearü ucuꞌẽgüga iĩnüe erü ngẽma ucuꞌẽgü nüü̃ inanameẽẽ i yatü i ãmaü̃ rü nge i ãtecü rü papagü rü mamagü. (Proverbios 31:10-31; Epéchiucü̃ãꞌ 5:22–6:4; 1 Timúteu 5:8) Rü ngẽma cuaꞌ na Tupanaarü Orewa nangẽma nüü̃ narüngü̃ẽẽ ta i ngẽma duü̃ü̃gü na norü ĩpatacü̃ãꞌgü natoraü̃e i tupaucagüwa nangugü. (1 Pedru 3:1, 2) Nangugü i norü dea ya wüi yatü na namaꞌ rü ya wüie ya nge na ngĩte Yeuwaarü Orearü Uruü̃ tiĩgütchaü̃:

•   Clauir ya Brasilcü̃ãꞌ rü nhanagürü: “Nori tchama rü Ivete guü̃guma tügü tadaigü rü tügü itarümaãtchiẽẽ. Notürü yeguma Ivete Yeuwaarü Orearü Uruü̃ tiĩgu ngĩma rü meã yana tchamaã taĩnü rü tchauga taĩnü i ngetchaü̃cüma rü yemagagu yeera tüü̃ tchangetchaü̃tchigü. Yema rü tüü̃ narüngü̃ẽẽ na wüigu tangẽmaẽtcha.”

•   Agness ya Zâmbiacü̃ãꞌ rü nhatarügü: “Yeguma tchaute ya Tchanza Tupanaarü Orecaꞌ nangugügu yema rü tchaucaꞌ tama name yerü tchauãẽwa nagu tcharüĩnü Yeuwaarü Orearü Uruü̃gü titoye i duü̃ü̃güpatacü̃ãꞌgü. Notürü nhuꞌma rü nüü̃ tchacuaꞌãtchi na Tupanaarü Ore tüü̃ narüngü̃ẽẽ.”

 Ngeguma Tupanaarü Oretchiga duü̃ü̃gümaã tideagügu tanaweꞌgü na Tupanaarü Ucuꞌẽgü tüü̃ narüngü̃ẽẽ na

•   Nüü̃ tacuaꞌgü na teémaã iningĩgü

•   Ngewacaꞌ ingĩgüü̃ nüü̃ narüporamaeü̃caꞌ i gutchaü̃gü

•   Ingĩgüü̃ meã tügü tamaẽ ya naꞌtümaã rü naẽmaã

•   Meã namaã tacuaꞌ i dĩẽru

•   Tama ngẽmaetcha tügümaã taporaga tanücüꞌü

•   Tügüü̃́ nüü̃ tangetchaü̃

•   Toacügüü̃ tanguꞌẽẽ

 Nhuguãcü ngẽma rü nagutcha niĩ. Wüi cuaꞌruü̃ 1998gu ya instituto de pesquisas Sofres nangugüü̃ i nümaü̃ i yatügü i ãmaü̃ rü ngẽü̃gü i ãtecü na naãmücügürica Yeuwaarü Orearü Uruü̃gü niĩtchaü̃gü. Rü nümagü rü nüü̃ nacuaꞌãtchie na wüitchigü i 20 ingĩgüü̃wa rü wüi ingĩ rü nayemaü̃ i poraãcü i gutchaü̃gü.

 Ngetchutchu nüü̃ niu na teé nawe tarüĩ rü nhuguãcü tama tümapatacü̃ãꞌgümaã wüigu tarüĩnüẽ. (Mateu 10:32-36) Wüi ya yatü ya nũcümaü̃ü̃ i orearü ümatüruü̃ rü Will Durant naéga rü nüü̃ niu na yeguma ga Romacü̃ãꞌgü namaã nacuáꞌgu duü̃ü̃gü rü nüü̃ niugü na ya teé Cristuü̃́ tayaõgü rü tatoye ga duü̃ü̃güpatacü̃ãꞌgü. a Ngegumarüü̃ nhuꞌma rü nüü̃ niugü na Yeuwaarü Orearü Uruü̃gü yatoye i ngĩtecügü. Notürü aicuma eꞌna Yeuwaarü Orearü Uruü̃gagu niĩ?

 Ngẽmatchiga na duü̃ü̃gü nüü̃ niugü na Yeuwaarü Orearü Uruü̃gü yatoye i ngĩtecügü rü ya Tribunal Europeu dos Direitos do Homem nüü̃ niu na ngẽma Yeuwaarü Orearü Uruü̃tanüü̃ na tama nacaꞌ name i norü õ rü müẽꞌpüꞌcüna nagutchaẽẽ i Yeuwaarü Orearü Uruü̃caꞌ erü tama meã nayau i norü õ. Rü ya Tribunal rü nhanagürü ta: “Ngẽma rü nangupetüü̃ namaã i guü̃ma i ngĩtecügü na tama wüigu nayaõgü rü ngẽma rü ta nangupetüü̃ ya teémaã Yeuwaarü Orearü Uruü̃ tiĩ. b Woo ngẽma rü Yeuwaarü Orearü Uruü̃gümaã nangupetügu nhaã Tupanaarü Orearü ucuꞌẽga naĩnüẽ: “Rü ngẽguma teé tchieü̃ pemaã üꞌgu, rü tãũü̃táma tchieü̃maã peütanü!.  . . Rü nacaꞌ pedau na guü̃ma i duü̃ü̃gümaã meã pemaẽü̃ rü namaã na iperüngümüü̃caꞌ i guü̃guma!” – Romacü̃ãꞌ 12:17, 18.

 Yeuwaarü Orearü Uruü̃gü naga naĩnüẽ i nhaã Tupanaarü Orearü ucuꞌẽ: “inawaꞌe na wüi ya yatü ya yaõcümaã naãteü̃.” (1 Corĩ́ntiucü̃ãꞌ 7:39) Ngẽma nhaü̃tchiga niĩ na name niĩ nügümaã ingĩgüü̃ ya teé wüigu tayaõ. Ngẽma Tupanaarü Orearü mu aicuma tüü̃ narüngü̃ẽẽ. Wüi cuaꞌruü̃ wüi popera ya Journal of Marriage and Family i 2010gu rü nhanagürü: “ngẽma ngĩtecügü na yatü rü nge wüigu nayaõgü rü wüigu nguꞌẽẽtaegüga naĩnüẽ yeera natautcha na nügümaã nangẽmaetcha.” c

 Notürü Yeuwaarü Orearü Uruü̃gü tama nüü̃ nangutchaü̃ẽẽ na duü̃ü̃gü rü ngĩü̃ ínataꞌ urü íinataꞌ ya ngĩte na tama Yeuwaarü Orearü Uruü̃ niĩ. Tupanaarü Ore nhanagürü: “Rü ngẽguma wüi ya yatü ya õcü ngĩmaã ãmagu i wüi i nge i tama yaõꞌcü, rü tama name i ngĩü̃ ínataꞌ, ega ngĩma rü aicuma namaã naãtetchaü̃gu. Rü ngẽguma wüi i nge i yaõꞌcü ãtegu namaã ya wüi ya yatü ya tama yaõcü, rü tama name i íinataꞌ ya yima ngĩte ega nüma ya yima yatü rü aicuma ngĩmaã naãmaꞌtchaü̃gu.” (1 Corĩntĩü̃cü̃ãꞌ 7:12,13) Yeuwaarü Orearü Uruü̃gü ngẽma muga naĩnüẽ.