Yeuwaarü Orearü Uruü̃gü tama wüirica i Tupanaarü Ore i ümatüü̃ taugütae. Notürü toü̃ ãũrima name i ngema popera i Tradução do Novo Mundo das Escrituras Sagradas na muũtchi i nagagüwa ngemaü̃. Ngema popera rü Tupanaéga nangemaü̃ rü weꞌguü̃ niĩ. Rü nhuꞌmatchi nüü̃ natautcha nüü̃ icuaꞌgüü̃.

•   Tupanaéga nawa i ngemaü̃. Nhure i Tupanaarü Ore i ümatüü̃ rü tama i norü Inaügücü nanatatchigaẽẽ. Wüi cuaꞌãtchirüü̃: Wüi Tupanaarü Ore i ümatüü̃wa rü 70arü yeera i duü̃ü̃güéga na nüü̃ narüngü̃ẽẽgü ngĩma naügüü̃ i ngemaü̃. Notürü i ngematama i poperawa guü̃wama natauma i Inaügücüéga rü Tupana ya Yeuwa niĩ.

   Tradução do Novo Mundo i ngema popera rü ínanaü̃wena i Tupanaéga i muũtchi natchica rü nori marü ingemagu. Rü ta tauema nüü̃ icuaꞌgüü̃ tee tiĩ ya yima duü̃ü̃gü na togawa tangeü̃ i ngema popera i Tradução do Novo Mundo.

•   Aicuma weꞌguü̃. Tama guü̃ma i Tupanaarü Ore i ümatüü̃ na togawa nangeü̃ rü aicuma weꞌguü̃ niĩ. Wüi cuaꞌãtchiruü̃ rü Mateu 7:13wa niĩ. Rü wüi Tupanaarü Ore i ümatüü̃ i togawa rü nhanagürü: “Pema rü i ngema ĩãꞌ i íraü̃waama peitchocu. Erü ngema ĩãꞌ i taü̃ rü ngema natautcha i nama i üügu ya taguma ioü̃ne daü̃.” Notürü ga noritchima i ümatüü̃wa i Tupanaarü Ore rü “inayanaoẽẽ” i ngema dea, tama rü “üü ya taguma ioü̃ne” ngemaü̃. Bemana ya yima duü̃ü̃gü na togawa tangeü̃ rü “üü ya taguma ioü̃ne” i ngema dea ínanaü̃ẽẽ erü nüü̃ tayaõgüü̃ rü duü̃ü̃gü i tchieü̃cüma üügu ya taguma ioü̃newa daü̃. Notürü ngema nguꞌetae rü noritchima i ümatüü̃wa i Tupanaarü Ore natauma. Ngemacaꞌ niĩ i Tradução do Novo Mundo weꞌguü̃ãcü nhaa wetchicuru naümatüü̃: “Pema rü i ngema ĩãꞌ i íraüwaama peitchocu. Erü ngema nama i taü̃ rü nata na inayanaoẽẽcaꞌ nawa nadaü̃.”

•   Natautcha nüü̃ nacuaꞌü̃. Wüi i meü̃ i ümatüü̃ i togawa nangeü̃ rü tama weꞌgurica niĩ. Nüma rü ta nanaweꞌü̃ na nüü̃ natautcha nüü̃ nacuaꞌü̃. Wüi cuaꞌãtchirüü̃: Mateu 5:3wa Ngetchutchu nüü̃ niu wüi deagü na natchiga niĩ “petaãẽgu ingearü i naãẽ” niĩ. Nhuꞌma taucürüwa nüü̃ nacuaꞌü̃ taꞌacütchiga niĩ ngema ore. Tradução do Novo Mundowa i ngema ore yeera nüü̃ nataucha nüü̃ nacuaꞌü̃. Nawa nüü̃ niu: “Tataãẽgü yíema na mea nüü̃ icuaꞌgüü̃ na tanawaꞌeü̃ i Tupanaarü Ore.”

 Tradução do Novo Mundo i ngema popera rü Tupanaéga nawa i ngemaü̃ rü aicuma weꞌguü̃ rü nüü̃ natautcha nüü̃ nacuaꞌü̃. Rü nhuꞌmatchi ngetanüãcümare inaã i ngema popera. Ngemacaꞌ niĩ muema ya duẽẽgü nori taucürüwa wüi i Tupanaarü Ore nangemaü̃, nhuꞌma rü tümagawatama naugütae i Tupanaarü Ore ya duẽẽgü.