Toma rü meama naga taĩnüe i ngẽma Tupanaarü Orearü mugü ngeguma taütchigagügu i ngẽma Coriarü Õna ya naütchigaü̃ i Ngetchutchuarü yu. Muũma i duü̃ü̃gü nüü̃ nacuaꞌgü i ngẽma naütchigaü̃ i “Coriarü Õna i Üüneü̃” rüeꞌna “Norü guꞌ i Õna”. (1 Corĩ́tiucü̃ãꞌ 11:20) Notürü i ngẽma i taꞌacü nanaügü rü nayaõgü i muũtchi i tupaucagü rü tama namaã wüiguü̃ i Tupanaarü Orewa ngemaü̃.

 Naütchigagü i ngẽma Coriarü Õnatchiga nacaꞌ nüna nacuaꞌãtchi ya Ngetchutchu rü moẽ nüna naã i tacaꞌ nayuü̃. (Mateu 20:28; 1 Corĩ́tiucü̃ãꞌ 11:24) Ngẽma naütchigaü̃ rü tama i wüi i sacramento niĩ, rüeꞌna tama i wüi i nacüma na duü̃ü̃güü̃́ nüü̃ nangetchaü̃ü̃caꞌ i norü pecadugü. a Tupanaarü Ore nüü̃ niu na nüü̃́ nüü̃ nangetchaü̃ i tórü pecadugü rü nagagu niĩ i nüü̃ iyaõ i Ngetchutchuarü yu, rü tama nagagu niĩ i wüi i naütchigaü̃.—Romacü̃ãꞌ 3:25; 1 Juã́ũ 2:1, 2.

 Ngetchutchu nüü̃ namu ga norü ngúeü̃gü na naütchigagüü̃caꞌ i ngẽma Coriarü Õna. Notürü tama namaã nüü̃ niu ga nhureeꞌpüꞌcüna. (Luca 22:19) Nümaü̃ i duü̃ü̃gücaꞌ rü name naütchigagü i wüitchigü i tauemacügu. Togü i duü̃ü̃gücaꞌ rü name naütchigagü i wüi i yüügu rü wüieꞌpüꞌcüna rüeꞌna muũeꞌpüꞌcüna i wüi i nguneü̃gu. Rü nhuꞌmatchi togü i duü̃ü̃gü nüü̃ niu na wüitchigü i duü̃ü̃ rü nüü̃ nauneta i nhureeꞌpücüꞌna naütchigagüãü̃ i ngẽma Coriarü Õnatchiga. Notürü name niĩ nanangugü i to ngemaü̃gü.

 Ngetchutchu rü nanaǘ ga Coriarü Õnatchiga ga yematama ga nguneü̃gu yeguma ga yema yudéugü naütchigagü ga Üpetütchiga. Rü yicama nüma rü nayu ga yematama ga nguneü̃gu. (Mateu 26:1, 2) Yematama rü notaꞌcüma na yiĩü̃. Tupanaarü Orewa nüü̃ niu na Ngetchutchuarü yu rü yema Üpetütchigaarü carnérurüü̃ iĩü̃. (1 Corĩ́tiucü̃ãꞌ 5:7, 8) Yema Üpetütchiga rü naütchiga ga wüitchigü ga taunecügu rü wüicanatama niĩ. (Êxodo 12:1-6; Levítico 23:5) Ngegumarüü̃ ta niĩ ga yema nüíraü̃ ga yaõgüü̃ rü naütchigagü ga yema Naütchigaü̃ ya Ngetchutchuarü yutchiga rü wüitchigü ga taunecügu rü wüicanatama. b Rü nhuꞌma ngẽma Yeuwaarü Orearü Uruü̃gü rü ngemaãcü nanaügü erü ngematama niĩ na Tupanaarü Orewa ngemaü̃.

 Tanangugü ga Ngetchutchuarü cuaꞌruü̃ yeguma naütchigagu ga Coriarü Õnatchiga rü tá tüü̃ rüngü̃ẽẽ na nüü̃ icuaꞌü̃caꞌ i nhureeꞌpüꞌcüna name taütchigagü rü nhuꞌmatchi taꞌacügu i nguneü̃ rü ngora name taütchigagü. Ngetchutchu rü marü nanaǘ i ngẽma Naütchigaü̃ i norü yutchiga rü yáuanecuwena ga nisãarü tauemacügu 14 ga nguneü̃gu ga 33 ga taunecügu. Ngẽma nguneü̃ rü ngegumarüü̃ niĩ ga yema tauemacüarü calendário i Tupanaarü Orewa. (Mateu 26:18-20, 26) Nhuꞌma toma ya Yeuwaarü Orearü Uruü̃gü rü ngẽmatama taütchigagü i ngẽma Ngetchutchuarü yu rü wüitchigü ya taunecügu rü wüicanatama ngemaãcü nanaügü ga yema nüíraü̃ ga yaõgüü̃. c

 Yema nisãarü tauemacügu 14 ga nguneü̃gu ga 33 ga taunecügu rü yicacu na yiĩü̃, notürü wüitchigü ya taunecügu rü tama wüiguü̃ niĩ i norü yüüarü nguneü̃. Nacaꞌ nüü̃ icuaꞌü̃ nhugu tá niĩ i ngẽma nisãarü tauemacügu 14 i nguneü̃gu rü name tanaüe ngegumarüü̃ i nacüma ga yeguma namaü̃gu ga Ngetchutchu, rü tama namaã wüiguü̃ i nhuꞌmaü̃tchima i yudéugüarü calendário. d

 Yema ngewacaü̃ü̃ ga Naütchigaü̃gu Ngetchutchu rü namaã naǘ ga yema pãũ ga ngearü ga puꞌẽẽruü̃ rü yema wĩũ ga dautchiücü na nüü̃́ inayaüama ga yema õna ga Üpetütchiga. (Mateu 26:26-28) Nhuꞌma toma rü ta namaã tanaügü i ngẽma pãũ i ngearü i puꞌẽẽruü̃ rü ngearü i to naẽ́ü̃wemü rü ngẽma wĩũü̃tchi niĩ rü tama uwatchiü, rüeꞌna wĩũ rü atchúcaramaã urü demaã urü verduramaã.

 Nhure i tupaucawa nümagü rü nanaǘ i ngẽma pãũ i puꞌẽẽruü̃ã́ü̃, notürü Tupanaarü Orewa i ngẽma puꞌẽẽruü̃ i muũeꞌpüꞌcüna rü nhaü̃tchiga niĩ i tchieü̃ rü pecadu. (Luca 12:1; 1 Corĩ́tiucü̃ãꞌ 5:6-8; Gárataanecü̃ãꞌ 5:7-9) Ngemacaꞌ niĩ na ngẽma pãũ i ngearü i puꞌẽẽruü̃icatama niĩ i meü̃ i cuaꞌruü̃ nacaꞌ i ngẽma Cristuü̃ne i ngearü pecaduãꞌ iĩü̃. (1 Pedru 2:22) To tupaucawa nümagü rü nanaütchicüü i ngẽma wĩũ nacaꞌ uwatchiü. Ngemaãcü nanaü erü nanatchuꞌu taꞌacürü ngútchiꞌáü̃ tá niaü. Notürü Tupanaarü Orewa tama nanatchuꞌu i ngẽma.—1 Timúteu 5:23.

 Ngẽma pãũ i ngearü i puꞌẽẽruü̃ rü ngẽma wĩũ i dautchiücü rü ngẽma cuaꞌruü̃ niĩ ya Ngetchutchumatchi rü nagü. Ngẽma pãũ rü wĩũ rü tama nüü̃ nayanguutchiẽẽ rü bai nanaüeü̃ i Ngetchutchumatchi rü Ngetchutchu nagü nhama nhure i duü̃ü̃gü irüĩnüeü̃ruü̃. Nüü̃ cudau i taꞌacü Tupanaarü Orewa nüü̃ yauü̃ i ngẽmatchiga.

•   Ngetchutchu rü tama nüü̃ namu ga norü ngúeü̃gü rü naaü ga nagü. Ngetchutchu marü nüü̃ nacuaꞌ i Tupanaarü mu natchiga nanatchuꞌu inangṍ i nagü, erü ngẽma nagü rü naüüne niĩ. (Gênesis 9:4; Puracügü 15:28, 29) Ngetchutchu rü taguma nüü̃ nangútchaü̃ẽẽ na tama naga naĩnü i Tupanaarü mugü.

•   Taucürüwama ga norü ngúeü̃gücaꞌ naaü ga Ngetchutchu nagü yeguma namaü̃gu ga Ngetchutchu. Erü taũta nanaba ga nagü. — Mateu 26:28.

•   Ngetchutchu rü nügüna naã na nayuü̃caꞌ i “wüicanatama”. (Ebréugü 9:25, 26) Ngeguma tchi ngẽma pãũ rü wĩũ i ngẽma Coriarü Õnawa rü nüü̃ nayanguutchiẽẽgu i Ngetchutchumatchi rü Ngetchutchu nagü, rü ngemaãcü wenaarü nanayuẽẽ i Ngetchutchu nhama wenaarü nanabaruü̃ i nagü.

•   Ngetchutchu rü nhanagürü: “¡Rü penangṍ i ñaa paũ nax ngẽmaãcü peãẽwa choxna pecua̱xãchiexü̃ca̱x!”, rü tama niĩ i nhaü̃: “Penangṍ i nhaa pãũ na ngẽmaãcü wenaarü tchanayuẽẽü̃caꞌ”.—1 Corĩ́tiucü̃ãꞌ 11:24.

 Nhure i duü̃ü̃gücaꞌ ngẽma pãũ rü wĩũ rü nüü̃ nayanguutchiẽẽ i Ngetchutchumatchi rü Ngetchutchu nagü. Erü norü tradução i nhure wetchicurugütchiga rü nhaãcü nhanagürü: “Daa wĩũ rü tchaugü niĩ”. Notürü ngẽma ore rü ta natchiga niĩ : “Daa wĩũ rü natchiga niĩ i tchaugü.” (Mateu 26:28) e Nua ga Ngetchutchu rü wüi i cuaꞌruü̃ naü. Erü nüma rü guü̃guma cuaꞌruü̃gu yauãcüma namaã nüü̃ niu.—Mateu 13:34, 35.

 Ngeguma ngẽma Yeuwaarü Orearü Uruü̃gü rü inanaütchigagügu i ngẽma Coriarü Õna, rü noretama i duü̃ü̃gü rü nangṍgü i ngẽma pãũ rü naaegü i ngẽma wĩũ. Tüꞌcüü̃?

 Ngẽma nagü inabaẽã ga Ngetchutchu rü Tupana ngewacaü̃ü̃ i unetatchiga niĩ. Ngẽma ngewacaü̃ü̃ i uneta rü nanaütchicüü ga yema nori ga uneta na Tupana namaã nanuegu ga yema Iraétanüü̃. (Ebréugü 8:10-13) Ngẽma duü̃ü̃gü i Tupana namaã naunetagü i ngewacaü̃ü̃ i uneta rü nangṍ i ngẽma pãũ rü naaegü i ngẽma wĩũ i ngẽma Naütchigaü̃wa. Ngẽma natücumü rü tama niĩ i guü̃ma i yaõgüü̃, notürü ngẽma niĩ ya Tupana meama tüü̃ ideetchie. (Ebréugü 9:15; Luca 22:20) Ngẽma duü̃ü̃gü rü dauü̃wa tá i nhama Naãnemaã inacuaꞌgü i Cristumaã. Rü Tupanaarü Orewa nüü̃ niu na 144 mil i duü̃ü̃güicatama niĩ i ngẽma natücumü.—Luca 22:28-30; Apocaríchiu 5:9, 10; 14:1, 3.

 Ngẽma duü̃ü̃gü na namaã inacuaꞌgü tá i Cristumaã rü noretama niĩ. Notürü rümumaeü̃ ya yiema i duü̃ü̃gü rü nhama i Naãnewa imaẽü̃ i guü̃gutáma rü “namuxũchixü̃”. (Luca 12:32; Apocaríchiu 7:9, 10) Ngẽma duü̃ü̃gü rü ínanguẽẽgüü̃ na nhama i Naãnewa inamaẽü̃caꞌ rü tama nangṍgü i ngẽma pãũ rü bai naaegü i ngẽma wĩũ i ngẽma Naütchigaü̃wa. Notürü nawa ínangugü nacaꞌ nanaweꞌü̃ na moẽ inaãü̃ nacaꞌ Ngetchutchu rü nügü inaã rü tacaꞌ nayuü̃.—1 Juã́ũ 2:2.