Ngeguma nagu tamaẽẽgu i ngema nguꞌẽẽtae ga Ngetchutchuarü rü naügüü̃ i ngema ga norü nguꞌẽü̃gü ta ga nüma na mugüü̃rüü̃. Nhaãwa nüü̃ niu na taꞌacüü̃ nayaõgüü̃.

1.   Tupanatchiga. Tomagü rü wüitama ya Tupana Aicumacüü̃ ticuaꞌüüü̃gü. Rü Yeuwa niĩ ya naẽ́ga. (Salmo 83:18,TNM; Apocaríchiu 4:11) Rü Nüma niĩ ga Abraáü̃arü rü Moitchéarü rü Ngetchutchuarü Tupana yiĩü̃.—Êxodo 3:6; 32:11; Juã́ũ 20:17.

2.   Tupanaarü Ore i ümatüü̃tchiga. Tocaꞌ guü̃ma i ngema Tupanaarü Oregu i ümatüü̃ rü nügüãẽwatama nanayau ga Tupana i guü̃ma i duü̃ü̃gücaꞌ niĩ. (Juã́ũ 17:17; 2 Timúteu 3:16) Toma rü tayaõgüü̃ i guü̃ i 66 ümatügüü̃ i Tupanaarü Orewa nangema rü Nüíra i ümatüü̃ rü Ngewacaꞌü̃ i ümatüü̃ i Ngetchutchutchiga. Rü nguꞌẽẽtaeruü̃ ya Jason D. BeDuhn weꞌguãcüma na Yeuwaarü Orearü Uruü̃güü̃ niutchiga “nagu nayaõgü rü naügüü̃ taꞌacü Tupanaarü Ore i ümatüü̃wa ngemaü̃ rü tama nanatoraẽẽ i Tupanaarü Ore”. a

    Guü̃ma i Tupanaarü Ore i ümatüü̃ tayaõgü notürü nüü̃ tacuaꞌgü na nümaü̃ i ore i Tupanaarü Ore i ümatüü̃wa rü cuaꞌãtchirüü̃mare yiĩgü. Rü nüü̃ tacuaꞌgü na nümaü̃ i ore i Tupanaarü Ore i ümatüü̃wa tama ngẽmaãcü nayanguẽẽ tá.—Apocaríchiu 1:1.

3.   Ngetchutchutchiga. Ngetchutchuwe tarüĩ rü norü nguꞌẽẽtaega taĩnüe. Tocaꞌ Ngetchutchu rü tórü Maẽẽẽruü̃ niĩ rü Tupana Nane niĩ. (Mateu 20:28; Puracügü 5:31) Ngemacaꞌ Cristuaü̃́ tayaõgüü̃. (Puracügü 11:26) Notürü Tupanaarü Orewa nüü̃ tacuaꞌgüü̃ na Ngetchutchu rü tama ya Tupana ya Guü̃arü Yeera Poraãcü niĩü̃. Rü Tupanaarü Ore tama tamaã tüü̃ nanguꞌẽẽ na Tupana na tamaẽꞌpüꞌtchametüü̃.—Juã́ũ 14:28.

4.   Tupana Naanemaã inacuaꞌ tá. Naanemaã inacuaꞌ tá ya yima Ãẽꞌgacü dauü̃wa Tupana yautchicü. Rü ngema Ãẽꞌgacü rü tá inayanaoẽẽ rü nanaütchicüü̃ i guü̃táma i ngema Naanearü ãẽꞌgacügü. Rü nanaü tá i Tupanaarü ngútchaü̃ i duü̃ü̃gü i nhama i Naanewa. (Daniel 2:44; Mateu 6:9, 10, TNM) Rü ngẽma rü marü ningaica erü ngegumarüü̃ Tupanaarü Ore nüü̃ niu i nhuꞌma rü nawa ítangemagü i nguneü̃güarü guꞌtchaü̃.—2 Timúteu 3:1-5; Mateu 24:3-14.

    Rü Ngetchutchu niĩ yima Ãẽꞌgacü ya Tupana nimucutchi i dauü̃wa i 1914gu.—Apocaríchiu 11:15.

5.   Maü̃ i taguma gúü̃tchiga. Ngetchutchuarü yugagu niĩ rü Tupana tüü̃ ínanguü̃ẽẽ tórü pecaduwa rü yuwa. (Mateu 20:28; Puracügü 4:12) Notürü nangema i meü̃gü i wüi duü̃ü̃ nayauü̃caꞌ rü name niĩ Ngetchutchuü̃ nayaõ rü nüü̃ narüo i nacüma i tchiẽü̃ rü ínabaie. (Mateu 28:19, 20; Juã́ũ 3:16; Puracügü 3:19, 20) Wüi i duü̃ü̃ naweꞌü̃ na Tupanaü̃ nayaõ ngeguma i meü̃gü naüü̃ rü tama nayaõmare. (Tiagu 2:24, 26) Rü ngema i maü̃ i taguma i gúü̃ tautama diẽrümaã nacaꞌ natae erücü i ngema meü̃ rü Tupana tüna nanaããmare.—Gárataanecü̃ãꞌ 2:16, 21.

6.   Dauü̃guü̃tchiga. Yeuwa ya Tupana rü Ngetchutchu ya Cristu rü ãĩyugü i dauü̃wa namaẽ. b (Salmo 103:19-21; Puracügü 7:55) Rü noretama i duü̃ü̃gü i 144.000 (cento e quarenta e quatro mil) ínarüdagü tá i dauü̃wa namaẽẽ tá.—Daniel 7:27; 2 Timúteu 2:12; Apocaríchiu 5:9, 10; 14:1, 3.

7.   Nhaã Naanetchiga. Nhama i Naane naü ga Tupana na duü̃ü̃gü guü̃gutáma nawa namaẽü̃caꞌ. (Salmo 104:5; 115:16; Eclesiastes 1:4) Yíema Tupanaga ĩnüe rü Meẽtchiü̃ i Naanewa tanayaugü tá i maü̃ i taguma guꞌü̃. Rü tagutáma tidaꞌawegü. —Salmo 37:11, 34.

8.   Tchieü̃ rü oeẽtchiga. Yeguma wüi ãĩyu tama Tupanaga naĩnügu niĩ i nhama i Naanewa inangoꞌü̃ i tchieü̃ rü oẽẽ. (Juã́ũ 8:44) Tama Tupanaga naĩnüguwena i ngema ãĩyu rü “Tchatanágu naãẽ́ga” rü nhumatchi “Ngoꞌogu” naãẽ́ga. Tchataná Adã́ũü̃ rü Ewaü̃ inawomüẽẽ na tama Tupanaga naĩnüeü̃caꞌ. Rü ngemacaꞌ guü̃ i duü̃ü̃gü i Adã́ũwa ne taĩ rü tipecaduãꞌgü rü nayue. (Gênesis 3:1-6; Romacü̃ãꞌ 5:12) Yeuwa rü tama nanatchuꞌuü̃ na Tchataná duü̃ü̃güü̃ nagutchaãẽẽ na nanaweꞌü̃caꞌ Tchataná rü wüi i dorataꞌáü̃ niĩ.

9.   Yutchiga. Ngeguma i yuegu rü tarütaue. (Salmo 146:4; Eclesiastes 9:5, 10, TNM) Rü Tupana tagutáma ngema yueü̃ yima üü ya tauguma i oünewa niwocu.

    Tupana wena namaeẽẽ tá muü̃ma i duü̃ü̃gü i yueü̃. (Puracügü 24:15) Notürü yicama, tee tama Tupanaga ĩnüe rü tüü̃ inayarüoẽẽ ya Tupana rü tagutáma wenaarü tamaẽẽgü tá.—Apocaríchiu 20:14, 15.

10.   Natanüü̃tchiga. Ngegumarüü̃ tanaügüü̃ ta i noriarü ügügu Tupana nanawaꞌeü̃ i ngĩgütchiga rü wüi yatü rü wüi ngecü. Tama tchie nügü ínawogüü̃ ngeguma nate tama namaꞌ iĩü̃maã rüeꞌna namaꞌ tama nate iĩü̃maã nangẽãẽgu. (Mateu 19:4-9) Nüü̃ tacuaꞌgü na Tupanaarü Orearü ucuꞌẽgü i aicumaü̃ rü nüü̃ narüngü̃ẽẽgüü̃ i natanüü̃gü na nataãẽgüü̃caꞌ.—Epéchiucü̃ãꞌ 5:22–6:1.

11.   Tupanaü̃ ticuaꞌüüü̃gü. Toma rü tama curutchaü̃ ticuaꞌüüü̃gü rü bai tama i to tupananetatchicünaꞌãgüü̃. (Deutorónômio 4:15-19; 1 Juã́ũ 5:21) Taꞌacü taügüü̃ na Tupanaü̃ ticuaꞌüüü̃güü̃caꞌ? Nhaãwa ngemaü̃ nadau:

    •   Tupanacaꞌ tayumüẽgü.— Piripucü̃ãꞌ 4:6.

    •   Tupanaarü Orewa ümatüü̃wa taugütae rü ta nacaꞌ tangúe.— Salmo 1:1-3.

    •   Nagu tarüĩnü i taꞌacü i Tupanaarü Orewa nüü̃ tacuaꞌgüü̃.— Salmo 77:12.

    •   Itangutaqueꞌegü na tayumüẽgüü̃caꞌ rü na Tupanaarü Orecaꞌ tanguꞌẽẽgüü̃caꞌ rü tawiyaegüü̃caꞌ rü tórü õtchigagu togümaã tideagüü̃caꞌ rü nhuꞌmatchi togüãü̃́ tangútchaü̃ẽẽü̃caꞌ.—Corochacü̃ãꞌ 3:16; Ebréugü 10:23-25.

    •   Togümaã nüü̃ tiu i Tupanaarü Ore i meü̃.—Mateu 24:14.

    •   Togüü̃ tarüngü̃ẽẽ.—Tiagu 2:14-17.

    •   Ngutaqueꞌepataü̃ taügüü̃ rü meã nüna tadaugü rü nhuꞌmatchi togü natchica taügüü̃ na Tupanaarü Orecaꞌ tanguꞌẽẽü̃caꞌ.—Salmo 127:1.

    •   Togüü̃ tarüngü̃ẽẽ ngẽguma ĩãꞌãtchiane, buanecü ya poraü̃tchicü rü taü̃chicü ya mucü nangupetügu rüeꞌna togü gutchaü̃gü nangupetügügu.—Puracügü 11:27-30.

12.   Tórü natücumü i guü̃ i Naanewa. Guü̃ i Nananewa yaõgüü̃tücumügü nangema. Nawa nangema ya taenegü ya yaõgüü̃tücumügüü̃maã icuaꞌgü. Notürü i ngema taenegü tama nayauarü diẽruãgü rü tama nügü inarütagü i togüü̃. (Mateu 10:8; 23:8) Toma rü tama tüü̃ tanaütanüe i dízimo rü bai tama diẽrucaꞌ itacaꞌü̃. (2 Corĩ́tiucü̃ãꞌ 9:7) Guü̃ i taꞌacü naügüü̃ rü ya ãmarewa niĩ tüü̃ nayaugüemaã yangugüü̃.

     Natücumü i Wipee Ãgüü̃ i noritama taenegü naãẽ icuaꞌgüü̃ i Betéu i Estados Unidoswa nangemagü i güü̃ Yeuwaarü Orearü Uruü̃gümaã icuaꞌgüü̃.—Mateu 24:45.

13.   Wüigu nagu tarüĩnüe. Yeuwaarü Orearü Uruü̃gü i guü̃ i Naanewa ngematama niõgü. (1 Corĩ́tiucü̃ã 1:10) Tocaꞌ rü guü̃ma i duü̃ü̃gü nawüigumare. (Puracügü 10:34, 35; Tiagu 2:4) Ngema Tupanaarü Orewa nüü̃ tacuaꞌgüü̃wa tá nüü̃ tacuaꞌgü taꞌacü tá taügüü̃ i torü maü̃wa.—Romacü̃ãꞌ 14:1-4; Ebréugü 5:14.

14.   Nhuãcü tamaẽ. Togü ítaporaẽẽ na tama togüicatama tarüĩnüeü̃caꞌ rü tanaweꞌ na togüü̃ tangetchaü̃güü̃. (Juã́ũ 13:34, 35) Toma rü tama tanaügüü̃ i taꞌacü Tupanapeꞌewa tchiẽü̃ niĩ. Rü taṹ ya nagü torü tarümawa tiaü̃cutchi. (Puracügü 15:28, 29; Gárataanecü̃ãꞌ 5:19-21) Toma rü meã duü̃ü̃gümaã tamaẽ rü tama guerrawa taĩ. (Mateu 5:9; Isaías 2:4) Rü toma rü nhama naanecü̃ãꞌarü ãẽꞌgacügüarü mugüga taĩnüe. Notürü ngeguma i ngema mugü Tupanapeꞌewa na tchiẽü̃gü narümemaẽ na Tupanaga taĩnüeü̃.—Mateu 22:21; Puracügü 5:29.

15.   Nhuãcü togümaã tamaẽü̃. Ngetchutchuarü nhaaãcü toü̃ namuü̃: “Nüü̃ nangetchaü̃ i cumücü ngema na cugü cungetchaü̃ü̃rüü̃!” Nüma rü yaõgüü̃maã nüü̃ niu na “tama nhama i naanecü̃ãꞌ tiĩgü”. (Mateu 22:39; Juã́ũ 17:16) Woo tama políticawa taĩ rü bai yaõgüü̃tücumügünetagu taãgüü̃ notürü guü̃ma i duü̃ü̃güü̃ tarüngü̃ẽẽgü. (Gárataanecü̃ãꞌ 6:10; 2 Corĩ́tiucü̃ãꞌ 6:14) Rü tama togüarü ĩnütchiga tideagü.—Romacü̃ãꞌ 14:12.

 Rüeꞌna yeera cucuaꞌtchaü̃ torü sitewa naugütae. Rü wüi Yeuwaarü Oreaarü Uruü̃güarü puracütchicacaꞌ nadau, rüeꞌna tórü ngutaqueꞌewa nangu rü wüi Yeuwaarü Orearü Uruü̃maã idea.