1. Oh, Dios, gi̱jyooʼ kuwáanʼxu xúgi̱,

mbiʼi rí phú gíʼdoo numuu.

Náa Egipto, Jeobá, ikháán nitasngájma

ngajua náa bi̱ nindaaʼ xtañún.

Eʼdiuu mugu̱ mbaʼa náa nijmaa,

mu ma̱ndoo maguma káwíin.

Mba̱yu̱ʼ tsiguʼ nda̱wa̱á, nitaxuʼmaa Jesús,

ma̱ʼkha̱ gáʼni káwáanʼ náa aʼkhá.

2. Xóo pan ga̱jma̱a̱ vino nasngájma

rí nixnáximinaʼ Jesús

mu maʼni káwáanʼxu náa aʼkhá ndrígúxu̱,

mu májánʼ gakuwáanʼ nda̱wa̱á.

¡Phú mitsaanʼ rí nitani̱ ikháán!

Nuxna̱ʼxu núma̱aʼ, oh, Jeobá,

ra̱ʼkhá tháán edxu̱xuʼ rí natamínáanʼxu

makuwáanʼ asndu kámuu mbiʼi.

 3. Jeobá, ga̱jma̱a̱ gagi kuwáanʼxu

náa Ganitsuwañuu Jesús.

Gíʼdoo wéñuʼ numuu, nditháan xámbumuxu

rí nitani̱ ikháán Jeobá.

Ikha jngó rí mbuyamajkuaʼxu,

munixu rí nandaaʼ ikháán,

ga̱jma̱a̱ munimbuxu xtángoo ndrígóo Jesús,

rí naʼni marigá rí tsímáá.