Náa mbá xúgíʼ tsiguʼ 2022, mbaʼa nuthu eʼdxawíín náa noticias dí narígá guerras, xkujndu ga̱jma̱a̱ numuu mbújkha̱a̱ ma̱ngaa i̱ʼwáʼ gamiéjunʼ dí naʼni maʼchúu ku̱ba̱ʼ. I̱ndó náa Biblia naʼthí mbájmbu náá numuu narígá xígi̱ kaʼnii.

Rí nandoo gáʼthúu̱n dí nirígá tsiguʼ 2022

 Xúgíʼ dí nirígá nákha timbá tsiguʼ nasngájma kaʼwu dí kuwáanʼ náa mbiʼi rí Biblia naxná mbiʼyuu “iwáá mbiʼi” (2 Timoteo 3:1). Mbiʼi rígi̱ nigi̱ʼdu̱u̱ nákha tsiguʼ 1914. Atayáá dí nirígá xíkhoo, xú káʼnii nambánii rí naʼthí náa Biblia ga̱jma̱a̱ numuu mbiʼi rí kuwáanʼ:

 “Guerras”: Mateo 24:6.

•   “Tsiguʼ 2022, ninindxu̱u̱ mbá tsiguʼ gamíi wéñuʼ, numuu dí náa xígií Europa nirígá guerra”. a

 “Marigá ewiʼ”: Mateo 24:7.

•   “Tsiguʼ 2022 nirígá wéñuʼ ewiʼ”. b

 “Nandii”: Lucas 21:11

•   Narígáa mbu̱júu̱ nandii polio, ga̱jma̱a̱ nandii viruela del mono na̱jkha̱ ridoo itháán, ma̱ngaa nakháñún má xúʼko̱ xa̱bu̱ ga̱jma̱a̱ numuu nandii COVID-19, rúʼko̱ naʼni dí gamíi muʼda nacha̱ i̱ʼwáʼ nandii ga̱jma̱a̱ rí na̱nguá kuaʼdáá tsiaki̱i̱ mu muʼni ga̱jma̱a̱. c

 “Xa̱bu̱ mamiñún ga̱jma̱a̱ xúgíʼ dí gárígá”: Lucas 21:11.

•   “Índo̱ niʼni verano dí tsiguʼ 2022, niʼni mijkha wéñuʼ, niwámá iyaʼ, nikha̱a̱ xaná ga̱jma̱a̱ tikhu xuajin niguʼwa̱. Rígi̱ niʼni dí tikhu mambáa ga̱jma̱a̱ niʼni dí mbaʼin xujkhúʼ o xa̱bu̱ makhañún ma̱ngaa mbaʼin wéñuʼ xa̱bu̱ ndiyóoʼ magajnún náa xuajñún”. d

 “Xa̱bu̱ natsañu̱únʼ kuyamijná”: Lucas 21:9

•   “Mambá mbiʼi xa̱bu̱ nakiʼníin itháán ga̱jma̱a̱ numuu rí nda̱a̱ mbújkha̱a̱, mú itháán índo̱ nitu̱jxu̱u̱ numuu dí maratsi, rígi̱ niʼni dí xa̱bu̱ muni plantón náa xa̱bu̱ ñajunʼ mú nirígá itháán náa tsiguʼ 2022”. e

Ndiéjunʼ gárígá tsiguʼ dí ma̱ʼkha̱ rá.

 Nimbáa dí ikháanʼ tseʼyoo ndiéjunʼ gárígá índo̱ gáʼni tsiguʼ 2023. Mú rí nduʼyáá xúgiáanʼ dí nánguá má mba̱yu̱u̱ʼ ma̱ʼkha̱ xa̱bu̱ ñajunʼ ndrígóo Dios mu maʼni májáanʼ dí rígá náa numbaaʼ (Daniel 2:44). Xa̱bu̱ ñajunʼ buʼko̱ maʼni gámbáa gamiéjunʼ dí naʼni mumíniiʼ xa̱bu̱ ga̱jma̱a̱ maʼnimbánuu rí nandoo Dios náa tsu̱du̱u̱ ku̱ba̱ʼ (Mateo 6:9, 10).

 Nuthala dí gunimbánii consejo rí nixná Jesucristo ma̱ngaa ‹gakuwáanʼla xawii› numuu rí xtáa rarígá náa xúgíʼ numbaaʼ nasngájma rí nambánuu profecía dí naʼthí náa Biblia (Marcos 13:37). Mbá péñu, aratamíjná ga̱jma̱á nindxu̱xu̱ mu xúʼko̱ majmañaaʼ itháán dí naʼthí náa Biblia, rí xóo gámbáyáaʼ asndu nákha xúgi̱ ga̱jma̱a̱ nda̱wa̱á rí makuwá náa mbá ku̱ba̱ʼ májánʼ gajmiáanʼ familia ndrígáaʼ.