Ajngáa Rawuun Ana̱ʼlóʼ tsíʼthán rí Armajedón ñajuun ne̱ mbá xkujndu rí ma̱ri̱gá mbájndi ná mbá xuajen, rí mbá xkujndu mba̱a̱ rí ma̱ri̱gá ná xúgíí numbaa ñajuun ne̱, ná xkujndu ríge̱ʼ Ana̱ʼlóʼ maxná míjná gajmíí xúgíin xa̱bo̱ ñajon.

•   “Ajngúún gíñá ʼguéen [...] na̱ka̱ ná inúú xúgíin thúngaa numbaa ma̱ru̱wa̱ mijná ído̱ gága̱nú mbiʼi rí phú mba̱a̱ niʼgíi Ana̱ʼlóʼ, jngó ma̱tsa̱ñúu̱ gajmíi̱ Ana̱ʼlóʼ tsí gíʼdoo mbá xúgíí tsiakhe̱ [...]. Ni̱ru̱wi̱in mbá xúgíin thúngaa numbaa ná mbaa rí mbiʼyuu Armajedón ná ajngáa ebréo̱” (Apocalipsis 16:14, 16).

 Ajngáa Armajedón nagájnuu ne̱ ná mbá ajngáa ebréo̱ rí naʼthán xkuaʼnii Har Meghiddóhn, ajngáa ríge̱ʼ iyoo gáʼthán “júbo̱o̱ Megidó”. Megidó ñajuun ne̱ mbá xuajen rí niríga̱ nákhí wajyúú ná xuajen Israel. Ikhaa jngó tikhuun xa̱bo̱ na̱ju̱mu̱ú rí Armajedón ma̱ʼne ne̱ ná xuajen Israel, jamí ra̱ʼkhá xkuaʼnii. Ma̱xáʼngo̱o̱ mbayuu Megidó ni máʼ iʼwá mbaa ná numbaa Asia ma̱gi̱mbíin xúgíin thúngaa numbaa gajmíí xúgíin xa̱bi̱i.

 Ná i̱ye̱e̱ʼ Apocalipsis nijmaa “xtiʼkhu” mi̱ʼtháan ne̱, ríge̱ʼ iyoo gáʼthán rí ajngáa rí nijmaa ñajuun ne̱ mbá ju̱ma̱ rí nambáyálóʼ ma̱fraʼa̱lóʼ rí naʼthán ne̱ (Apocalipsis 1:1). Ikhaa jngó, Armajedón ra̱ʼkhá ne̱ mbá mbaa o mba xuajen, rí mbá xkujndu mba̱a̱ rí ma̱ri̱gá ná xúgíí numbaa ná mbá xúgíin xa̱bo̱ ñajon ná xúgíí xuajen ma̱ru̱wa mijná ma̱tsa̱ñúu̱ gajmíí xa̱bo̱ ñajon tsí niʼgíi Ana̱ʼlóʼ (Apocalipsis 19:11-16, 19-21).