Mambá tsiguʼ, testigos de Jeobá ga̱jma̱a̱ mbaʼin xa̱bu̱ bi̱ nijuiʼthúún, nagún náa conmemoración ga̱jma̱a̱ nuni̱ xó má niʼthí Jesús (Lucas 22:19). Reunión rígi̱ nambáyulú mikruʼulú mbaʼa enii, mbá xkri̱da náá numuu rí nikháñúu Jesús ga̱jma̱a̱ numún xúgíinʼ xa̱bu̱ ma̱ngaa xóo naguma tsajkurámáánʼ xúgi̱ ga̱jma̱a̱ nda̱wa̱á (Juan 3:16).

 Maski ajndu xáʼngo̱o̱ maraxtaa náa conmemoración tsiguʼ rígi̱, xú káʼnii gándoo gámbáyáaʼ dí nikháñuu Jesús rá. Jesús niʼthí a̱jma̱ rí gíʼdoo numuu muʼni:

1.  1. Gajmañaaʼ ga̱jma̱a̱ numuu Dios ma̱ngaa numuu Jesús. Mbóo mbiʼi Jesús niʼtákáñuu anu̱u̱, niʼthúu̱n: “Rígi̱ eyoo gáʼthúu̱n rí makuwá kámuu mbiʼi: Rí muninuwíínʼ ikháán, mbáwíín ikháán bi̱ nindxa̱a̱ʼ Dios gajkhun, ga̱jma̱a̱ muninuwiinʼ Jesucristo bi̱ ikháán nitaxúngua̱a̱nʼ” (Juan 17:3).

2.  2. Atanimbáníí rí najmañaaʼ. Jesús niʼthí rí ndayóoʼ muʼnimbáníí xúgíʼ dí ikhaa naʼsngúlú. Mbóo mbiʼi índo̱ ikhaa niguámbóo nixná mbá discurso rí nigumbiʼyuu ‹discurso rí nixná náa kúbá›, ikhaa nixnún ajngáa tsiakii bi̱ kúwá rudxawíín numuu rí ikhiin nunimbáníí dí ikhaa naʼsngún (Lucas 6:46-48). I̱mba̱ mi̱ʼtsu̱ niʼthí: “Xúgi̱ rí ndu̱ya̱a̱la xúgíʼ rígi̱, makuwáanʼ gagi á mu nuʼgíʼ nunimbánííla” (Juan 13:17).

 Nanigua̱a̱ʼ majmañaaʼ itháan ga̱jma̱a̱ numuu Dios ma̱ngaa ga̱jma̱a̱ numuu Jesús ráʼ. Á mu nandaaʼ ma̱ta̱ya̱a̱ xóo gátani̱, gi̱i̱ ma̱ndoo mata̱ya̱a̱ tikhuʼ rí ma̱ndoo mambáyaaʼ.

 Rí nuʼsngáa ga̱jma̱a̱ numuu Biblia nambáñúún mbaʼin xa̱bu̱ majmañún dí naʼthí náa Biblia ga̱jma̱a̱ mugíʼ muni̱ rí naʼthí ikhí.

•   Ata̱ʼa̱a̱ʼ náa ináa ndrígóo internet ndrígúxu̱ náa naʼthí xóo miʼsngáa ga̱jma̱a̱ numuu Biblia mu ma̱ta̱ya̱a̱ itháán ga̱jma̱a̱ numuu ikhaa.

•   Mu ma̱ta̱ya̱a̱ xú káʼnii nindxu̱u̱ rí matanigajma̱a̱ gajmiáanʼ testigos de Jeobá, atayáá video Ganiguaa’ matanigajma̱a̱ Biblia.

 Bi̱ nindxu̱xu Testigos de Jeobá nagimbáanʼxu a̱jma̱ nuthu rí mbá xmáná náa mbá guʼwá mu mutamíjna̱xu̱ ga̱jma̱a̱ numuu Biblia ga̱jma̱a̱ mu mbuya̱a̱xu xóo gándoo gúʼgí muníxu rí najmañuxu ga̱jma̱a̱ numuu Dios.

 Xúgíinʼ xa̱bu̱ ma̱ndoo magún náa reunión rígi̱, raʼkháa i̱ndó testigos de Jeobá. Ma̱ndoo mi̱dxu̱ʼ reunión náa guʼwá nagimbáanʼxu o ga̱jma̱a̱ videollamada, xó má kaʼnii ma̱ndoo náa xuajñaaʼ.

•   Mu ma̱ta̱ya̱a̱ xóo nindxu̱u̱ reunión, atayáá video Káʼnii erígá náa Guʼwá nagimbáanʼ rá.

•   Atayáʼ náa mina̱a̱ʼ erígá reunión náa mijngii xtaa. Ata̱ʼa̱a̱ʼ náa ináa ndrígóo internet ndrígúxu̱ dí naʼthí náa gándoo mi̱dxu̱ʼ reunión.

 Mbaʼa artículo ga̱jma̱a̱ video dí rígá náa Internet rígi̱, ma̱ndoo mambáyáaʼ majmañaaʼ itháanʼ dí Jesús niʼsngáa ga̱jma̱a̱ nguátá mba̱a̱ gíʼdoo numuu dí ikhaa nikáñúu.

 Mu ma̱ta̱ya̱a̱ xú káʼnii dí nikháñuu mbáa xa̱bu̱ ma̱ndoo maʼnikáwíin mbaʼin wéñuʼ, ma̱ndoo matraxnuu artículo: “¿De qué manera nos salva Jesús?” ga̱jma̱a̱ “¿Por qué sufrió y murió Jesús?” ma̱ngaa atayáá video Náa numuu nikháñu Jesús rá.