Xúgíí mbiʼi nu̱ꞌdxuunlóʼ rí phú ríga̱ xkujndu jamí rí xa̱bo̱ nuñu̱ú rí ra̱máján iʼwíin.

•   “Xkujndu rí gíʼdoo xuajen Israel ga̱jma̱á xuajen Gaza, naʼne ne̱ rí xa̱bo̱ muthan ná internet ajngáa rí naꞌne rí xa̱bo̱ phú najiꞌníi juya mijná” (I̱ye̱e̱ʼ The New York Times, mbiʼi 15 i̱ka̱ ñajuun go̱n’ noviembre tsigu 2023).

•   “Asndo nákhí mbi’i 7 i̱ka̱ ñajuun go̱n octubre, xa̱bo̱ phú i̱wa̱á naji’níi juya mijná, jamí nune̱ ñawíín iʼwíin” (Ajngóo táta̱ Dennis Francis, mbo̱ jayá idxu̱ún xa̱bo̱ ede̱ tsí mbiʼñúú Naciones Unidas ído̱ nawi̱i̱n, mbiʼi 3 i̱ka̱ ñajuun go̱nʼ noviembre tsigu 2023).

  Ra̱ʼkhá i̱ndo̱ó xúge̱ʼ ríga̱ xkujndu jma̱á phú najiʼníi xa̱bo̱ juya mijná. Ajngáa Rawuun Ana̱ʼlóʼ naʼthán rí nákhí wajyúú mangaa nijúwa̱ʼ xa̱bo̱ ra̱májíin, ajngúún xa̱bo̱ tsúꞌkhue̱n jaʼnii ne̱ xó xkuíyo̱o̱ xkamídá, xa̱bo̱ tsúʼkhue̱n phú ni̱ni̱gu̱ún mune̱ xkujndu jamí phú nene̱ ngíníi xa̱bo̱ (Salmo 64:3; 120:7; 140:1). Ajngóo Ana̱ʼlóʼ naʼthán rí xa̱bo̱ phú i̱wa̱á najiʼníi juya mijná mbiʼi xúge̱ꞌ xo rí nákhí wajyúú.

 Ajngóo Ana̱ʼlóʼ naʼthán rí ríga̱ a̱jma̱ numuu kajngó xa̱bo̱ phú najiʼníi juya mijná mbiʼi xúge̱ʼ.

1.  1. Ajngóo Ana̱ʼlóʼ wapha niʼthán rí ma̱ga̱nú mbiʼi rí mbaʼiin xa̱bo̱ ná xágúún juya mijná (Mateo 24:12). Ikhaa jngó mbaʼiin xa̱bo̱ mbiʼi xúge̱ʼ nánguá iñúú juya mijná, rí najiʼníi juya mijne̱e̱ꞌ (2 Timoteo 3:1-5).

2.  2. Gixa̱a̱ ñajuun tsí phú nasngrúʼúún xa̱bo̱ majiʼníi juya mijná. Ajngóo Ana̱ʼlóʼ naʼthán rí xa̱bo̱ ra̱májáan naʼthán ñájúún xabo̱ numbaa (1 Juan 5:19; Apocalipsis 12:9, 12).

 Maske máʼ xkuaʼnii, Ajngóo Ana̱ʼlóʼ naʼthán rí Ana̱ʼlóʼ inu máʼ ma̱ʼne gámba̱a̱ xúgíí rí naʼne rí xa̱bo̱ najiʼníi juya mijná. Ra̱ʼkhá i̱ndo̱ó rúʼkhue̱n, rí mangaa ma̱ʼne gámba̱a̱ xúgíí jamínu̱ʼ rí ríga̱ eʼne rí najiʼníi juya mijná xa̱bo̱. Ajngáa Rawuun Ana̱ʼlóʼ naʼthán:

•   Ana̱ʼlóʼ “maxúdíi iyoo idúu̱n, jamí ná xájáñúu, ná xáthájuíin a̱kuíi̱n jamí ná xúmbiye̱e̱ʼ, ni máʼ ná xáríga̱ gaʼkho̱. Numuu rí wámba̱a̱ máʼ xúgíí rí niríga̱ ginii” (Apocalipsis 21:4).