Nimbáa a̱ʼgo̱ náxágu̱ma ngínáa | Dí iʼthán Ajngóo Ana̱ʼlóʼ rá.
Ná xúgíí numbaa phú mbaʼiin mi̱ndaʼkho nána̱ jamí i̱jín go̱ʼo̱ na̱gu̱ma ngíníi. Á natagí’níí rú’khue̱n mángáán rá. Phú gíʼdoo numuu ma̱ma̱ñaaʼ rí Ana̱ʼlóʼ Mikhuíí nandoo rí ma̱ra̱xtaa gagi jamí mangaa ma̱thi̱yáá dí gáʼnii̱ rí náxágu̱ma ngíníi go̱ʼo̱.
“Nákhí rí lájúún dxájo̱ʼ phú naʼne ngínúú jamí naʼthínʼ xkawiu̱ʼ jámba̱ mbiʼi. Nda̱wa̱á ído̱ ni̱nu̱júnlo̱ʼ, dxa̱gui̱ʼ mangaa nigíʼdu̱u̱n neʼne ngínúú. Dxa̱gui̱ʼ jamí mégui̱ʼ phú niñi̱’ nikhuáa xó máʼ mbáa yumbáá. Niríga̱ mbiʼi rí niráʼa idxu̱ʼ ma̱xíya mina̱ʼlo̱ʼ” (Madhu, a India).
Xa̱bo̱ tsí nuthúún Organización Mundial de la Salud nuthan rí “ná xúgíí numbaa na̱gu̱ma ngíníi go̱ʼo̱”. Júwa̱ʼ mbaʼiin go̱ʼo̱ tsí na̱gu̱mii nikhuáa jamí manga nawatrugui̱i̱n ene̱ xa̱be̱kha.
Xí ikháánʼ nitagíʼníí mbá miʼtsú rúʼkhue̱n, nguá na̱ju̱ma̱a̱ʼ rí asndo náá máʼ gídxú xa̱bo̱ mune̱ ngínáá o ma̱ga̱tíya̱ʼ mbáa xa̱bo̱ martuwíín maguguáán. Ído̱ rí nathiyáá rí phú na̱gu̱ma ngíníi go̱ʼo̱, nguá rúʼkhue̱n naʼne rí ma̱ju̱ma̱a̱ʼ rí xúgíín xa̱bo̱ nu̱ndxaʼwa̱ mijná rí nda̱a̱ numúú go̱ʼo̱. Á naxná gámiéjuun Ana̱ʼlóʼ Mikhuíí ene̱ go̱ʼo̱ rá.
Ajngóo Ana̱ʼlóʼ naʼthán rí Ana̱ʼlóʼ Mikhuíí tsíni̱gu̱u̱ rí ma̱gu̱ma ngíníi go̱ʼo̱.
Dí indxaʼwá mina̱ʼ Ana̱ʼlóʼ ga̱jma̱á numúú go̱ʼo̱ rá.
Kíxnuu: “Xa̱biya̱ jamí a̱ʼgo̱ niʼnii̱” (Génesis 1:27).
Ju̱ma̱: Ana̱ʼlóʼ neʼne ku̱maa xa̱biya̱ jamí a̱ʼgo̱ mangaa. Ndaʼya makhúu̱n ná ajmii̱. Nandoo̱ rí xa̱biya̱ ma̱goo̱ jaʼyoo̱ a̱gui̱i xó máʼ nandoo jaʼya mina̱ máʼ ikhaa̱, tsíyoo̱ rí maxnúu a̱gui̱i ni máʼ rí maʼthúu̱n ajngáa xkawe̱ʼ (Efesios 5:33; Colosenses 3:19). Ríge̱ʼ nasngájma rí Ana̱ʼló tsíni̱gu̱u̱ rí ma̱guma ngíníi go̱ʼo̱, nandoo̱ rí gagi gájúwe̱e̱ʼ.
“Nákhí rí lájún tikhuun a̱ngui̱nʼ ni̱ru̱gúunlo̱ʼ. Nákhí gu̱wa̱ʼ nítsu i̱jma̱ tsiguʼ ña̱ʼñiʼ niʼthínʼ rí maxke̱ʼ náxáxníʼ ñajon xí tsíni̱ʼñá mina̱ʼlo̱ʼ ma̱bo̱ʼ ga̱jmi̱ʼ. Maske máʼ a̱ʼgo̱ nikhi̱i̱ máʼ ñaju̱nʼ, a̱jmbeʼ naʼne ngínúú, anu̱u̱ʼ jamí xa̱bo̱ tsí júwa̱ʼ mijngi ná xtáálo̱ʼ nuñi̱ʼ nikhuáa̱. Nda̱wa̱á ni̱ma̱ñuʼ rí Ana̱ʼlóʼ Mikhuíí Jeobá, b mbo̱ neʼne ku̱máaʼlóʼ ndaʼya makhúún go̱ʼo̱. Ríge̱ʼ nimbáyíʼ ma̱ʼne jañii a̱kui̱nʼ rí Ana̱ʼlóʼ nandoo jaʼye̱ʼ jamí gíʼdoo numu̱ʼ iʼyoo̱” (María, Argentina).
Tsáa gámbáyáa’ ma̱ʼnii tsímáá a̱kia̱an’ rá.
Kíxnuu: “Júwa̱ʼ xa̱bo̱ tsí whiphi ini̱i̱ mune̱ ngíná mijnée̱, jamí mangaa xtáa xa̱bo̱ tsí nambáxa̱a̱ʼ ga̱jma̱a̱ʼ tsí i̱wa̱á nandoo jaʼyaaʼ xó rí mbáa dxíya̱a̱ʼ” (Proverbios 18:24).
Ju̱ma̱: Mbáa xa̱bo̱ tsí gakon iya nga̱jya̱a̱ʼ ñajuu̱n mambáyáaʼ. Ma̱goo ma̱ra̱tháán xáne eʼne a̱kia̱anʼ mbáa xa̱bo̱ tsí máján imbáxa̱a̱ʼ ga̱jma̱a̱ʼ.
“Ninújngoo mbá skíñú tsigu táthu̱u̱nlo̱ʼ nimbáa rí mbáa xa̱bo̱ nigugúúnlo̱ʼ. Rúʼkhue̱n neʼne rí maphú nixtáá jínúʼ jamí nixtáálo̱ʼ gaʼkho̱. Ikhaa jngó ído̱ ni̱xna̱ mína̱ʼlo̱ʼ tsiakhe̱ ma̱tha̱nlo̱ʼ rí nigíʼnuʼ, a̱ʼkhue̱n asndo máján neʼne a̱kui̱nʼ” (Elif, Turquía).
Kíxnuu: “Gu̱ni̱ʼñáálaʼ mbá xúgíí gajmá rí guáʼdáálaʼ ná ñawúun Ana̱ʼlóʼ, numuu rí ikhaa̱ naxná gamiéjuu̱n e̱ne̱laʼ” (1 Pedro 5:7).
Ju̱ma̱: Ana̱ʼlóʼ nadxawaanʼ ído̱ rí narathán jáñíi̱ (Salmo 55:22; 65:2) Naxná gamiéjuu̱n ithane̱, ikhaa jngó nandoo̱ gámbáyáaʼ ma̱thi̱yáá rí phú gíʼdoo mi̱ndaʼkho numaaʼ.
“Maphú nimbáyíʼ rí ma̱ne̱ núwiin Ana̱ʼlóʼ Jeobá, nimbáyíʼ ma̱xáxtáálo̱ʼ jínúʼ mi̱ndaʼkho gáʼne rí nigíʼnuʼ. Xúge̱ʼ na̱ni̱mboʼ ja̱yo̱o̱ Ana̱ʼlóʼ ído̱ na̱tha̱n jáñuu̱lo̱ʼ. Asndo xóo mbáa iya nga̱jue̱ʼ tsí nafroʼo̱o̱ mújúu̱n xáne eʼne a̱kui̱nʼ jaʼnii̱” (Ana, Belice).
Á ma̱ga̱nú mbiʼi rí Ana̱ʼlóʼ ma̱ʼne rí náxágu̱ma ngíníi go̱ʼo̱ rá.
Kíxnuu: “Ma̱ta̱mbáñúú e̱jén dxuáʼa xúʼkhue̱n máʼ xa̱bo̱ tsí wámba̱a̱ a̱kui̱in phú xtáa̱ jínúu, a̱’khue̱n rí nimbáa xa̱bo̱ ná tsu̱du̱u̱ numbaa náxáʼne míñúu” (Salmo 10:18).
Ju̱ma̱: Ana̱ʼlóʼ ma̱ʼne gámba̱a̱ xúgíí rí ra̱máján ríga̱ jamí maʼnii̱ rí náxágu̱ma ngíníi go̱ʼo̱.
“Phú nimbáyíʼ ni̱ma̱ñuʼ rí na̱ʼkha̱ rangiyuu máʼ mbiʼi rí Ana̱ʼlóʼ Jeobá ma̱ʼne gámbi̱i̱n xa̱bo̱ tsí nune̱ ngíníi go̱ʼo̱ jamí i̱jín go̱ʼo̱ mangiin. Nimbáyíʼ ma̱ʼne tsímáá a̱kui̱nʼ” (Roberta, Mixíí).
Xí nandaaʼ ma̱thi̱yáá xáne imbáyálóʼ Ajngóo Ana̱ʼlóʼ ma̱ʼne jañii a̱kia̱nʼlóʼ rí na̱ʼkha̱ máʼ mbiʼi rí náxáríga̱ gaʼkho̱, náá numuu jngó ma̱goo ma̱ni̱mbaaʼ rí naʼthán Ajngóo Ana̱ʼlóʼ jamí mangaa xáne i̱mba̱ñúú xa̱bi̱i Ana̱ʼlóʼ Mikhuíí Jeobá iʼwíin xa̱bo̱, a̱ta̱ndu̱ʼúún a̱ngia̱nʼxo̱ʼ magóó gúya̱a̱ʼ.
a Ni̱ri̱ʼkhuuxo̱ʼ mbiʼñúú xa̱bo̱.
b Jeobá mbiʼyuu Ana̱ʼlóʼ Mikhuíí (Salmo 83:18) Araxnuu ná naʼthán “Tsáa ñajuun Jeobá rá.”