Atayáá dí najuiʼthá ga̱jma̱a̱ numún bi̱ kuya̱ edxu̱u̱ náa religión ma̱ngaa numuu guerra dí narígá náa Ucrania:

•   “Bi̱ kayá edxu̱u̱ náa guʼwá ndxajkuun Ortodoxa dí rígá náa Rusia, Patriarca Kirill, nda̱a̱ rí niʼthí kayuuʼ ga̱jma̱a̱ numuu guerra dí nigíʼdu̱u̱ xa̱bu̱ ñajunʼ Rusia [...]. Dí niʼtáriga̱ minduwaʼ ga̱jma̱a̱ numuu Ucrania rúʼko̱ nimbáyúu Putin mu maʼthí rí májánʼ má nindxu̱u̱ guerra dí naʼni” (EUobserver, 7 ñajunʼ gu̱nʼ marzo tsiguʼ 2022).

•   “Patriarca Kirill [...] niʼni tsiakimínaʼ masngájma rí májánʼ má nindxu̱u̱ guerra dí narígá náa Ucrania, naʼthí dí tsiakii rí nuni mu maguma gámbáa aʼkhá” (AP News, 8 ñajunʼ gu̱nʼ marzo tsiguʼ 2022).

•   “Nákha lunes bi̱ kayá edxu̱u̱ náa guʼwá dxájkuun Ortodoxa dí rígá náa Ucrania, metropolitano Epifanio I náa xuajen Kiev, niʼni tsajkurámiin xa̱bu̱ mu magún gugiʼdu̱u̱n gajmiún soldados rusos. Ma̱ngaa niʼthí rí muradíin soldados rusos na̱nguá má nindxu̱u̱ ra̱májánʼ” (The Jerusalem Post, 16 ñajunʼ gu̱nʼ marzo tsiguʼ 2022).

•   “Ikháanʼxu numbáñúún soldados bi̱ kúwá náa Ucrania ga̱jma̱a̱ eʼwíinʼ xa̱bu̱ bi̱ nuyambáá. Nuni tsajkhurámiin mu maʼngu̱u̱n muni gajmiún xa̱bu̱ tsianʼ ga̱jma̱a̱ nutajkháanʼxu ga̱jma̱á numún” (Declaración del Consejo de Iglesias y Organizaciones Religiosas de Ucrania, a 24 ñajunʼ gu̱nʼ febrero tsiguʼ 2022).

 Ndiéjunʼ tatsaʼwáminaʼ ikháán rá. Lá májánʼ dí religión bi̱ nuthíí rí nuni dí nandoo Cristo mutsudiin xa̱bu̱ mu magún náa guerra ráʼ. Ndiéjunʼ eʼthí náa Biblia rá.

Rí xóo niʼni religión náa guerra dí ni̱ʼkha̱ rarígá

 Tsiguʼ rí ninújngo̱o̱, religión niʼthí rí májánʼ má nindxu̱u̱ guerra dí narígá rí asndu nutsudiin xa̱bu̱ mu magún náa guerra mu xúʼko̱, maʼngo̱o̱ marigá rí tsímáá. Asndu nákha wajyúuʼ testigos de Jeobá nimbañúún xa̱bu̱ mbuyáá dí raʼkhí nindxu̱u̱ dí nuni religión. Atayáá tikhu rí naʼthí náa i̱yi̱i̱ʼ dí nirawíxu.

•   Artículo rí mbiʼyuu “Las cruzadas: ‘trágica ilusión’” nasngájma xú káʼnii religión católica romana nijmuu mbiʼyuu Dios ga̱jma̱a̱ Cristo mu maʼni guerra.

•   Artículo rí mbiʼyuu “La Iglesia Católica y África” naʼthí xú káʼnii religión táʼngo̱o̱ gasijijthu̱u̱n rí xóo niradimíjná xa̱bu̱.

•   Artículo rí mbiʼyuu “¿Tiene la culpa la religión?”, “El papel de la religión en las guerras” ga̱jma̱a̱ “La religión toma partido” naʼthí rí bi̱ kuya̱ edxu̱u̱ náa religión católica, ortodoxa ga̱jma̱a̱ protestantes niyambáá náa guerra.

Lá gíʼmaa cristianos muñambáá náa guerra ráʼ.

 Rí niʼsngáa Jesús: “Gaʼndaaʼ xtayáá xa̱bu̱ numba ga̱jma̱a̱ʼ xó má eyaaʼ xtayaminaʼ ikháán” (Mateo 22:39). “Gaʼndala ku̱ñu̱u̱n má xúʼko̱ bi̱ tsíñún gúyala” (Mateo 5:44-47).

 Rí niʼsngáa Jesús: “Náa Matañájunʼ na̱nguá rígá náa numbaaʼ rígi̱. Á mu rígá náa numbaaʼ rígi̱, xa̱bi̱ʼ muxmijná mu ikhúúnʼ xájuixnájxu̱u̱n” (Juan 18:36). “Xúgíinʼ bi̱ najmún espada, espada má gákháñún ga̱jma̱a̱” (Mateo 26:47-52).

 Rí gíʼmaa ma̱ta̱ya̱a̱: Á mu xa̱bi̱i̱ Jesús taʼyóoʼ muxmijná mu muñewa̱a̱n, lá mbaʼyóoʼ magún guxmijná ga̱jma̱a̱ i̱mba̱ numuu xáʼ. Araxnuu artículo rígi̱ “El cristianismo y la guerra: ¿son compatibles?” mu ma̱ta̱ya̱a̱ rí xa̱bi̱i̱ Jesús bi̱ nikúwá nákha wajyúuʼ ninimbu̱ún dí niʼsngáa Ikhaa ma̱ngaa ndiyaridáá.

Ndiéjunʼ gágíʼnuu religión bi̱ nutsudiin xa̱bu̱ magún guerra rá.

 Náa Biblia naʼthí rí Dios tsíyóo gáʼyoo religión bi̱ naʼthíí rí naʼnimbo̱o̱ kaʼyoo Jesús mu rí naʼni nasngájma rí tseʼnimbánuu rí ikhaa niʼsngáa (Mateo 7:21-23; Tito 1:16).

•   Náa libro ndrígóo Apocalipsis naʼthí rí Dios naʼni aʼkhúun religión ga̱jma̱a̱ numún “xúgíinʼ bi̱ niradíin náa tsu̱du̱u̱ ku̱ba̱ʼ” (Apocalipsis 18:21, 24). Mu ma̱ta̱ya̱a̱ náá numuu, araxnuu artículo rígi̱: “¿Qué es Babilonia la Grande?”

•   Jesús niʼthí rí xúgíʼ religión rí Dios tsíyóo gáʼyoo maguma gámbáa ga̱jma̱a̱ numuu xúgíʼ dí ra̱májánʼ niʼni. Xó má mbá ixi̱ rí ni̱ʼga̱, ra̱májánʼ má xndúu ejmaa ixi̱ rúʼko̱ “nuthu ga̱jma̱a̱ najti náa aguʼ” (Mateo 7:15-20). Ma̱ndoo maraxnuu artículo “¡Se acerca el fin de la religión falsa!” mu ma̱ta̱ya̱a̱ xú káʼnii gárígá rígi̱.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images