Náa xúgííʼ numbaaʼ, mbaʼin xa̱bu̱ bi̱ nuthi dí nagún kidxuuʼ Jesucristo, mú nuxudamíjna̱ náa política. Tikhuun xa̱bu̱ nuthi ga̱jma̱a̱ numuu religión ndrígu̱ún mu mumbañún bi̱ nandún mudrigú mbá ñajunʼ o numbayíí mbáa partido político. Ma̱ngaa político nuthi ga̱jma̱a̱ numuu xkujndu dí rígá náa xuajen o xóo eni̱ xa̱bu̱ mu xúʼko̱ magún kidxúúnʼ. Nguáná tikhuun bi̱ kuya̱ edxu̱u̱ náa mbá religión nuxudami̱jna̱ náa política mu mani̱ndxu̱ún presidente. Ga̱jma̱a̱ náa tikhu xuajen dí mani̱ndxa̱a̱ʼ “cristiano” nduyáá dí gíʼdoo wéñuuʼ numuu.

 Ndiéjuunʼ tatsaʼwáminaʼ ikháán rá. Lá ndayóoʼ muxudami̱jna̱ náa política bi̱ nagún kidxuuʼ Jesucristo ráʼ. Ndiéjuunʼ niʼni Jesús rá. Ikhaa niʼthí: “Ikhúúnʼ niʼgíʼ xkri̱da mu mu̱ni̱ xó má rí ikhúúnʼ ninia̱la” (Juan 13:15). Guʼyáá xkri̱da dí nigíʼ Jesús ga̱jma̱a̱ numuu política.

 Na̱nguá, Jesús nditháan takudaminaʼ náa política.

 Jesús na̱nguá ndiyáʼ maʼtáñajunʼ náa numbaaʼ. Índo̱ Gixa̱a̱ niʼthúun Jesús dí ma̱ndoo maʼtáñajunʼ náa “xúgíʼ xuajen mba̱ʼu̱ dí rígá”, ikhaa niʼni gaʼdu̱u̱n dí maʼtáñajunʼ náa numbaaʼ rígi̱ (Mateo 4:8-10). a Mbóoʼ mbiʼi, xa̱bu̱ ndiyáá dí Jesús ma̱ndoo mani̱ndxu̱u̱ mbáa májáanʼ xa̱bu̱ ñajunʼ, ikhaa jngóo asndu nigíʼ muxtumaa mato̱ʼo̱o̱ náa política. Náa Biblia naʼthí dí índo̱ “Jesús ndiʼyoo má rí inu maguwáʼ gúyáa ga̱jma̱a̱ tsiakii mu manidxu̱u̱ rey, ikha jngóo mbu̱júu̱ʼ nitsimuu mbáwíí náa kúbá” (Juan 6:15). Jesús táʼni dí nindúún xa̱bu̱ ga̱jma̱a̱ niʼni gaʼdu̱u̱n má xúʼko̱ dí makudaminaʼ náa política.

 Jesús na̱nguá niyambáá náa nimbá política. Mbá xkri̱da, nákha nixtáa Jesús, judíos na̱nguá nigu̱u̱nʼ muni numún xa̱bu̱ ñajunʼ Roma, asndu nakumu̱ún dí nagajtakáñúúnʼ mbújku̱ún á mu nuni̱ numún. Índo̱ nirajxi̱i̱ ga̱jma̱a̱ numuu rígi̱, Jesús tándoo makudaminaʼ náa xkujndu rúʼko̱. Ikhaa niʼthún: “Guxna̱a̱la César rí kaʼyoo má César, mú guxna̱a̱ Dios rí kaʼyoo má Dios” (Marcos 12:13-17). Ikhaa niwi̱ji̱ jmbu, mú ma̱ngaa nisngájma dí ndayóoʼ muni numáá dí gúthi xa̱bu̱ ñajunʼ romanos, xóo muʼthá César, bi̱ naʼtáñajunʼ nákha ikhú. Gajkhun má dí ndayóoʼ munimbu̱ún kuñún xa̱bu̱ ñajunʼ, mú awáán gíʼmaa maʼni, numuu dí mbawíí Dios gíʼmaa mbuyamajkuíí (Mateo 4:10; 22:37, 38).

 Jesús niʼthí ga̱jma̱a̱ numuu Xa̱bu̱ Ñajunʼ ndrígóo Dios bi̱ xtáa mekhuíí (Lucas 4:43). Ikhaa tákudaminaʼ náa política numuu dí ndaʼyoo rí xa̱bu̱ bi̱ nutañajunʼ náa numbaaʼ rígi̱ xáʼngu̱u̱n gúni dí nandoo maʼni Dios náa tsu̱du̱u̱ Ku̱ba̱ʼ, dí i̱ndó Reino ndrígóo Dios maʼngo̱o̱ maʼni (Mateo 6:10). Ma̱ngaa ndiʼyoo dí Dios mariʼkuwíín xa̱bu̱ ñajunʼ numbaaʼ mu magíiʼ reino ndrígóo ikhaa (Daniel 2:44).

 Na̱nguá, xa̱bi̱i̱ Jesús ninimbu̱ún kiʼtáñajunʼ ndrígóo dí xánindxu̱ún náa numbaaʼ rígi̱ (Juan 15:19). Ikhiin ndiyaridáá Jesús ga̱jma̱a̱ táxudami̱jna̱ náa política (Juan 17:16; 18:36). Nigíʼ ninimbaníí dí niʼthí Jesús, dí mutaraʼa ga̱jma̱a̱ musngáa ajngáa rí májánʼ ga̱jma̱a̱ numuu Reino ndrígóo Dios (Mateo 28:18-20; Hechos 10:42).

 Timbíin cristianos bi̱ nikúwá ndiyáá dí itháán gíʼdoo numuu munimbu̱ún kuyáá Dios, mú ma̱ngaa ndiyáá dí ndayóoʼ munimbu̱ún kuñún xa̱bu̱ ñajunʼ bi̱ kúwá náa numbaaʼ rígi̱ (Hechos 5:29; 1 Pedro 2:13, 17). Ikhaa jngóo ninimbu̱ún xtángoo ga̱jma̱a̱ nini̱ numáá dí ninda̱ʼa̱ xa̱bu̱ ñajunʼ (Romanos 13:1, 7). Gajkhun má dí na̱nguá nixudami̱jna̱ náa política, mú nimbáñún mangiin dí nigíinʼ bi̱ muñewa̱a̱n xuajen ga̱jma̱a̱ i̱ʼwáʼ ñajunʼ dí nirígá eʼni xa̱bu̱ ñajunʼ (Hechos 25:10, 11; Filipenses 1:7).

 Náa Biblia nasngájma kaʼwu dí Jesús ni má timbíin xa̱bi̱i̱ táxudami̱jna̱ náa política. Ikhaa jngóo bi̱ nindxu̱ún testigos de Jeobá bi̱ kúwíin náa xúgííʼ numbaaʼ na̱nguá xudami̱jna̱ náa política numuu dí nunimbu̱ún dí niʼthí Jesucristo. Xó má nini cristianos bi̱ nikúwá nákha timbá siglo, testigos de Jeobá nuni̱ mbá tsiaki̱i̱ muni ñajunʼ dí Jesús nixnún, dí mutaraʼa “ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios” (Mateo 24:14).