Xa̱bo̱ ede̱ tsí nuthúún Naciones Unidas nuthan rí:

•   Mbiʼi 7 asndo mbiʼi 23 i̱ka̱ ñajuun go̱nʼ octubre tsigu 2023, xkujndu rí gíʼdoo xuajen Gaza ga̱jma̱á xuajen Israel neʼne ne̱ rí nanújngoo mbá 6.400 xa̱bo̱ nijáñúú jamí mbá 15.200 xa̱bo̱ nijámbiñúú, mbaʼiin xa̱bo̱ tsúʼkhue̱n nda̱a̱ aʼkhúun. Jamí mangaa mbaʼiin mi̱ndaʼkho xa̱bo̱ nagájnúú nagóó gájúwa̱ʼ i̱mba̱ janíí.

•   Asndo nákhí ni̱gi̱ʼdu̱u̱n xkujndu rí gíʼdoo xuajen Rusia ga̱jma̱á xuajen Ucrania asndo mbiʼi 23 i̱ka̱ ñajuun go̱nʼ septiembre tsigu 2023, na’ne máʼ 9.701 xa̱bo̱ nijáñúú jamí ná Ucrania nijámbiñúú mbá 17.748 xa̱bo̱.

 Á ríga̱ mbá rí naʼthán Ajngóo Ana̱ʼlóʼ ma̱goo mambáñúú xa̱bo̱ tsí numíni̱í eʼne xkujndu rá.

 Ajngáa Rawuun Ana̱ʼlóʼ naʼthán rí Ana̱ʼlóʼ ma̱ʼne gámba̱a̱ xkujndu rí ríga̱ ná xúgíí numbaa (Salmo 46:9). Jngó ma̱goo ma̱ʼnii̱ ríge̱ʼ, ginii mariʼkhu ri̱ñii xa̱bo̱ ñajon numbaa ga̱jma̱á mbáa xabo̱ ñajon tsí xtáa mikhuíí: Xa̱bo̱ ñajon tsí niʼgíi̱ má’ ikhaa̱ (Daniel 2:44). Xa̱bo̱ Ñajon tsí niʼgíi̱ Ana̱ʼlóʼ ma̱ʼne rí ná xúmíni̱í xa̱bo̱.

 Athiyáá rí ma̱ʼne Jesukrísto̱, Xa̱bo̱ Ñajon tsí niʼgíi Ana̱ʼlóʼ:

•   “Ma̱ʼne jríya̱ʼ tsí ngínáa nandxaʼwá ska mi̱thambáyíi, xúʼkhue̱n máʼ tsí naxrígú mina̱ʼ jamí tsí ndawa̱a̱ nimbáa tsí mambáyúu. Ma̱ñáwíin a̱kui̱in jaʼyoo xa̱bo̱ tsí naxrígú mina̱ʼ jamí tsí ngínáa mangaa, ma̱ʼne jríñii tsí ngíníi. Ma̱ʼne jríñi̱i inúú xúgíin tsí nune̱ ngíníi jamí núñúu nikhuáa̱” (Salmo 72:12-14).

 Ana̱ʼlóʼ ma̱ʼne rí Xa̱bo̱ ñajon tsí niʼgíi ma̱ʼne gámba̱a̱ xúgíí jamínu̱ʼ jamí tsijíná rí ríga̱ eʼne xkujndu.

•   “Ana̱ʼlóʼ maxúdíi iyoo idúu̱n, jamí ná xájáñúu, ná xáthájuíin a̱kuíi̱n jamí ná xúmbiye̱e̱ʼ, ni máʼ xáríga̱ gaʼkho̱. Numuu rí wámba̱a̱ máʼ xúgíí rí niríga̱ ginii” (Apocalipsis 21:4).

 Nangiyuu má mbiʼi rí Xa̱bo̱ Ñajon tsí niʼgíi Ana̱ʼlóʼ ma̱ʼne rí mbrútu jayu gájuwalóʼ xó rí xúge̱ʼ. Xáne iʼyáálóʼ rúʼkhue̱n rá. Numuu rí Ajngóo Ana̱ʼlóʼ wapha máʼ niʼthán rí ma̱ri̱gá xkujndu rí nduʼyáálóʼ xúge̱ʼ (Mateo 24:6). Ríge̱ʼ jamí iʼwá rí naríga̱ mbiʼi xúge̱ʼ nasngájmalóʼ rí na̱ka̱ rámba̱ mbiʼi rí júwa̱ʼ xa̱bo̱ ñajon numbaa (2 Timoteo 3:1).