Éxodo 15:1-27
15 Nákhá mbiʼi rúʼko̱, Moisés gajmíi̱n israelitas nini̱ ajmúú rígi̱ náa inuu Jeobá:
“Ma̱ni̱ ajmúú náa inuu Jeobá numuu rí niʼngo̱o̱ nidaʼ ga̱jma̱a̱ tsiaki̱i̱ ndrígóo.
Wáyú ga̱jma̱a̱ bi̱ kudrúwíin nidami̱ʼi̱i̱n náa lamáa.*
2 Tsiaki̱i̱ ndrígóʼ ga̱jma̱a̱ bi̱ nañewu̱nʼ nindxu̱u̱ Jeobá,* numuu rí ikhaa ni̱jkha̱nú niʼni kríñúuʼ.
Ikhaa nindxu̱u̱ Dios ndrígóʼ, ikhúún ma̱ni̱ mba̱a̱. Ikhaa nindxu̱u̱ Dios ndrígóo anu̱ʼ,* ikhúún maxnu̱u̱ gamajkhu.
3 Jeobá tsémiñuu maxmínaʼ. Jeobá mbiʼyuu.
4 Náa lamáa nidama̱ʼa̱ káriúu faraón gajmíi̱n soldado ndrígóo,Xa̱bi̱i̱ bi̱ najmañún itháan nuxmijná nirgu̱ʼwi̱i̱n náa lamáa Mañaʼ.*
5 Tsiaki̱i̱ ndrígóo iyaʼ dí naʼbajxu̱u̱ niruguaru̱wi̱i̱n, nirmíʼíin náa awúu̱n iyaʼ xó mbá itsí.
6 Ñawún májáanʼ Tátá Jeobá, ra̱ʼkhá tháán gíʼdoo tsiaki̱i̱.Ñawún májáanʼ Tátá Jeobá, narujkuri̱gi̱i̱n xa̱bu̱ sia̱nʼ.
7 Nda̱wa̱a̱ imba̱a̱ xóo ikháán, natadati̱gi̱i̱n mbayííʼ bi̱ tsíñún gúyáaʼ.Rí nakasngáña̱a̱ʼ nindxu̱u̱ xóo aguʼ, natsikhíin xóo rajxa̱.
8 Ikháán nitandiyíí iyaʼ ga̱jma̱a̱ niguájun xóo xtájtsí,nitani̱ dí lamáa maʼni wíyúu, ga̱jma̱a̱ ikhaa nigi̱ʼi̱ togóo.Iyaʼ rí naʼbajxu̱u̱ nijxaa náa a̱jkiu̱u̱n lamáa.
9 Xa̱bu̱ sia̱nʼ niʼthí: ‹¡Maʼgá raxkhúún! ¡Maʼngo̱ʼ maʼgá xkámii!
¡Maruiʼta̱a̱ dí magruigú káñún asndu xóo má gáʼndoʼ!
¡Maxmatriyaʼ espada ndrígóʼ! ¡Ñawúnʼ maʼni gámbíin!›.
10 Ikháán nitandiyíí lamáa ga̱jma̱a̱ ikhaa niruguamíʼíin.Ikhiin nirmíʼíi̱n xóo mbá ajua̱nʼ rí ki̱wu̱n náa awúu̱n iyaʼ rí naʼbaxu̱u̱.
11 Lá xtáa imba̱a̱ dios xóo ikháán ráʼ Tátá Jeobá.
Lá xtáa imba̱a̱ bi̱ nasngájma dí ra̱ʼkhá tháán kaʼwii xóo ikháán ráʼ.
I̱ndó ikháán kaʼyaaʼ rí mamíñúún kuyaaʼ ga̱jma̱a̱ muni̱ mba̱a̱ ga̱jma̱a̱ ajmúú, ikháán bi̱ natani̱ xúgíʼ enii rí mitsaanʼ.*
12 Nitaxuriya̱ʼ ñawún májáanʼ, ikhú ku̱ba̱ʼ niʼkurajngiún.
13 Ga̱jma̱a̱ ngajua rí tsétumuu* niraxná ikhúún xa̱bu̱ xuajñaanʼ.Ga̱jma̱a̱ tsiaki̱i̱ ndrígáaʼ nidxu̱ʼ xtiin náa xtaa rí nindxu̱u̱ mikaʼwu.
14 Xúgíʼ xuajin mbaʼyóoʼ maʼdxawuun rígi̱. Ikhiin mamiñún.Gamíi* rígi̱ marigá náa awúu̱n a̱jkiu̱ún xúgíinʼ xa̱bu̱ filisteo.
15 Mbiʼi rúʼko̱, xa̱bu̱ bi̱ kuya̱ edxu̱u̱ náa Edom ra̱ʼkhá tháán gámíñún.Xa̱bu̱ ñajunʼ Moab bi̱ guáʼdáá tsiaki̱i̱ mamiñún asndu maguíʼiin.
Xúgíinʼ xa̱bu̱ Canaán ní xáguaʼdáá tsiaki̱i̱.
16 Ikhiin mamiñún wéñuuʼ rí asndu maguíʼíin.
Tsiaki̱i̱ ndrígóo ñawáanʼ maʼni rí maguanún xóo mbá itsí,asndu índo̱ gánújngoo xuajñaanʼ, Tátá Jeobá,asndu índo̱ gánújngoo xuajin dí nitraʼwíi.
17 Tátá Jeobá, ikháán mi̱dxu̱ʼ xtiin náa kúbá ndrígáaʼ,náa mbaaʼ rí ikháán nitani̱ májáánʼ maraxtaa,náa guʼwáaʼ rí mikaʼwu Tátá Jeobá, rí ikháán mína̱a̱ʼ nitani̱.
18 Jeobá nindxu̱u̱ bi̱ maʼtáñajunʼ asndu kámuu.
19 Índo̱ wáyúu faraón ga̱jma̱a̱ carro dí naʼni ga̱jma̱a̱ guerra ma̱ngaa xa̱bi̱i̱ bi̱ kudrúwíin wáyú nitu̱ʼu̱u̱n náa lamáa,Jeobá niʼni rí iyaʼ matanga̱a̱ ga̱jma̱a̱ maruguamíʼíin,mú xa̱bu̱ xuajin Israel ninújngún náa ku̱ba̱ʼ mijxooʼ* náa tapo̱o̱ lamáa”.
20 Ikhú Míriam bi̱ nindxu̱u̱ profetisa,* ndxájuu Aarón, niguajthun mbá pandereta, xúʼko̱ má nini̱ xúgíinʼ gu̱ʼu̱ nigájnún kidxuuʼ rudi̱i̱ pandereta ga̱jma̱a̱ nitsia.
21 Míriam niriʼñúún xa̱bekha ga̱jma̱a̱ ajmúú rígi̱:
“Gu̱ni̱ ajmúú náa Jeobá, numuu rí niʼni dí majmaʼniiʼ.
Wáyú ga̱jma̱a̱ bi̱ kudrúwíin nidami̱ʼi̱i̱n náa lamáa”.
22 Nda̱wa̱á, Moisés nigájnuu kagui̱i̱n xa̱bu̱ Israel náa lamáa Maña̱ʼ. Ni̱jkha̱ kagui̱i̱n náa ku̱ba̱ʼ mijxooʼ ndrígóo Sur, mbá ajtsú mbiʼi nigún rágúu̱nʼ ga̱jma̱a̱ na̱nguá nixkamaa iyaʼ muwa̱a̱n.
23 Ikhú niguánú náa Mará,* mú na̱nguá nindoo muwa̱a̱n iyaʼ dí rígá náa Mará numuu rí miʼkhu̱u̱n. Ikha jngóo, ikhaa nixná mbiʼyuu Mará mbaaʼ rúʼko̱.
24 Ikhú xa̱bu̱ xuajin nigíʼdi̱i̱ nixieʼkhá inuu Moisés. Nitháán: “Dí gúwánxu rá.”
25 Moisés nindo̱ʼo̱o̱ Jeobá rí mambáyúu ga̱jma̱a̱ Jeobá ni̱jkha̱ kayáa náa wíji̱ mbá ixi̱. Ikhú Moisés nidama̱ʼa̱ náa iyaʼ ga̱jma̱a̱ iyaʼ niʼni̱i̱ miʼtsí.*
Ikhí Dios nigíʼ mbá xtángoo, mbá rí ikhiin mbaʼyóoʼ munimbáníí, mu mbaʼyoo á mu munimbu̱u̱n kuyáá.
26 Niʼthúún: “Á mu nudxawíínla aʼwóo Jeobá Dios ndrígala ga̱jma̱a̱ nu̱ni̱ xó má ikhaa nanigu̱u̱ʼ, á mu nuʼgíʼ e̱dxa̱la náa kiʼtáñajunʼ ndrígóo ga̱jma̱a̱ nunimbaníí xúgíʼ xtángoo ndrígóo, ikhúún xakuʼmá nimbá nandii náa ikháanʼla xóo rí nikuʼmá náa xa̱bu̱ egipcios, numuu rí ikhúún, Jeobá, xtáá ra̱ni̱ dí maʼni̱i̱ a̱jkia̱la”.
27 Nda̱wa̱á dí nirígá rígi̱, niguáʼnú náa Elim, náa rígá mbá 12 iduu iyaʼ ga̱jma̱a̱ mbá 70 palmeras. Nigi̱ʼi̱i̱n ikhí náa mijngii rígá iyaʼ.
Mbaʼa nota
^ O “mar”.
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ O “táteʼ”.
^ O “mar Rojo”.
^ O “nagui̱i̱”.
^ Náa ajngáa hebreo naʼthí, “gaʼkhu̱u̱ ada̱”.
^ O “desierto”.
^ O “gaʼyee, bi̱ naʼthí dí marigá”.
^ Rí nandoo gáʼthúu̱n ‹mi̱ʼkhu̱u̱n›.
^ O “ndasko̱ʼ”.
