Éxodo 18:1-27
18 Índo̱ Jetró ndxajkun bi̱ xtáa náa Madián jmégiu̱u̱ Moisés, niʼdxawuun xúgíʼ rí Jeobá niʼni ga̱jma̱a̱ numuu Moisés ma̱ngaa numuu xuajin Israel. Ma̱ngaa niʼdxawuun xú káʼnii niguwíin xa̱bu̱ israelita náa Egipto.
2 Moisés nikuʼmaa Ziporá bi̱ nindxu̱u̱ a̱ʼgiu̱u̱, maʼga̱a̱ náa goʼwóo Jetró, jmégiu̱u̱ Moisés, ikhaa niñewu̱u̱n,
3 xúʼko̱ má niñewu̱u̱n a̱jmi̱i̱n e̱ji̱i̱n ma̱ngaa. Moisés nixná mbiʼyuu Guersom* mbáa rí ikhiin, numuu rí niʼthí: “Nijkhánú ninindxu̱ʼ mbáa xa̱bu̱ na̱ʼkha̱á náa ku̱ba̱ʼ rígi̱”.
4 Imba̱a̱ nixná mbiʼyuu Eliezer* numuu rí niʼthí: “Dios ndrígóo anu̱ʼ* nindxu̱u̱ bi̱ nimbáyuʼ, ikhaa niʼni kríñúunʼ náa espada ndrígóo faraón”.
5 Ikhú Jetró bi̱ nindxu̱u̱ jmégiu̱u̱ Moisés nigájnuu ni̱jkha̱ kagui̱i̱n e̱ji̱i̱n ga̱jma̱a̱ a̱ʼgiu̱u̱ Moisés, mu maʼga gáʼyoo náa xtáa, náa ku̱ba̱ʼ mijxooʼ* náa mijngii kúbá ndrígóo Dios bi̱ gajkhun.
6 Ikhú nikuʼma ajngáa rígi̱ náa inuu Moisés: “Ikhúún Jetró bi̱ nindxu̱ʼ jmégia̱a̱ʼ, na̱jkhá má kamba̱a̱ gajmínʼ e̱jña̱a̱ʼ ma̱ngaa a̱ʼgia̱a̱ʼ mu maʼgá gáyáaʼ”.
7 Mbá nacha̱ Moisés nigájnuu gágruiguíi jmégiu̱u̱, nismbáti̱go̱o̱ inuu ga̱jma̱a̱ nixnúu beso ma̱ngaa niraximíjna̱ xú káʼnii kúwá, nda̱wa̱á nitu̱ʼu̱u̱n náa guʼwá xtíin.
8 Moisés niʼthúu̱n jmégiu̱u̱ xúgíʼ rí Jeobá niʼni ga̱jma̱a̱ faraón náa Egipto mu mambáñún xa̱bu̱ Israel. Ma̱ngaa niʼthúu̱n xúgíʼ gaʼkhu dí niraʼnuu náa ni̱ʼkha̱ ragi̱ʼi̱ ga̱jma̱a̱ xú káʼnii Jeobá nimbáyúu.
9 Jetró nidxuu ga̱jma̱a̱ numuu xúgíʼ rí májánʼ dí Jeobá niʼni ga̱jma̱a̱ numún xa̱bu̱ Israel, mu maʼni káwíin náa Egipto.
10 Ikhú Jetró niʼthí: “Gaguma mba̱a̱ Jeobá, bi̱ niʼni kríña̱a̱nʼ náa Egipto náa ñawúunʼ faraón ga̱jma̱a̱ niʼni káwíin xa̱bu̱ xuajin bi̱ numíniiʼ náa Egipto.
11 Rí xúgi̱ nda̱yo̱o̱ dí Jeobá nindxu̱u̱ itháan mba̱a̱ ki xóo eʼwíinʼ dioses. Nda̱yo̱o̱ rígi̱ ga̱jma̱a̱ numuu rí niʼniúún bi̱ nini̱ gíníi xa̱bu̱ xuajñuu”.
12 Nda̱wa̱á Jetró, jmégiu̱u̱ Moisés, ni̱jkha̱ kayáa mbáa xujkhúʼ bi̱ matsikarámáaʼ xóo tsigijñaʼ ga̱jma̱a̱ imba̱a̱ bi̱ maxnájxi̱i̱ náa inuu Dios. Aarón ga̱jma̱a̱ xúgíinʼ bi̱ kuya̱ edxu̱u̱ náa Israel nigún guphiʼtsu gajmiún jmégiu̱u̱ Moisés náa inuu Dios bi̱ gajkhun.
13 Imbo̱o̱ mbiʼi, Moisés nigi̱ʼi̱ xó má naguʼwuun naʼni mu maʼnimbánuu numún xa̱bu̱ xuajin. Nagi̱ʼi̱ miʼcha̱ asndu wakhíʼ ga̱jma̱a̱ xa̱bu̱ nagún má xúʼko̱ náa inuu Moisés.
14 Índo̱ jmégiu̱u̱ Moisés ndiʼyoo xúgíʼ dí ikhaa naʼni ga̱jma̱a̱ numún xa̱bu̱ xuajin, ikhú nirajxu̱u̱: “Dí tani̱ gajmiáanʼ xa̱bu̱ xuajin rá. Náá numuu rí mbáwíín xtaʼwún gi̱i̱ ga̱jma̱a̱ xúgíinʼ xa̱bu̱ naguwáʼ gúyáaʼ ikháán miʼcha̱ asndu wakhíʼ rá.”
15 Moisés niriʼñuu jmégiu̱u̱: “Numuu rí xa̱bu̱ xuajin naguwáʼ náa ikhúún mu mbuyáʼ ikha ndrígóo Dios.
16 Índo̱ a̱jmi̱i̱n xa̱bu̱ naguáʼdáá xkujndu naguwáʼ gúthu̱nʼ ga̱jma̱a̱ ikhúún ndaʼyóoʼ manimbánuu numún ga̱jma̱a̱ mathu̱u̱n ndiéjunʼ dí niraʼwíí maʼni Dios bi̱ gajkhun ga̱jma̱a̱ xú káʼnii nindxu̱u̱ xtángoo ndrígóo”.
17 Jmégiu̱u̱ Moisés niʼthúu̱n: “Raʼkhí xóo xtaa ratani̱.
18 Maʼni néʼnga̱a̱ʼ xó má ikháán ga̱jma̱a̱ xa̱bu̱ bi̱ xtaa gajmiáanʼ. Nindxu̱u̱ mbá ñajunʼ dí mba̱a̱ wéñuuʼ, xáʼnga̱a̱ʼ gátanimbaníí mbáwíín.
19 Atadxawíín consejo rí maxna̱a̱ʼ ga̱jma̱a̱ Dios maxtáa ga̱jma̱á nindxa̱a̱ʼ. Ikháán maratha̱a̱n Dios bi̱ gajkhun ga̱jma̱a̱ numún xa̱bu̱ xuajin. Náa Dios bi̱ gajkhun mbaʼyóoʼ mi̱dxu̱ʼ xtaaʼ xkujndu ndrígún ikhiin.
20 Mbaʼyóoʼ marasngúún ndiéjunʼ nindxu̱u̱ dí niraʼwíí maʼni ga̱jma̱a̱ xtángoo ndrígóo, xú káʼnii gíʼmaa makuwá ga̱jma̱a̱ ndiéjunʼ dí gíʼmaa muni̱.
21 Mbaʼyóoʼ matraʼwíin xa̱bu̱ bi̱ kúwá náa xuajin bi̱ majmiin muni̱ ñajunʼ rígi̱, bi̱ namiñún kuyáá Dios, bi̱ kaʼnii maku̱ma̱a̱ʼ xtañún, bi̱ muni̱ gáʼdu̱u̱nʼ mundrígú dí rakáʼñún. Mbaʼyóoʼ matadri̱gi̱i̱n náa xa̱bu̱ xuajin mu muyégún edxu̱u̱ náa mámbá mil xa̱bu̱, náa mámbá cien, náa mámbá cincuenta ga̱jma̱a̱ náa mámbá gu̱wi̱i̱nʼ.
22 Ikhiin mbaʼyóoʼ munimbaníí numún xa̱bu̱ índo̱ gáguwáʼ guxrui̱ga̱ ga̱jma̱a̱ numuu xkujndu rí guáʼdáá. Á mu xkujndu nindxu̱u̱ mingíjyúuʼ maguwáʼ náa ikháán mu matanimbaníí, á mu na̱nguá munimbaníí má ikhiin. Mu xúʼko̱ mumbayáaʼ ga̱jma̱a̱ ñajunʼ rígi̱ mu xáʼniaaʼ mingíjyúuʼ ikháán.
23 Á mu natani̱ xígi̱ kaʼnii ga̱jma̱a̱ á mu Dios naʼtháanʼ rí ma̱ndoo matani̱, maʼnga̱a̱ʼ matanimbaníí ñajunʼ rígi̱ ga̱jma̱a̱ xúgíinʼ xa̱bu̱ magúu̱n tsímáá náa guʼwún”.
24 Mbá nacha̱ má, Moisés nigruigú consejo dí nixnúu jmégiu̱u̱ ga̱jma̱a̱ niʼni xúgíʼ xó má ikhaa niʼthúu̱n.
25 Ikhú náa xúgíʼ Israel niraʼwíin xa̱bu̱ bi̱ majmiin muni̱ ñajunʼ rígi̱, nigruigi̱i̱n dí mbu̱ya̱ edxu̱u̱ náa xuajin: Náa mámbá mil xa̱bu̱, náa mámbá cien, náa mámbá cincuenta ga̱jma̱a̱ náa mámbá gu̱wi̱i̱nʼ.
26 Ikhiin nunimbaníí numún xa̱bu̱ índo̱ nagún guxrui̱ga̱ ga̱jma̱a̱ numuu xkujndu dí guáʼdáá. Rí mingíjyúuʼ nagún náa inuu Moisés mu maʼnimbánuu, dí na̱nguá ma rá, nunimbaníí má ikhiin.
27 Nda̱wa̱á dí nirígá rígi̱, Moisés niʼtángawuu jmégiu̱u̱ ga̱jma̱a̱ ikhaa nitanga̱a̱ náa xuajñuu.
Mbaʼa nota
^ Rí nandoo gáʼthúu̱n ‹xa̱bu̱ na̱ʼkha̱á náa ku̱ba̱ʼ rígi̱›.
^ Rí nandoo gáʼthúu̱n ‹Dios nindxu̱u̱ bi̱ nambáyuʼ›.
^ O “táteʼ”.
^ O “desierto”.
