Timbá libro ndrígóo Crónicas 10:1-14
-
Nakáñuu Saúl gajmíi̱n eji̱i̱n (1-14)
10 Rí xúgi̱ filisteos kúwá ruxmijná gajmiún israelitas. Israelitas nigáñún nini̱ filisteos ga̱jma̱a̱ mbaʼin wéñuuʼ nikháñún náa kúbá Guilboa.
2 Filisteos nigún ruxkáá mijngii xígi̱ Saúl gajmíi̱n e̱ji̱i̱n ga̱jma̱a̱ niʼngu̱u̱n nixiyáa Jonatán, Abinadab ga̱jma̱a̱ Malki-Súa, e̱ji̱i̱n Saúl.
3 Rí nigiʼdu̱u̱n gajmiún Saúl niʼni gakhi̱i̱ wéñuuʼ. Bi̱ kuda xkamídá ndiyáá ga̱jma̱a̱ nini̱ gawíínʼ.
4 Ikhú Saúl niʼthúu̱n bi̱ kayá escudo ndrígóo: “Atríya̱ʼ espadaaʼ ga̱jma̱a̱ ataxkruaʼa jngañún. Tsíyóʼ dí xa̱bu̱ bi̱ túthu xtóo xuyuuʼ tsáʼkhún maguwáʼ ga̱jma̱a̱ muni̱ ngínún wéñuuʼ”. Mú bi̱ kayá escudo ndrígóo na̱nguá nindoo numuu dí ra̱ʼkhá tháán nimíñuu. Ikha ngóo mínaaʼ má Saúl niguajthun espada ga̱jma̱a̱ niniñuuʼ dí mafraʼa jngayii.
5 Índo̱ bi̱ kayá escudo ndrígóo ndiʼyoo rí nikháñúu Saúl, ikhú niniñuuʼ dí mafraʼa jngayii espada ndrígóo, ma̱ngaa nikháñúu.
6 Xúʼko̱ kaʼnii niʼni dí Saúl gajmíi̱n mbá ajtsíin e̱ji̱i̱n ga̱jma̱a̱ bi̱ kúwá náa goʼwóo nikháñún mbóó.
7 Índo̱ israelitas bi̱ kúwá náa mata* ndiyáá dí xúgíinʼ nigáñún, ma̱ngaa rí Saúl gajmíi̱n e̱ji̱i̱n nikháñún, ikhú niniña̱a̱nʼ xuajñún ga̱jma̱a̱ nigáñún. Nda̱wa̱á dí rúʼko̱ filisteos niguwáʼ ga̱jma̱a̱ nikúwá ikhí.
8 I̱mba̱ néjtsuu índo̱ filisteos nigún gúndri̱gú káñúnʼ dí gíʼdoo numuu bi̱ nikháñún, ndiyáá rí kri̱ga̱a̱ Saúl gajmíi̱n e̱ji̱i̱n nikháñún náa kúbá Guilboa.
9 Nirawíi xtíñuu ga̱jma̱a̱ nirigú edxu̱u̱, nindrigú káyííʼ aju̱u̱nʼ ga̱jma̱a̱ nixuʼma ajngáa náa mbá xúgíʼ mbañúúnʼ filisteos mu xúʼko̱ muthún mámbá xuajin dí nirígá ga̱jma̱a̱ náa xándiu̱ún.
10 Ikhú nigúun kudúún aju̱u̱nʼ náa guʼwá rí nduyamajkuíí dios ndrígu̱ún, ga̱jma̱a̱ nigrigu edxu̱u̱ náa guʼwá rí nduyamajkuíí Dagón.
11 Índo̱ xúgíinʼ xa̱bu̱ bi̱ kúwá náa Jabés dí rígá náa Galaad nidxawíín xúgíʼ dí filisteos nini̱i̱ Saúl,
12 xúgíinʼ soldado nigún ga̱jma̱a̱ niguwáa̱nʼ kuñu̱u̱n wajñuuʼ Saúl ga̱jma̱a̱ wajñúúnʼ e̱ji̱i̱n. Nigúun kudiin náa Jabés, nidu̱u̱ i̱tsu̱ún náa agoo ixi̱ mba̱a̱ dí rígá náa Jabés ga̱jma̱a̱ túphiʼtsu mbá juwan mbiʼi.
13 Xígi̱ kaʼnii nikháñúu Saúl numuu dí tánindxu̱u̱ jmbii náa Jeobá, táʼnimbo̱o̱ ajngóo Jeobá, ma̱ngaa ga̱jma̱a̱ numuu dí nirajxu̱u̱ mbáa xawan,
14 na̱nguá nirajxu̱u̱ Jeobá. Ikha jngóo ikhaa* nixíyáa, ga̱jma̱a̱ dí naʼtáñajunʼ nixnáa David a̱ʼdióo Jesé.
