Timbá libro ndrígóo Crónicas 11:1-47
11 Mbiʼi nda̱wa̱á, xúgíinʼ israelitas nigún gúyáá David náa Hebrón ga̱jma̱a̱ nitháán: “¡Gi̱i̱ kuwáanʼxu̱! Mbóó eʼdiulú.*
2 Asndu má nákhá Saúl nindxu̱u̱ rey, ikháán má niraxnúún ikha xa̱bu̱ Israel náa nagún gúxmijná.* Ga̱jma̱a̱ Jeobá Dios ndrígáaʼ niʼtháanʼ: ‹Ikháán matiewa̱a̱n xuajñunʼ ga̱jma̱a̱ ikháán mbi̱ya̱ edxu̱u̱ náa xuajñunʼ Israel›”.
3 Mbá xúgíinʼ bi̱ kuya̱ edxu̱u̱ náa Israel niguwáʼ gúyáá rey David náa Hebrón, ga̱jma̱a̱ ikhaa nimbánuminaʼ gajmíi̱n náa Hebrón, náa inuu Jeobá. Nda̱wa̱á nigi̱i̱ʼ David xóo rey náa Israel xó má ajngóo Jeobá dí niʼthí náa Samuel.
4 Nda̱wa̱á David gajmíi̱n xúgíinʼ xa̱bu̱ Israel nigún náa Jerusalén, xóo muʼthá náa Jebús, náa mbaaʼ dí kúwá jebuseos.
5 Xa̱bu̱ Jebús nitsijmaa David, nitháán: “¡Nditháan xáʼnga̱a̱ʼ gátaʼa̱a̱ʼ gi̱i̱!”. Mú David nito̱ʼo̱o̱ náa Sion, xuajin dí kúgumaʼá, dí náa xúgi̱ nindxu̱u̱ Xuajñuu David.
6 David niʼthí: “Bi̱ gáxmína̱ʼ ginii gajmíi̱n jebuseos mani̱ndxu̱u̱ bi̱ mbayá edxu̱u̱ ga̱jma̱a̱ mani̱ndxu̱u̱ príncipe”. Joab a̱ʼdióo Zeruyá nitsimuu ginii, ga̱jma̱a̱ ni̱jkha̱nú ninindxu̱u̱ bi̱ ndiyá edxu̱u̱.
7 Ikhú David niguanúu nixtáa náa xuajin rí kúgumaʼá. Ikha jngóo nixna mbiʼíí Xuajñuu David.
8 Ga̱jma̱a̱ nigíʼdu̱u̱ niʼni guʼwá náa mbá xúgíʼ xuajin, nigíʼdu̱u̱ náa Bíjní* asndu náa mbájndi ga̱jma̱a̱ Joab niʼni májáanʼ xuajin dí xóó naguanúu.
9 Xúʼko̱ niʼni rí David ni̱jkha̱ ragiʼdoo itháan tsiaki̱i̱ ga̱jma̱a̱ Jeobá bi̱ naʼtáñajúúnʼ ángeles nixtáa ga̱jma̱á nindxu̱u̱.
10 Bugi̱ ninindxu̱ún mbá xúgíinʼ bi̱ ndiya̱ edxu̱u̱ náa xúgíinʼ soldado ndrígóo David bi̱ xkujiinʼ, bi̱ nimbayíí má xúʼko̱ índo̱ niʼtáñajunʼ, gajmiún mbá xúgíinʼ xa̱bu̱ Israel, ga̱jma̱a̱ nigiiʼ rey xó má ajngóo Jeobá dí niʼthúún xa̱bu̱ Israel.
11 Rígi̱ nindxu̱u̱ i̱yi̱i̱ʼ náa tima mbiʼñún soldado xkujiinʼ bi̱ gíʼdiin David: Jasobeam, a̱ʼdióo mbáa hacmonita, bi̱ kayá edxu̱u̱ náa mbá ajtsíin. Mbá miʼtsú nigudíin mbá 300 xa̱bekha ga̱jma̱a̱ kudú.*
12 Nda̱wa̱á dí ikhaa na̱jkha̱ Eleazar a̱ʼdióo Dodó xa̱bu̱ ahohíta. Ma̱ngaa nindxu̱u̱ mbáa bi̱ ajtsíin soldado bi̱ mixkujiinʼ.
13 Nixtáa ga̱jma̱a̱ David náa Pas-Damim, náa filisteos nigimbíin mu muxmijná. Ikhí nirígá mbá mbaaʼ náa kiʼdu cebada, ga̱jma̱a̱ soldado nigáñún nini̱ filisteos.
14 Mú ikhaa niwi̱ji̱ má xúʼko̱ náa ta̱pho̱o̱ mbaaʼ, ikhaa nimbáyúu ga̱jma̱a̱ nigudíin filisteos, xúʼko̱ niʼni dí maʼngo̱o̱ Jeobá.
15 Náa mbá 30 bi̱ kuya̱ edxu̱u̱ mbá ajtsíin niguájtaan náa pátsí gúyáá David náa tsíñu dí rígá náa Adulam, índo̱ soldado filisteos gíwi̱i̱nʼ náa mata* Refaím.
16 David xtáa rambáyuminaʼ ikhí ga̱jma̱a̱ mbá grupo soldado filisteos kúwá náa Belén.
17 Ikhú David niʼthí rígi̱: “¡Á mu xúʼko̱ gága̱nʼ mbá chíʼgíiʼ* iyaʼ dí ga̱jnu̱ʼ náa puzu* dí rígá náa mijngii xkrugoo Belén jnu rá!”.
18 Ikhú mbá ajtsíin nitu̱ʼu̱u̱n ga̱jma̱a̱ tsiaki̱i̱ náa gíi̱nʼ filisteos, niri̱ya̱ʼ iyaʼ náa puzu dí rígá náa mijngii xkrugoo xuajin Belén, ga̱jma̱a̱ nigúun kuñu̱u̱n náa David mu maga̱a̱n. Mú David tándoo gágáan ga̱jma̱a̱ nixídiri̱ga̱ náa inuu Jeobá.
19 Niʼthí: “Nda̱yo̱o̱ xú kaʼnii Dios eʼyoo xúgíʼ, ¡nditháan xáni̱ rígi̱! Xú káʼnii lá gándoo gágánʼ eʼdiún xa̱bu̱ bugi̱ rí asndu migamíi makhañún rá. Asndu migamíi makhañún dí nigún gúya̱ iyaʼ”. Ikha jngóo nditháan tándoo gágáan. Rígi̱ nindxu̱u̱ dí nini̱ bi̱ mbá ajtsíin soldádiu̱u̱ bi̱ xkujiinʼ.
20 Abisái ndxájuu Joab, ninindxu̱u̱ bi̱ ndiyá edxu̱u̱ náa bi̱ mbá ajtsíin. Ikhaa nigudíin mbá 300 soldado ga̱jma̱a̱ kudú, ma̱ngaa nijmaʼniiʼ xó má eʼwíinʼ bi̱ i̱mbá gijtsi̱i̱n.
21 Náa bi̱ mbá ajtsíin bugi̱, ikhaa nindxu̱u̱ bi̱ najmaʼniiʼ itháán ki xóo bi̱ a̱jmi̱i̱n a̱ngui̱i̱n ga̱jma̱a̱ ndiyá edxu̱u̱, mú na̱nguá ni̱jkha̱nú ninindxu̱u̱ xóo bi̱ mbá ajtsíin bi̱ ginii.
22 Benaya a̱ʼdióo Jehoiadá ninindxu̱u̱ mbáa xa̱bu̱ bi̱ támiñuu* ga̱jma̱a̱ niʼni mbaʼa rí gakhi̱i̱ náa Cabzeel. Nigudíin a̱jmi̱i̱n e̱ji̱i̱n Ariel náa Moab, ga̱jma̱a̱ mbá mbiʼi índo̱ nagajtaa idiʼ nijngúun náa mbá puzu ga̱jma̱a̱ ikhí nixíyáa mbáa león.
23 Ma̱ngaa nixíyáa mbáa xa̱bu̱ egipcio bi̱ ra̱ʼkhá tháán mba̱yi̱i̱ʼ, bi̱ naʼni itháan dí a̱jma̱ metro* rí mba̱yi̱i̱ʼ. Ikhaa i̱ndó mbá ixi̱ kayá, mú xa̱bu̱ egipcio kayá mbá kudú dí nindxu̱u̱ xóo xi̱gu̱ dí najmún bi̱ nuxmí. Maski ajndu xúʼko̱ nixmínaʼ ga̱jma̱a̱ xa̱bu̱ egipcio, niríya kaʼyuuʼ kudú ndrígóo ga̱jma̱a̱ rúʼko̱ má nixíyáa ga̱jma̱a̱.
24 Rígi̱ ninindxu̱u̱ dí niʼni Benaya a̱ʼdióo Jehoiadá, rí nijmaʼniiʼ ninindxu̱u̱ ikháá má xóo nijmaʼniúnʼ mbá ajtsíin soldado bi̱ mixkujiinʼ.
25 Ikhaa nijmaʼniiʼ itháán ki xóo bi̱ mbá 30, mú na̱nguá ni̱jkha̱nú ninindxu̱u̱ xóo bi̱ mbá ajtsíin soldado. Maski ajndu xúʼko̱ David nigíiʼ mu mayéʼga edxu̱u̱ náa bi̱ nuñewa̱a̱n.
26 Bugi̱ ninindxu̱ún soldado bi̱ xkujiinʼ, Asahel, giʼtio̱o̱* Joab, Elhanán a̱ʼdióo Dodó xa̱bu̱ Belén,
27 Samot xa̱bu̱ harorita, Hélez xa̱bu̱ pelonita,
28 Irá a̱ʼdióo Iqués xa̱bu̱ tecoíta, Abí-Ézer xa̱bu̱ anatotita,
29 Sibecái xa̱bu̱ husatita, Ilái xa̱bu̱ ahohíta,
30 Maharái xa̱bu̱ netofatita, Héled a̱ʼdióo Baaná xa̱bu̱ netofatita,
31 Itái a̱ʼdióo Ribái xa̱bu̱ Guibeá bi̱ na̱ʼkha̱ náa benjaminitas, Benaya xa̱bu̱ piratonita,
32 Hurái bi̱ na̱ʼkha̱ náa mata dí mbiʼyuu Gaas, Abiel xa̱bu̱ arbatita,
33 Azmávet xa̱bu̱ baharumita, Eliahbá xa̱bu̱ saalbonita,
34 e̱ji̱i̱n Hasem xa̱bu̱ guizonita, Jonatán a̱ʼdióo Sagué xa̱bu̱ hararita,
35 Ahiam a̱ʼdióo Sacar xa̱bu̱ hararita, Elifal a̱ʼdióo Ur,
36 Héfer xa̱bu̱ mekeratita, Ahíya xa̱bu̱ pelonita,
37 Hezró xa̱bu̱ carmelita, Naarái a̱ʼdióo Ezbái,
38 Joel, ndxájuu Natán, Mibhar a̱ʼdióo Hagrí,
39 Zélec xa̱bu̱ ammonita, Naharái xa̱bu̱ berotita, bi̱ kayá escudo ndrígóo Joab a̱ʼdióo Zeruyá,
40 Irá xa̱bu̱ itrita, Gareb xa̱bu̱ itrita,
41 Urías xa̱bu̱ hitita, Zabad a̱ʼdióo Ahlái,
42 Adiná a̱ʼdióo Sizá xa̱bu̱ rubenita, mbáa bi̱ naʼtáñajúúnʼ rubenitas, ikhaa xtáa gajmíi̱n 30 xa̱bekha,
43 Hanán a̱ʼdióo Maacá, Josafat xa̱bu̱ mitnita,
44 Uzía xa̱bu̱ asteratita, Sama ga̱jma̱a̱ Jeiel, e̱ji̱i̱n Hotam xa̱bu̱ aroerita,
45 Jediael a̱ʼdióo Simrí ga̱jma̱a̱ ndxájuu Johá xa̱bu̱ tizita,
46 Eliel xa̱bu̱ mahavita, Jeribái ga̱jma̱a̱ Josavías, e̱ji̱i̱n Elnaam, ga̱jma̱a̱ Itmá xa̱bu̱ moabita,
47 Eliel, Obed ga̱jma̱a̱ Jaasiel xa̱bu̱ mezobaíta.
Mbaʼa nota
^ Náa ajngáa hebreo naʼthí, “nindxu̱xu̱ itsa̱a̱ʼ ga̱jma̱a̱ xuyaaʼ”.
^ Náa ajngáa hebreo naʼthí, “bi̱ naʼni magajnún ga̱jma̱a̱ bi̱ naʼni mataʼa̱án xa̱bu̱ Israel”.
^ O “Montículo”. Náa ajngáa hebreo ajngáa rígi̱ nandoo gáʼthúu̱n ‹nigumamajtííʼ›.
^ O “lanza”.
^ O “bóo”.
^ O “lajuíin”.
^ Náa ajngáa hebreo naʼthí, “a̱ʼdióo mbáa xa̱bu̱ bi̱ tsémíñuuʼ”.
^ Náa ajngáa hebreo tséʼthí á mu giʼtáá o giʼnii.
