Timbá libro ndrígóo Crónicas 12:1-40
-
Bi̱ numbayíí náa naʼtáñajunʼ David (1-40)
12 Xa̱bu̱ bugi̱ nigún kidxuuʼ David náa Ziclag, náa mbá xúgíʼ mbiʼi dí ikhaa na̱nguá nindoo maʼga asndu náa má nindoo ga̱jma̱a̱ numuu Saúl a̱ʼdióo Quis, ikhiin kúwá náa soldado bi̱ xkujiinʼ bi̱ numbayíí náa naxmínaʼ.
2 Kuda xkamídá, najmún ñawún mújúúnʼ ga̱jma̱a̱ ñawún xtiñu̱ún mu muda̱ʼ itsí o mu muda̱ʼ flecha ga̱jma̱a̱ xkamídá. Ninindxu̱ún a̱ngui̱i̱n Saúl, bi̱ naguwáʼ náa Benjamín.
3 Bi̱ kayá edxu̱u̱ ninindxu̱u̱ Ahiézer ga̱jma̱a̱ Joás. Mbá nájmi̱i̱n ninindxu̱ún e̱ji̱i̱n Semaá xa̱bu̱ guibeatita. Ma̱ngaa ikhí xtáa Jeziel ga̱jma̱a̱ Pélet, e̱ji̱i̱n Azmávet, Beracá, Jehú xa̱bu̱ anatotita,
4 Ismayá xa̱bu̱ gabaonita, mbáa soldado xkujiiʼ bi̱ xtáa náa mbá treinta ga̱jma̱a̱ bi̱ kayá edxu̱u̱ náa mbá treinta, Jeremías, Jahaziel, Johanán, Jozabad xa̱bu̱ guederatita,
5 Eluzái, Jerimot, Bealías, Semarías, Sefatías xa̱bu̱ harifita,
6 Elcaná, Isías, Azarel, Joézer ga̱jma̱a̱ Jasobeam, xa̱bu̱ coreítas,
7 Joelá ga̱jma̱a̱ Zebadías, e̱ji̱i̱n Jeroham bi̱ na̱ʼkha̱ náa Guedor.
8 Tikhuun xa̱bu̱ gaditas ninújnga̱án náa tsu̱du̱u̱ David índo̱ ikhaa xtáa rambáyuminaʼ náa ku̱ba̱ʼ mijxooʼ,* nindxu̱ún soldado xkujiinʼ, soldado bi̱ kijmaratiin muxmijná, kúwá xawii muxmijná ga̱jma̱a̱ escudo dí mba̱ʼu̱ ga̱jma̱a̱ kudú.* Inún nindxu̱u̱ xóo inún león ga̱jma̱a̱ nagáñún itháan nacha̱ xóo gacela* náa kúbá.
9 Ézer ninindxu̱u̱ timbáa bi̱ ndiyá edxu̱u̱, bi̱ raga̱jmi̱i̱n ninindxu̱u̱ Abdías, bi̱ ragajtsíin Eliab,
10 bi̱ ragajkui̱i̱n Mismaná, bi̱ witsiin Jeremías,
11 bi̱ majuiin Atái, bi̱ juwiin Eliel,
12 bi̱ migiñiiʼ Johanán, bi̱ mijna gu̱wi̱i̱nʼ Elzabad,
13 bi̱ gu̱wi̱i̱nʼ Jeremías, bi̱ maʼni 11 Macbanái.
14 Bugi̱ ninindxu̱ún gaditas, bi̱ ndiya̱ edxu̱u̱ náa soldado. Bi̱ gi̱ʼta̱ maʼngo̱o̱ maʼni gajmíi̱n 100 ga̱jma̱a̱ bi̱ giʼnii maʼngo̱o̱ maʼni gajmíi̱n 1,000.
15 Bigi̱ ninindxu̱ún xa̱bu̱ bi̱ nikidiin náa mañu Jordán nákha gu̱nʼ timbá, índo̱ naʼni mba̱a̱ iyaʼ, nini̱ dí mbá xúgíinʼ xa̱bu̱ bi̱ kúwá agoo magajnún dí naguanúu xígií náa nagájnuu a̱jkha̱ʼ* ga̱jma̱a̱ náa narámaaʼ a̱jkha̱ʼ.*
16 Tikhuun xa̱bi̱i̱ Benjamín ga̱jma̱a̱ Judá nigún náa xtáa rambáyuminaʼ David.
17 Ikhú David nigájnuu, niwi̱ji̱ náa inún ga̱jma̱a̱ niʼthún: “Á mu naguwaʼla tsímáá mu mumbáyúʼ, mambaxúlúʼ.* Mú á mu naguwáʼ gúni̱ nduwúúnʼ ga̱jma̱a̱ muxnajxiún náa xa̱bu̱ sia̱nʼ ndrígóʼ maski ajndu na̱nguá ni̱ni̱ mbá dí ra̱májánʼ, Dios ndrígu̱ún wajin xiʼñúlú gáʼyoo ga̱jma̱a̱ gáʼni dí májánʼ”.
18 Ikhú espíritu ndrígóo Dios nirígá náa Amasái, bi̱ kayá edxu̱u̱ náa mbá treinta, ga̱jma̱a̱ niʼthúu̱n:
“Kuwáanʼxu̱ ga̱jma̱á nindxa̱a̱ʼ, ga̱jma̱a̱ mumbáyáaʼxu David, a̱ʼdióo Jesé.
Tsímáá, garigá tsímáá náa ikháán, ga̱jma̱a̱ garigá tsímáá náa bi̱ numbayáaʼ,numuu rí Dios ndrígáaʼ xtáa rambáyaaʼ”.
Ikha jngóo David nigruiguíin ga̱jma̱a̱ nigruigi̱i̱n mbuya̱ edxu̱u̱ náa soldado bi̱ gíʼdiin.
19 Tikhuin xa̱bi̱i̱ Manasés ninújnga̱án náa tsu̱du̱u̱ David índo̱ ni̱jkha̱ gajmíi̱n filisteos mu muxmijná gajmiún Saúl, mú ikhaa na̱nguá nimbáñún filisteos numuu dí bi̱ nutañajúúnʼ filisteos, nda̱wa̱á dí nitamijná gajmiún nixkriya̱a̱ʼ David, numuu dí nithi: “Manújnga̱a̱ náa tátióo Saúl, ga̱jma̱a̱ rígi̱ gáʼni dí makañúlú”.
20 Bigi̱ ninindxu̱ún xa̱bekha bi̱ naguwáʼ náa Manasés bi̱ ninújnga̱án náa tsu̱du̱u̱ David índo̱ ni̱jkha̱ náa Ziclag: Adná, Jozabad, Jediael, Miguel, Jozabad, Elihú ga̱jma̱a̱ Ziletái, bi̱ kuya̱ edxu̱u̱ náa mbá mil bi̱ kúwá náa Manasés.
21 Ikhiin nimbayíí David índo̱ nixmínaʼ gajmíi̱n mbá grupo kuʼwáʼ, numuu dí xúgíinʼ ikhiin nindxu̱ún xa̱bu̱ xkujiinʼ ga̱jma̱a̱ tsémíñún, niguánú ninindxu̱ún bi̱ ndiya̱ edxu̱u̱ náa soldado.
22 Mámbá mbiʼi naguáʼnú xa̱bekha mumbayíí David, dí náa gríguiin ni̱jkha̱nú niʼni mba̱a̱ xóo campamento ndrígóo Dios.
23 Xígi̱ kaʼnii mbaʼin bi̱ ndiya̱ edxu̱u̱ náa xa̱bekha bi̱ kuda ajua̱nʼ dí nuxmijná ga̱jma̱a̱, bi̱ nigún mu mumbayíí David náa Hebrón mu xúʼko̱ muxnajxi̱i̱ náa ñawúunʼ ikhaa dí naʼtáñajunʼ Saúl, xó má awan dí gíʼdoo Jeobá.
24 Nikúwá mbá 6,800 xa̱bekha bi̱ naguwáʼ náa Judá bi̱ kuda escudo dí mba̱ʼu̱ ga̱jma̱a̱ kudú, bi̱ kijmaratiin muxmijná.
25 Náa simeonitas, kúwá mbá 7,100 soldado xkujiinʼ bi̱ tsémiñún.
26 Bi̱ naguwáʼ náa levitas, nindxu̱ún mbá 4,600.
27 Jehoiadá nindxu̱u̱ bi̱ kayá edxu̱u̱ náa e̱ji̱i̱n Aarón, náa ikhaa kúwíin mbá 3,700,
28 ma̱ngaa Sadoc, mbáa dxámá xkujiiʼ ga̱jma̱a̱ tsémíñúu, ga̱jma̱a̱ mbá 22 bi̱ kuya̱ edxu̱u̱ náa guʼwún anu̱ún.
29 Bi̱ naguwáʼ náa Benjamín, a̱ngui̱i̱n Saúl, ninindxu̱ún mbá 3,000. Mbaʼin dí ikhiin nákha ginii nimbayíí goʼwóo Saúl.
30 Bi̱ naguwáʼ náa Efraín, ninindxu̱ún mbá 20,800 xa̱bekha xkujiinʼ ga̱jma̱a̱ tsémiñún, xa̱bekha bi̱ nijmaʼniún bi̱ nikúwá náa guʼwún anu̱ún.
31 Bi̱ naguwáʼ náa mbá ta̱pha̱ xuajin chíʼgíiʼ* ndrígóo Manasés, kúwá mbá 18,000 bi̱ nixtaʼwíin ga̱jma̱a̱ mbiʼñún mu maguwáʼ gúgíiʼ David xóo rey.
32 Bi̱ naguwáʼ náa e̱ji̱i̱n Isacar, kúwá mbá 200 bi̱ kuya̱ edxu̱u̱, ikhiin nduyáá dí xtáa rarígá ga̱jma̱a̱ ndiéjunʼ dí gíʼmaa muni̱ xa̱bu̱ Israel, xúgíinʼ a̱ngiu̱ún nuni̱ dí nuthi.
33 Bi̱ naguwáʼ náa Zabulón, ninindxu̱ún 50,000 bi̱ ma̱ndoo mani̱ndxu̱ún soldado, ga̱jma̱a̱ maguajún xawii náa kaʼyoo mu muxmijná, muda̱ aju̱ún’ dí muxmijná ga̱jma̱a̱, xúgíinʼ ikhiin mbóó a̱jkiu̱ún embayíí David.
34 Bi̱ naguwáʼ náa Neftalí ninindxu̱ún 1,000 bi̱ kuya̱ edxu̱u̱, ga̱jma̱a̱ náa ikhiin kúwá mbá 37,000 xa̱bekha bi̱ kuda escudo dí mba̱ʼu̱ ga̱jma̱a̱ kudú.
35 Bi̱ naguwáʼ náa danitas, dí niguájun xawii muxmijná, ninindxu̱ún mbá 28,600.
36 Ga̱jma̱a̱ bi̱ naguwáʼ náa Aser, bi̱ ma̱ndoo mani̱ndxu̱ún soldado, ga̱jma̱a̱ bi̱ maguajún xawii náa muxmijná, ninindxu̱ún 40,000.
37 Bi̱ kúwá náa i̱mba̱ ridoo mañu Jordán, rubenitas, gaditas ga̱jma̱a̱ mbá ta̱pha̱ xuajin chíʼgíiʼ ndrígóo Manasés, kúwá mbá 120,000 soldado bi̱ kuda xúgíʼ enii ajua̱nʼ dí nuxmijná ga̱jma̱a̱.
38 Xúgíinʼ xa̱bekha bugi̱ najmiin nuxmijná, naguájun xawii náa muxmijná, niguwáʼ ga̱jma̱a̱ mbóó a̱jkiu̱ún náa Hebrón mu mugíiʼ David xóo rey náa xúgíʼ Israel, ma̱ngaa mbá xúgíinʼ israelitas bi̱ xóó naguanún nindúún* dí David mani̱ndxu̱u̱ rey.
39 Niguanún ikhí gajmiún David mbá ajtsú mbiʼi, nipiʼtsu ga̱jma̱a̱ niʼwa̱a̱n, numuu dí a̱ngiu̱ún nini̱ májáánʼ dí mu̱phu̱.
40 Ma̱ngaa bi̱ kúwá mijngii náa ikhiin, ga̱jma̱a̱ asndu bi̱ kúwá náa Isacar, Zabulón ga̱jma̱a̱ Neftalí, naguwáʼ gajmiún búrru, camello, mula ga̱jma̱a̱ xedi̱, naguwáʼ kudúún ganitsu: Harina, pan dí niguma ga̱jma̱a̱ higo dí kaxújmbi̱i̱ ga̱jma̱a̱ uva dí nijndooʼ, vino ga̱jma̱a̱ aceite. Ma̱ngaa naguwáʼ kudiin xedi̱ ga̱jma̱a̱ mugu̱, numuu dí ra̱ʼkhá tháán tsímáá kúwá náa Israel.
Mbaʼa nota
^ O “desierto”.
^ O “lanza”.
^ Nindxu̱u̱ mbáa aña̱ʼ bi̱ nagáyúu itháan nacha̱.
^ O “este”.
^ O “oeste”.
^ O “a̱jkiu̱nʼ marigá ga̱jma̱á nindxa̱la”.
^ O “tribu”.
^ Náa ajngáa hebreo naʼthí, “niʼni mbóó a̱jkiu̱ún”.
