Timbá libro ndrígóo Crónicas 13:1-14
13 David nirajxu̱u̱n bi̱ nutañajúúnʼ náa bi̱ mbá mil, bi̱ nutañajúúnʼ bi̱ mbá cien ga̱jma̱a̱ mbá xúgíinʼ bi̱ kuya̱ edxu̱u̱.
2 Ikhú David niʼthúún mbá xúgíinʼ xa̱bu̱ Israel: “Á mu ikháanʼ ndu̱ya̱a̱la májánʼ ga̱jma̱a̱ á mu Jeobá Dios ndrígulú naʼthí rí ma̱ndoo, muxuʼmá mbá ajngáa náa mbá xúgíinʼ a̱ngiu̱lú bi̱ xóó naguanún náa mbá xúgíʼ mbaaʼ dí rígá náa Israel, ma̱ngaa náa ndxajkun ga̱jma̱a̱ náa xuajñún levitas ma̱ngaa mbaaʼ náa rígá rajxa̱, mu mu̱wi̱ín náa ikháánʼlú.
3 Maguwa̱áʼ kuʼyúlú Arca* ndrígóo Dios”. Numuu rí nákha mbiʼi rí nixtáa raʼtáñajunʼ Saúl na̱nguá niñewa̱a̱n.
4 Xúgíinʼ xa̱bu̱ na̱nguá nini̱ gaʼduunʼ dí niʼthí David, numuu rí ikhiin nindxaʼwamíjna̱ rí májánʼ nindxu̱u̱ dí maguma xúʼko̱.
5 Ikha jngóo David nigímbíin mbá xúgíinʼ xa̱bu̱ Israel, nigíʼdu̱u̱ náa mañu* ndrígóo Egipto asndu náa Lebó-Hamat,* mu maríya̱a̱ʼ Arca ndrígóo Dios bi̱ gajkhun náa Quiryat-Jearim.
6 David gajmíi̱n mbá xúgíinʼ xa̱bu̱ Israel nitsimún náa Baalá, náa Quiryat-Jearim, mbaaʼ dí rígá náa Judá, mu matsimún kuñu̱u̱n Arca ndrígóo Dios bi̱ gajkhun, Jeobá bi̱ grígu xíliu̱u̱* náa tsu̱du̱ún* querubines, Arca náa dí nugri̱ga̱a̱ mbiʼyuu ikhaa.
7 Nirajkua̱a̱ Arca ndrígóo Dios bi̱ gajkhun náa carreta dí nuxi̱ʼ, niriya̱a̱ʼ náa goʼwóo Abinadab. Uzá ga̱jma̱a̱ Ahió nagún kuñu̱u̱n carreta.
8 David gajmíi̱n mbá xúgíinʼ xa̱bu̱ Israel kúwá runi̱ ndxa̱a̱ ga̱jma̱a̱ gagi náa inuu Dios bi̱ gajkhun ga̱jma̱a̱ ajmúú, nudi̱i̱ arpa ga̱jma̱a̱ i̱ʼwáʼ ajua̱nʼ dí gíʼdoo cuérdóo, xúʼko̱ má panderetas, címbalos ga̱jma̱a̱ trompetas.
9 Mú índo̱ niguánú náa mbayuuʼ Kidón, Uzá nikrui̱ya̱ʼ ñawúunʼ ga̱jma̱a̱ niguajtuun Arca, numuu rí nigíʼ magutaxi̱ nini̱ xedi̱.
10 Ikhú Jeobá ra̱ʼkhá tháán nikiʼnáa kaʼyoo Uzá ga̱jma̱a̱ ikhí má nixíyáa, numuu dí nikrui̱ya̱ʼ ñawúunʼ mu maguajtuun Arca, ikhaa nikháñúu ikhí náa inuu Dios.
11 Mú David nikiʼnáa,* numuu rí Jeobá nikásngañu̱u̱ʼ kaʼyoo* Uzá, mbaaʼ rúʼko̱ mbiʼyuu Pérez-Uzá* asndu rí mbiʼi xúgi̱.
12 David ra̱ʼkhá tháán nimíñuu kaʼyoo Dios bi̱ gajkhun mbiʼi rúʼko̱, ikhaa niʼthí: “Xú káʼnii gáʼkháaʼ ka̱yo̱ʼ Arca ndrígóo Dios bi̱ gajkhun rá.”
13 David táʼkha̱a̱ kayóo Arca, náa xtáa náa Xuajñuu David, nikuʼma dí magúun kuñu̱u̱n náa Obed-Edom xa̱bu̱ guitita.
14 Arca ndrígóo Dios bi̱ gajkhun nirígá náa goʼwóo Obed-Edom, ikhí nirígá mbá ajtsú igu̱nʼ náa goʼwóo ga̱jma̱a̱ Jeobá tséniñuuʼ raʼni tsajkurámiinʼ, mbá xúgíinʼ bi̱ kúwá náa goʼwóo Obed-Edom ga̱jma̱a̱ xúgíʼ rí ikhaa gíʼdoo.
Mbaʼa nota
^ O “E̱jna̱”.
^ O “nigíʼdu̱u̱ náa Sihor”.
^ O “índo̱ nadxu̱ʼ mata̱ʼa̱a̱ʼ náa Hamat”.
^ O “trono ndrígóo”.
^ O mbáa “náa majñu̱únʼ”.
^ O “nigawuunʼ”.
^ Náa ajngáa hebreo naʼthí, “nirujturígú kamba̱a̱”.
^ Rí nandoo gáʼthúu̱n, ‹kambo̱o̱ Uzá›.
