Timbá libro ndrígóo Crónicas 14:1-17
14 Rey Hiram bi̱ xtáa náa Tiro nikuʼmiin bi̱ magún ku̱ñu̱u̱n ajngáa náa David, ma̱ngaa nikuʼma ixi̱ cedro, xó má bi̱ nuni̱ guʼwá* ga̱jma̱a̱ bi̱ nutháá ixi̱ mu xúʼko̱ muni̱ mbá guʼwá.*
2 David ni̱jkha̱nú ndiʼyoo dí Jeobá nigíiʼ mani̱ndxu̱u̱ rey náa Israel, ma̱ngaa dí niʼni maʼni mba̱a̱ dí naʼtáñajunʼ ga̱jma̱a̱ numuu xuajñuu* Israel.
3 David nigui̱i̱n itháán mbaʼin gu̱ʼu̱ náa Jerusalén ga̱jma̱a̱ nigiʼdiin mbaʼin jiámá ga̱jma̱a̱ wa̱ʼxa̱ʼ.*
4 Xígi̱ mbiʼñún e̱ji̱i̱n bi̱ nigiʼdiin náa Jerusalén: Samúa, Sobab, Natán, Salomón,
5 Ibhar, Elisúa, Elpélet,
6 Noga, Néfeg, Jafía,
7 Elisamá, Beeliadá ga̱jma̱a̱ Elifélet.
8 Índo̱ filisteos nidxawíín dí David nigi̱ʼi̱ xóo rey náa xúgíʼ Israel, xúgíinʼ nitsimún gúyáaʼ. Ga̱jma̱a̱ David niʼdxawuun rígi̱, ikhú ikhaa nigájnuu gáxmína̱ʼ gajmíi̱n.
9 Filisteos niguánú ga̱jma̱a̱ nigi̱ʼdi̱i̱ nixmijná gajmiún náa mata* Refaím.
10 David nirajxu̱u̱ Dios: “Matsimuʼ gáxmijná gajmíʼ filisteos ráʼ. Maraxnajxíin náa ñawúnʼ xáʼ.” Jeobá niriʼñuu: “Atatsimaaʼ, numuu dí maxnajxíin filisteos náa ñawáanʼ”.
11 Ikha jngóo David ni̱jkha̱ náa Baal-Perazim ga̱jma̱a̱ ikhí nixmínaʼ gajmíi̱n. David niʼthí: “Dios bi̱ gajkhun nimbáʼtoo mbá kamba̱a̱ náa ñawúnʼ náa maʼgá gáxmijná gajmíʼ bi̱ sia̱nʼ, xóo mbá kamba̱a̱ rí nambáʼtoo iyaʼ”. Ikha jngóo nixna mbiʼíí mbaaʼ rúʼko̱ Baal-Perazim.*
12 Filisteos niniñu̱u̱nʼ ikhí xándiu̱ún, bi̱ David nikuʼma rí mutsikhi̱i̱n náa aguʼ.
13 Nda̱wa̱á filisteos nitsima̱án gúxmijná gajmiún mbu̱júu̱ náa mata.
14 David nirajxu̱u̱ mbu̱júu̱ Dios, mú Dios bi̱ gajkhun niriʼñuu: “Xátatsimaaʼ gátaxmíjná gajmiáanʼ náa jmbuu eguwáʼ, ayuʼ tuíʼiin, ga̱jma̱a̱ tsu̱du̱ún gídxúʼ gátaxmíjná gajmiáanʼ, náa ridoo xtáʼdu̱u̱ iná bacá.
15 Ga̱jma̱a̱ índo̱ gátadxawíín rí xóo ewán egún xa̱bu̱ náa inu̱ú xtáʼdu̱u̱ iná bacá. Ikhú xámíñáaʼ mataxmíjná, numuu dí Dios bi̱ gajkhun nigájnuu maʼga̱ ginii maʼni gámbíin soldado filisteos”.
16 Ikha jngóo David niʼni xó má nikuʼmaa maʼni Dios bi̱ gajkhun, nigi̱ʼdi̱i̱ niradíin soldado filisteos náa Gabaón asndu náa Guézer.
17 Niwáán ri̱go̱o̱ numuu David náa mbá xúgíʼ xuajin mba̱ʼu̱, ga̱jma̱a̱ Jeobá niʼni rí mbá xúgíinʼ xa̱bu̱ bi̱ kúwá náa xúgíʼ xuajin mamiñún kuyáá.
Mbaʼa nota
^ O “bi̱ nuni̱ xtájtsí”.
^ O “náa naʼtáñajunʼ”.
^ Xóo muʼthá, xuajñuu Jeobá.
^ O “i̱jín go̱ʼo̱”.
^ O “bóo”.
^ Rí nandoo gáʼthúu̱n ‹bi̱ naʼtáñajuunʼ kamba̱a̱›.
