Timbá libro ndrígóo Crónicas 15:1-29
15 David niʼni má xúʼko̱ guʼwá náa Xuajñuu David. Ma̱ngaa niʼni mújúunʼ náa nigíʼ guʼwá xtíin náa marigá Arca* ndrígóo Dios bi̱ gajkhun.
2 Mbiʼi rúʼko̱ David niʼthí: “Nimbáa ragíʼmaa maʼga kayóo Arca ndrígóo Dios bi̱ gajkhun i̱ndó levitas, numuu dí Jeobá niraʼwíin ikhiin mu magún kuñu̱u̱n Arca ndrígóo Jeobá ga̱jma̱a̱ muni̱ ñajuunʼ asndu kámuu”.
3 Nda̱wa̱á David nigímbíin mbá xúgíinʼ xa̱bu̱ Israel náa Jerusalén mu matsimi̱ín kuñu̱u̱n Arca ndrígóo Jeobá náa dí ikhaa niʼni mújúunʼ.
4 David nigímbíin bi̱ naguwáʼ náa Aarón ga̱jma̱a̱ levitas:
5 Náa cohatitas na̱ʼkha̱ Uriel bi̱ kayá edxu̱u̱ gajmíi̱n mbá 120 a̱ngui̱i̱n,
6 náa meraritas na̱ʼkha̱ Asaya bi̱ kayá edxu̱u̱ gajmíi̱n mbá 220 a̱ngui̱i̱n,
7 bi̱ naguwáʼ náa Guersom, ikhí e̱ʼkha̱ Joel bi̱ kayá edxu̱u̱ gajmíi̱n mbá 130 a̱ngui̱i̱n,
8 bi̱ naguwáʼ náa Elizafán, ikhí e̱ʼkha̱ Semaya bi̱ kayá edxu̱u̱ gajmíi̱n mbá 200 a̱ngui̱i̱n,
9 bi̱ naguwáʼ náa Hebrón, ikhí e̱ʼkha̱ Eliel bi̱ kayá edxu̱u̱ gajmíi̱n mbá 80 a̱ngui̱i̱n,
10 bi̱ naguwáʼ náa Uziel, ikhí e̱ʼkha̱ Aminadab bi̱ kayá edxu̱u̱ gajmíi̱n mbá 112 a̱ngui̱i̱n.
11 Ma̱ngaa David nindxaʼóo ndxajkun Sadoc ga̱jma̱a̱ Abiatar, mangiin levitas, Uriel, Asaya, Joel, Semaya, Eliel ga̱jma̱a̱ Aminadab,
12 niʼthún: “Ikháanʼ nindxa̱la bi̱ kuya̱ edxu̱u̱ náa guʼwún ana̱la bi̱ nindxu̱ún levitas. Gu̱ni̱ kaʼwumijnáala, ikháanʼ gajmiála a̱ngia̱la, ga̱jma̱a̱ gutsima̱a̱ʼ ku̱ya̱la Arca ndrígóo Jeobá, Dios ndrígóo Israel, náa dí ikhúún ni̱ni̱ mújúunʼ.
13 Numuu dí ikháanʼla na̱nguá nijkua̱ ku̱yala timbá miʼtsú, ikha jngóo Jeobá Dios ndrígúxu̱ nikiʼnáa kaʼyuxu̱, numuu dí túʼyáʼ mbu̱ya̱a̱xu xóo phú gíʼmaa muʼguáaʼ ku̱yuxu̱”.
14 Ikha jngóo ndxajkun gajmiún levitas nini̱ kaʼwumijnáa mu matsimaán kuñu̱u̱n Arca ndrígóo Jeobá, Dios ndrígóo Israel.
15 Ikhú levitas nigúun kuñu̱u̱n Arca ndrígóo Dios bi̱ gajkhun, nita̱ma̱ʼ náa xpajphún ga̱jma̱a̱ ixi̱, xó má Moisés niʼtáñajúúnʼ muni̱, xó má niʼthí Jeobá.
16 David niʼthún bi̱ kuya̱ edxu̱u̱ náa levitas rí muthún a̱ngiu̱ún bi̱ nuni̱ ajmúú, dí muni̱ ajmúú ga̱jma̱a̱ gagi, mudi̱i̱ ajua̱nʼ dí nuni̱ ga̱jma̱a̱ ajmúú: Ajua̱nʼ dí gíʼdoo cuérdóo, xóo arpa ga̱jma̱a̱ címbalo.
17 Ikhú levitas nigíiʼ Hemán a̱ʼdióo Joel bi̱ na̱ʼkha̱ náa xuajin chíʼgíiʼ* ndrígu̱ún, ma̱ngaa Asaf a̱ʼdióo Berekías ga̱jma̱a̱ Etán a̱ʼdióo Cusayá, bi̱ naguwáʼ náa xuajin chíʼgíiʼ* ndrígu̱ún meraritas.
18 Bugi̱ nindxu̱ún bi̱ kúwá gajmiún a̱ngiu̱ún náa raga̱jma̱ grupo: Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu, Micneyá, bi̱ nañewu̱u̱n xkrugua nindxu̱u̱ Obed-Edom ga̱jma̱a̱ Jeiel.
19 Bi̱ naʼni ajmúú nindxu̱u̱, Hemán, Asaf ga̱jma̱a̱ Etán ikhiin nudi̱i̱ címbalos dí cobre.
20 Zacarías, Aziel, Semiramot, Jehiel, Uní, Eliab, Maaseya ga̱jma̱a̱ Benaya nudi̱i̱ ajua̱nʼ dí niguma májáanʼ cuérdóo mu mawán smídú.*
21 Matitías, Elifelehu, Micneyá, Obed-Edom, Jeiel ga̱jma̱a̱ Azazías nudi̱i̱ arpa dí niguma májáanʼ cuérdóo mu mawán mba̱a̱,* ma̱ngaa mu muxna ikha.
22 Kenanías, bi̱ kayá edxu̱u̱ náa levitas, ndaʼyoo xóo nagún kuñu̱u̱n Arca numuu dí najmañuu,
23 Berekías ga̱jma̱a̱ Elcaná nindxu̱ún bi̱ nuñewa̱a̱n Arca.
24 Ndxajkun Sebanías, Josafat, Netanel, Amasái, Zacarías, Benaya ga̱jma̱a̱ Eliezer nundiyííʼ gakhi̱i̱ trompetas náa inuu Arca ndrígóo Dios bi̱ gajkhun, ma̱ngaa Obed-Edom ga̱jma̱a̱ Jehías nindxu̱ún bi̱ nuñewa̱a̱n Arca.
25 David gajmíi̱n bi̱ kuya̱ edxu̱u̱ náa Israel, mangiin bi̱ kuya̱ edxu̱u̱ náa mbá mil asndu nadxún nigájni̱ín kuñu̱u̱n arca dí nimbánuu ndrígóo Jeobá náa goʼwóo Obed-Edom.
26 Numuu rí Dios bi̱ gajkhun nimbáñún levitas bi̱ nagúun kuñu̱u̱n arca dí nimbánuu ndrígóo Jeobá, ikhiin nixnajxi̱i̱n mbá juwiin e̱jín xédí ga̱jma̱a̱ mbá juwiin mugu̱ e̱jmba̱a̱.
27 David kagíʼ mbá xtíin paska dí nda̱a̱ ñawúunʼ dí májánʼ, xúʼko̱ má xúgíinʼ levitas bi̱ nagún kuñu̱u̱n Arca ga̱jma̱a̱ bi̱ nuni̱ ajmúú, ga̱jma̱a̱ Kenanías bi̱ kayá edxu̱u̱ náa bi̱ nagún kuñu̱u̱n Arca ga̱jma̱a̱ náa bi̱ nuni̱ ajmúú, David ma̱ngaa kagíʼ mbá efod* dí niguma ga̱jma̱a̱ lino.
28 Xúgíinʼ israelitas naguwáanʼ ratsimií kuñu̱u̱n arca dí nimbánuu ndrígóo Jeobá, nundxa̱ʼwa̱ rí nadxún ga̱jma̱a̱ nundiyííʼ chi̱ji̱ʼ, trompeta ga̱jma̱a̱ címbalo, nudi̱i̱ gakhi̱i̱ ajua̱nʼ dí gíʼdoo cuérdóo ga̱jma̱a̱ arpa.
29 Mú índo̱ nitaʼaán kuñu̱u̱n arca dí nimbánuu ndrígóo Jeobá náa Xuajñuu David, Mical wáxióo* Saúl, niyejxirigú náa ventanúu, ndiʼyoo dí rey David nakijxi̱i̱ ga̱jma̱a̱ naʼni ndxa̱a̱, ikhú nigíʼdúu niwiyu̱u̱ʼ kaʼyoo.
