Timbá libro ndrígóo Crónicas 16:1-43
16 David niʼni mbá guʼwá xtíin náa marigá Arca* ndrígóo Dios bi̱ gajkhun. Ikha jngóo nigúun kuñu̱u̱n nixuda̱ʼ ikhí, ga̱jma̱a̱ nixnajxi̱ tsigijñaʼ dí nakarámáʼ, ma̱ngaa tsigijñaʼ dí tsímáá* náa inuu Dios bi̱ gajkhun.
2 Índo̱ David niguámbóo nixnájxi̱ tsigijñaʼ dí nakarámáʼ ga̱jma̱a̱ tsigijñaʼ dí tsímáá, niʼni tsajkurámiinʼ xa̱bu̱ xuajin ga̱jma̱a̱ mbiʼyuu Jeobá.
3 Ma̱ngaa nixnúún xúgíinʼ israelitas, mámbáa xa̱biya̱ ga̱jma̱a̱ a̱ʼgu̱ nixnúu mbá pan dijndi, mbá pan dí niguma ga̱jma̱a̱ dátiles ga̱jma̱a̱ mbá pan dí niguma ga̱jma̱a̱ uva nijndooʼ.
4 Ikhú niraʼwíin tikhuun levitas mu muni̱ ñajunʼ náa inuu Arca ndrígóo Jeobá mu xúʼko̱ muni̱ mba̱a̱,* muxna̱a̱ núma̱aʼ ga̱jma̱a̱ muni̱ ajmúú náa Jeobá, Dios ndrígóo Israel.
5 Asaf nindxu̱u̱ bi̱ kayá edxu̱u̱ ga̱jma̱a̱ Zacarías nindxu̱u̱ bi̱ maʼni raga̱jmi̱i̱n bi̱ kayá edxu̱u̱. Jeiel, Semiramot, Jehiel, Matitías, Eliab, Benaya, Obed-Edom ga̱jma̱a̱ Jeiel nudi̱i̱ ajua̱nʼ dí gíʼdoo cuérdóo ga̱jma̱a̱ arpa, Asaf naʼdu̱u̱ címbalo,
6 ndxajkun Benaya ga̱jma̱a̱ Jahaziel nundiyííʼ má xúʼko̱ trompeta náa inuu arca dí nimbánuu ndrígóo Dios bi̱ gajkhun.
7 Nákha mbiʼi rúʼko̱, David nindo̱ʼo̱o̱ Asaf gajmíi̱n a̱ngui̱i̱n mu muni̱ ajmúú timbá miʼtsú mu maxnáa núma̱aʼ Jeobá:
8 “¡Guxna̱a̱ núma̱aʼ Jeobá, gugríga̱a̱* mbiʼyuu,gu̱ni̱ dí xa̱bu̱ xuajin mbuyáá dí ikhaa naʼni!
9 Gu̱ni̱ ajmúú, ga̱jma̱a̱ gu̱di̱i̱ ajmúú náa ikhaa,gundxaʼwamíjna̱* náa xúgíʼ rí mitsaanʼ* niʼniwíi.
10 Gu̱tha̱ ga̱jma̱a̱ gagi mbiʼyuu dí kaʼwu.
Gaʼdxuun a̱jkiu̱ún bi̱ nduyáaʼ Jeobá.
11 Guʼyáaʼ Jeobá ma̱ngaa tsiaki̱i̱ ndrígóo.
Guʼyáaʼ má xúʼko̱ mu mambáyala.*
12 Garmáʼáan a̱jkia̱la xúgíʼ rí mitsaanʼ niʼni,milagro ga̱jma̱a̱ dí xóo májánʼ naraʼwíí dí maʼni,
13 ikháanʼla bi̱ naguwa̱ʼ náa Israel bi̱ nindxu̱ún xa̱bi̱i̱,ikháanʼla e̱ji̱i̱n Jacob, bi̱ niraʼwáanʼla.
14 Ikhaa nindxu̱u̱ Jeobá Dios ndrígúlú.
Dí naʼthí maguma rígá náa xúgíʼ tsu̱du̱u̱ ku̱ba̱ʼ.
15 Garmáʼáan a̱jkia̱la asndu kámuu rí nimbánuu ga̱jma̱á nindxa̱la,garmáʼáan a̱jkia̱la dí nikudaminaʼ* maʼni náa xa̱bu̱ xuajñuu,
16 dí nimbánuminaʼ ga̱jma̱a̱ Abrahán,ga̱jma̱a̱ ajngóo dí nixná náa Isaac,
17 bi̱ nigíʼ xóo xtángoo náa Jacobga̱jma̱a̱ rí xóo nimbánuu ga̱jma̱a̱ asndu kámuu Israel,
18 índo̱ niʼthí ‹Maxna̱a̱ʼ ku̱ba̱ʼ dí rígá náa Canaán,rúʼko̱ nindxu̱u̱ dí kaʼyala mundrígúu›.
19 Rígi̱ nirígá nákha nguéjmáanʼla,xúʼko̱, nákha na̱nguá mbaʼáanʼ, ga̱jma̱a̱ nini̱ndxa̱la xa̱bu̱ bi̱ naguwaáʼ náa ku̱ba̱ʼ rúʼko̱.
20 Ikhiin nigún rajnguʼwún náa mámbá xuajin,ga̱jma̱a̱ náa mámbíin xa̱bu̱ ñajunʼ.
21 Ikhaa na̱nguá niniñuuʼ dí nimbáa xa̱bu̱ maʼni ngíníi,dí phú niʼni, ga̱jma̱a̱ numún ikhiin nixprígún reyes.
22 Niʼthí: ‹Xúrugui̱i̱n bi̱ ikhúún niraʼwi̱i̱nga̱jma̱a̱ xúniu̱u̱n nimbá dí ra̱májánʼ profetas* ndrígióʼ›.
23 ¡Xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ, guni̱ ajmúú náa Jeobá!
¡Guthi tsejtsíí mbiʼi dí ikhaa naʼni káwíin xa̱bu̱!
24 Guthu̱u̱nla xa̱bu̱ xuajin dí ikhaa nindxu̱u̱ mba̱a̱,guthu̱u̱n mbá xúgíinʼ xa̱bu̱ bi̱ kúwá náa xuajin dí mitsaanʼ niʼni.
25 Numuu dí Jeobá nindxu̱u̱ mba̱a̱ ga̱jma̱a̱ ikhaa kaʼyoo magruigú gamajkhu.
Ikhaa gíʼdoo itháan tsiaki̱i̱ náa mbá xúgíinʼ dioses.
26 Dioses ndrígu̱ún xa̱bu̱ xuajin nda̱a̱ dí ejmiin,mú Jeobá nindxu̱u̱ bi̱ niʼni mekhu.
27 Náa inuu rígá gamajkhu ga̱jma̱a̱ naxpíbiʼ,náa xtáa rígá tsiaki̱i̱ ga̱jma̱a̱ gagi.
28 Guxna̱a̱ Jeobá dí kaʼyoo, ikháanʼla xa̱bu̱ xuajin bi̱ kuwáanʼla náa mámbá guʼwáanʼ,guxna̱a̱ Jeobá dí kaʼyoo ga̱jma̱a̱ numuu dí nindxu̱u̱ mba̱a̱, ma̱ngaa dí gíʼdoo tsiaki̱i̱.
29 Gu̱ni̱ mba̱a̱ mbiʼyuu Jeobá xó má kaʼyoo,gaguwaʼ ku̱ya̱la mbá regalo ga̱jma̱a̱ guxnajxí náa ikhaa.
Gu̱ni̱ratamijnáaʼla ga̱jma̱a̱ kaʼwáanʼ gúʼgua índo̱ gúsmbatígala* náa inuu* Jeobá.
30 ¡Xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ gamiñún kuyáá!
Ku̱ba̱ʼ* gíʼ jxa̱ʼ, xándoo maʼba̱a̱n.
31 Gaʼdxún bi̱ kúwá mekhuíí, gaʼdxún bi̱ kúwá náa tsu̱du̱u̱ ku̱ba̱ʼ,gu̱thu̱u̱n xa̱bu̱ xuajin: ‹¡Jeobá ni̱jkha̱nú ninindxu̱u̱ Rey!›.
32 Gandxaʼwá lamáa* ga̱jma̱a̱ xúgíʼ dí naʼni majnííʼ,ga̱ku̱wá gagi xaxi̱ ga̱jma̱a̱ xúgíʼ dí rígá ikhí.
33 Xúʼko̱ má ixi̱ dí rígá náa xaxi̱ gundxaʼwa̱ ga̱jma̱a̱ gagi náa inuu Jeobá,numuu dí na̱ʼkha̱* mu manda̱ʼa̱a̱ cuenta náa xa̱bu̱ numbaaʼ.
34 Guxna̱a̱ núma̱aʼ Jeobá numuu dí ikhaa nindxu̱u̱ májáanʼ,dí nandoo kaʼyulú* ndajyúuʼ asndu kámuu.
35 Ga̱jma̱a̱ gu̱tha̱: ‹Atani̱ káwáanʼxu, Dios bi̱ naʼni káwáanʼxu,atagímbáanʼxu ga̱jma̱a̱ atani̱ káwáanʼxu náa xa̱bu̱ xuajin,mu xúʼko̱ muxna̱a̱ʼxu̱ núma̱aʼ ga̱jma̱a̱ mbiʼyaaʼ dí kaʼwuga̱jma̱a̱ asndu gagi gúnixu̱ mba̱a̱n.
36 Gaguma mba̱a̱ Jeobá, Dios ndrígóo Israel,asndu kámuu›”.
Ga̱jma̱a̱ mbá xúgíinʼ xa̱bu̱ xuajin nithi “¡Xúʼko̱ gáʼni!”,* ga̱jma̱a̱ nini̱ mba̱a̱ Jeobá.
37 Ikhú David niniñuuʼ Asaf gajmíi̱n a̱ngui̱i̱n náa inuu arca dí nimbánuu ndrígóo Jeobá mu muñejunʼ má xúʼko̱ náa inuu Arca, xó má naguʼwún nuñejunʼ tsejtsíí mbiʼi.
38 Obed-Edom gajmíi̱n a̱ngui̱i̱n, nindxu̱ún mbá 68 dí mbá xúgíinʼ, xó má Obed-Edom a̱ʼdióo Jedutún ga̱jma̱a̱ Hosá, ikhiin nindxu̱ún bi̱ wájun náa xkrugua.
39 Ndxajkun Sadoc gajmíi̱n eʼwíinʼ ndxajkun kúwá náa inuu guʼwá xtíin ndrígóo Jeobá, dí rígá náa rí mitsídánʼ náa Gabaón
40 mu muxnajxi̱ má xúʼko̱ tsigijñaʼ dí nakarámáʼ náa Jeobá náa najuixnájxi̱ tsigijñaʼ dí nakarámáʼ miʼcha̱ ga̱jma̱a̱ wakíʼ. Ma̱ngaa mu muni̱ xúgíʼ dí kiʼniraʼmáʼ náa Xtángoo dí Jeobá nixnún xa̱bu̱ Israel.
41 Ikhí ma̱ngaa xtáa Hemán, Jedutún ga̱jma̱a̱ eʼwíinʼ xa̱bekha bi̱ nixtaʼwíin ga̱jma̱a̱ mbiʼñún mu muxna̱a̱ núma̱aʼ Jeobá, numuu dí ikhaa “nandoo kaʼyulú* ndajyúuʼ asndu kámuu”.
42 Hemán ga̱jma̱a̱ Jedutún kúwá gajmiún ikhiin mu mundiyííʼ trompeta ga̱jma̱a̱ mudi̱i̱ címbalo ga̱jma̱a̱ i̱ʼwáʼ ajua̱nʼ dí najmún mu muni̱ mba̱a̱* Dios bi̱ gajkhun, ga̱jma̱a̱ e̱ji̱i̱n Jedutún wájun náa xkrugua.
43 Ikhú xa̱bu̱ xuajin nigúunla náa guʼwún ga̱jma̱a̱ David ni̱jkha̱a̱ gáʼni tsajkurámiinʼ bi̱ kúwá náa goʼwóo.
Mbaʼa nota
^ O “E̱jna̱”.
^ Náa ajngáa hebreo naʼthí, “marmáʼáan a̱jkiu̱ún”.
^ O “gajmala”.
^ O mbáa “gu̱tha̱”.
^ O “nagui̱i̱”.
^ Náa ajngáa hebreo naʼthí, “guʼyáʼ má xúʼko̱ inuu”.
^ Náa ajngáa hebreo naʼthí, “ajngóo dí nixná”.
^ O “gaʼyee, bi̱ nuthi dí marigá”.
^ O “índo̱ gúyamajkuíí”.
^ O mbáa “numuu dí ikhaa nindxu̱u̱ mikaʼwii”.
^ O “ku̱ba̱ʼ dí najma̱a̱”.
^ O “mar”.
^ O “ni̱ʼkha̱”.
^ O “Amén”.
^ O “nasngájmulú ngajua rí tsétumuu”.
^ O “mu muni̱ ajmúú náa”.
