Timbá libro ndrígóo Crónicas 17:1-27
17 Índo̱ rey xtáa má náa goʼwóo,* niʼthúu̱n profeta* Natán: “Ikhúún xtáá náa mbá guʼwá ixi̱ cedro, mú Arca* dí nimbánuu ndrígóo Jeobá kraʼa náa guʼwá xtíin”.
2 Natán niʼthúu̱n David: “Atani̱ má dí egájnuu náa a̱jkia̱a̱nʼ, numuu rí Dios bi̱ gajkhun xtáa ga̱jma̱á nindxa̱a̱ʼ”.
3 Mbruʼun má rúʼko̱, Dios niʼthúu̱n ajngáa rígi̱ Natán:
4 “Ayuʼ ga̱jma̱a̱ aratháán rígi̱ xa̱bi̱ʼ David: ‹Rígi̱ dí naʼthí Jeobá: “Xánindxa̱a̱ʼ ikháán bi̱ maʼni guʼwá náa maxtáá.
5 Asndu má nákha mbiʼi dí nigúwíin náa Egipto xa̱bu̱ Israel asndu dí mbiʼi xúgi̱, ikhúún na̱nguá nixtáá náa nimbá guʼwá, nijngruigo̱ʼ gi̱i̱ ñuʼún náa mbá guʼwá xtíin ga̱jma̱a̱ ni̱jkhá rajnguʼúnʼ má xúʼko̱.*
6 Náa mbá xúgíʼ mbiʼi rí nijngruigo̱ʼ gajmíʼ israelitas, lá mbá miʼtsú ni̱thu̱u̱n ajngáa rígi̱ tikhuun bi̱ nunimbaníí xkujndu ndrígu̱ún xa̱bu̱ Israel, bi̱ nigruígi̱i̱n mu muñewa̱a̱n xuajñunʼ Israel ráʼ. Lá nirajxu̱u̱n mbá miʼtsú, ‹ndíjkha rí na̱nguá ni̱nila goʼwóʼ ga̱jma̱a̱ ixi̱ cedro rá.›”›
7 Dí xúgi̱, aratháán xa̱bi̱ʼ David: ‹Rígi̱ dí naʼthí Jeobá bi̱ naʼtáñajúúnʼ ángeles: “Ikhúún niríña̱a̱nʼ náa mbaaʼ dí rígá ra̱jxa̱, náa nitiewu̱u̱n mugia̱a̱ʼ, mu xúʼko̱ mi̱dxu̱ʼnú mbi̱ya̱ edxu̱u̱ náa xuajñunʼ Israel.
8 Maxtáá ga̱jma̱á nindxa̱a̱ʼ asndu náá má gídxúʼ. Ma̱ni̱ gámbíin xa̱bu̱ sia̱nʼ ndrígáaʼ náa inaaʼ ga̱jma̱a̱ ma̱ni̱ mba̱a̱ mbiʼyaaʼ. Xó má xa̱bu̱ bi̱ guáʼdáá numún náa tsu̱du̱u̱ ku̱ba̱ʼ.
9 Maraʼwi̱i̱ mbá mbaaʼ náa maxtáa xuajñunʼ Israel. Ikhí gáʼgá kagui̱i̱n ga̱jma̱a̱ makuwá rí asndu nimbá miʼtsú nimbáa ni xáʼni xkájkiu̱ún. Xa̱bu̱ xkawi̱i̱nʼ xátangi̱ín muni̱ ngíníi xó má nákha ginii.
10 Asndu má nákha mbiʼi rí nigruígi̱i̱n bi̱ munimbaníí xkujndu ndrígu̱ún xa̱bu̱ xuajñunʼ Israel. Ga̱jma̱a̱ ma̱ni̱ gámbíin xúgíinʼ xa̱bu̱ sia̱nʼ. Ma̱ngaa natha̱a̱nʼ: ‹Jeobá maʼni mbá guʼwáaʼ náa maraxtaa›.
11 Índo̱ gáʼga̱nú mbiʼi rí makhañáaʼ ga̱jma̱a̱ midxu̱u̱ʼ náa nijuiʼdi̱ín wajin xiʼñáaʼ. Ma̱ni̱ rí bi̱ gáʼkha̱ náa ikháán, mbáa a̱ʼdiáaʼ ga̱jma̱a̱ ma̱ni̱ rí naʼtáñajunʼ mbajyúuʼ.
12 Ikhaa nindxu̱u̱ bi̱ maʼni mbá goʼwóʼ ga̱jma̱a̱ ikhúún ma̱ni̱ rí maʼtáñajunʼ mbajyúuʼ asndu kámuu.
13 Ikhúún mani̱ndxu̱ʼ anu̱u̱,* ikhaa mani̱ndxu̱u̱ a̱ʼdióʼ. Xárígúu rí nandoʼ ka̱yo̱o̱* xó má nirígúu dí nindoʼ ka̱yo̱o̱ bi̱ niʼtáñajunʼ nákha ikháán xóó tsératáñajunʼ.
14 Ma̱ni̱ rí goʼwóʼ ga̱jma̱a̱ rí natañájunʼ mbajyúuʼ asndu kámuu, ga̱jma̱a̱ xíliu̱u̱* dí naʼtáñajunʼ mbajyúuʼ asndu kámuu”›”.
15 Natán niʼthúu̱n xúgíʼ ajngáa rígi̱ David ga̱jma̱a̱ xúgíʼ rí niwasngájmáá.*
16 Ikhú rey David ni̱jkha̱ ga̱jma̱a̱ nigi̱ʼi̱ náa inuu Jeobá, niʼthúu̱n: “Jeobá Dios, tsáá lá nindxu̱ʼ ikhúún rá. Tsíín lá nindxu̱ún bi̱ naguwáʼ náa goʼwóʼ mu mi̱dxa̱ʼ jchúún asndu gi̱i̱ rá.
17 Dios ndrígóʼ, xóo nda̱a̱ rí kaʼníí rígi̱ tayáá ikháán, numuu rí ma̱ngaa narathúnʼ dí goʼwóo xa̱bia̱a̱ʼ mbajyúuʼ asndu kámuu, ikháán Jeobá Dios natayoʼ xóo mbáa xa̱bu̱ bi̱ mbaʼyóoʼ rí maguma mba̱a̱ itháán.
18 Ndiéjunʼ lá xóó gándoo gátháanʼ ikhúún, bi̱ nindxu̱ʼ xa̱bia̱a̱ʼ David dí ikháán má natatsiniúnʼ májánʼ rá.
19 Tátá Jeobá, ga̱jma̱a̱ numuu xa̱bia̱a̱ʼ ga̱jma̱a̱ xóo dí gíwánʼ náa a̱jkia̱a̱nʼ, nitani̱ xúgíʼ dí mba̱ʼu̱ rígi̱, xúʼko̱ nitasngájma rí nindxa̱a̱ʼ mba̱a̱.
20 Ndawa̱a̱ nimbáa xóo ikháán Jeobá ga̱jma̱a̱ ndawa̱a̱ i̱mba̱a̱ Dios xóo ikháán, xúgíʼ rí nidxáwíínxu gajkhun nindxu̱u̱.
21 Lá rígá i̱mba̱ xuajin náa tsu̱du̱u̱ ku̱ba̱ʼ xóo xuajñaanʼ Israel ráʼ. Ikháán Dios bi̱ gajkhun nidxu̱ʼ ga̱jma̱a̱ nitani̱ káwíin xa̱bu̱ xuajñaanʼ, nitani̱ majmaʼnuuʼ mbiʼyaaʼ índo̱ nitani̱ rí mba̱ʼu̱ ma̱ngaa rí mitsaanʼ* índo̱ nitaxkawíin xa̱bu̱ xuajin náa inún xa̱bu̱ xuajñaanʼ bi̱ nitani̱ káwíin náa Egipto.
22 Nitani̱ rí xuajin Israel mani̱ndxu̱u̱ xuajñaanʼ asndu kámuu. Ga̱jma̱a̱ ikháán, Tátá Jeobá ni̱dxu̱ʼnú ninindxa̱a̱ʼ Dios ndrígóo.
23 Dí xúgi̱, Tátá Jeobá, atani̱ dí mbajyúuʼ asndu kámuu dí nitaxúdaminaʼ náa xa̱bia̱a̱ʼ ga̱jma̱a̱ náa goʼwóo, ma̱ngaa atanimbáníí dí nitaxúdaminaʼ.
24 Mbiʼyaaʼ maʼni mba̱a̱ asndu kámuu, mu xúʼko̱ xa̱bu̱ muthi: ‹Jeobá bi̱ naʼtáñajúúnʼ ángeles, Dios ndrígóo Israel, Dios bi̱ nduyamajkuíí xa̱bu̱ Israel›. Ga̱jma̱a̱ dí mbáa bi̱ gáʼkha̱ náa xa̱bia̱a̱ʼ David maxtáa asndu kámuu náa inaaʼ.
25 Numuu dí ikháán Dios ndrígóʼ, nitasngájmáá xa̱bia̱a̱ʼ dí nandaaʼ matani̱ mbá guʼwá.* Ikha jngóo xa̱bia̱a̱ʼ tséʼni a̱jma̱ a̱jkiu̱u̱n maʼtákáñaaʼ xígi̱ kaʼnii.
26 Tátá Jeobá, ikháán nindxa̱a̱ʼ Dios bi̱ gajkhun ga̱jma̱a̱ nitaxúdaminaʼ dí májánʼ rígi̱ náa xa̱bia̱a̱ʼ.
27 Ikha jngóo, mbá péñu,* atani̱ tsajkurámááʼ goʼwóo xa̱bia̱a̱ʼ, ga̱jma̱a̱ dí marigá má xúʼko̱ asndu kámuu náa ikháán. Numuu rí ikháán Jeobá nitani̱ tsajkurámáánʼ ga̱jma̱a̱ matani̱ tsajkurámáánʼ má xúʼko̱ asndu kámuu”.
Mbaʼa nota
^ O “náa naʼtáñajunʼ”.
^ O “gaʼyee, bi̱ naʼthí dí marigá”.
^ O “E̱jna̱”.
^ Mbáa nandoo gáʼthúu̱n ‹índo̱ nagún rajnguʼún kuñu̱u̱n má xúʼko̱ guʼwá xtíin›.
^ O “tátée”.
^ O “trono”.
^ O “visión”.
^ O “nagui̱i̱”.
^ O “bi̱ gáguwáʼ náa ikháán mutañajunʼ”.
^ O “atani̱ʼ mbá rí májánʼ”.
