Timbá libro ndrígóo Crónicas 18:1-17
18 Nda̱wa̱á, David nixmínaʼ gajmíi̱n filisteos ga̱jma̱a̱ niʼngo̱o̱ niʼni gajmíi̱n. Nirígú káʼñúúnʼ Gat ga̱jma̱a̱ xuajin dí rígá mijngii.
2 Ma̱ngaa niʼngo̱o̱ niʼni ga̱jma̱a̱ Moab, ikhú moabitas niguánú ninindxu̱ún xa̱bi̱i̱ David ga̱jma̱a̱ nini̱ numáá.
3 David niʼngo̱o̱ niʼni ga̱jma̱a̱ rey Hadadézer bi̱ na̱ʼkha̱ náa Zobá náa mijngii Hamat, índo̱ ikhaa xtáa ra̱jkha̱ náa mañu Éufrates mu maʼtáñajunʼ.
4 David nigrui̱gú káyúuʼ mbá 1,000 carro, 7,000 bi̱ nudrúwíin wáyú ga̱jma̱a̱ mbá 20,000 soldado bi̱ nagún ga̱jma̱a̱ rajkúún. Nda̱wa̱á niniñúúnʼ gúʼxíinʼ xúgíinʼ wáyú bi̱ nagún kudúún carros, mú káaʼ 100 bi̱ nda̱a̱ dí niʼniún.
5 Índo̱ Sirios bi̱ kúwá náa Damasco niguwáʼ gúmbayíí rey Hadadézer bi̱ na̱ʼkha̱ náa Zobá, David nigudíin mbá 22,000 dí ikhiin.
6 Ikhú David niniñúúnʼ rí makuwá soldado náa Siria náa naʼtáñajuunʼ Damasco, xúʼko̱ niʼni rí xa̱bu̱ sirios niguánú ninindxu̱ún xa̱bi̱i̱ ga̱jma̱a̱ nini̱ numáá. Jeobá naʼni rí maʼngo̱o̱* David asndu náá má e̱jkha̱.
7 Ma̱ngaa David nigruigú káʼñúúnʼ xa̱bi̱i̱ Hadadézer escudo rí dijndi dí niguma ga̱jma̱a̱ oro rí guáʼdáá ga̱jma̱a̱ ni̱jkha̱a̱ kagu̱u̱ náa Jerusalén.
8 Ga̱jma̱a̱ David ni̱jkha̱a̱ kagu̱u̱ mbaʼa cobre dí rígá náa Tibhat ga̱jma̱a̱ náa Cun, xuajin náa naʼtáñajunʼ Hadadézer. Ga̱jma̱a̱ cobre rúʼko̱ Salomón niʼni Lamáa* dí cobre, rajkhúu guʼwá ma̱ngaa xúgíʼ rí najmaa dí niguma ga̱jma̱a̱ cobre.
9 Índo̱ rey Tou bi̱ na̱ʼkha̱ náa Hamat niʼdxawuun rí David niʼngo̱o̱ niʼni gajmíi̱n mbá xúgíinʼ soldado ndrígóo rey Hadadézer bi̱ na̱ʼkha̱ náa Zobá.
10 Ikhú mbá nacha̱ nikuʼmaa a̱ʼdióo Hadoram náa rey David mu marajxu̱u̱ xú káʼnii xtáa ga̱jma̱a̱ maʼthúu̱n rí májánʼ niʼni, rí niʼngo̱o̱ nixmínaʼ ga̱jma̱a̱ Hadadézer (numuu rí Hadadézer mbaʼa nuthu nixmínaʼ ga̱jma̱a̱ Tou). Hadoram ni̱jkha̱ kagu̱u̱ náa David xúgíʼ dí niguma ga̱jma̱a̱ oro, plata ga̱jma̱a̱ cobre.
11 Rey David nigujxi̱i̱ mu maxnúu Jeobá, xó má niʼni wájííʼ plata ga̱jma̱a̱ oro dí ni̱ʼkha̱a̱ kagu̱u̱ náa mbá xúgíʼ xuajin: Xóo Edom, Moab, xuajñún ammonitas, filisteos ga̱jma̱a̱ amalequitas.
12 Abisái a̱ʼdióo Zeruyá nigudíin mbá 18,000 edomitas náa mata* rí mbiʼyuu Idú.*
13 Nigruigi̱i̱n soldado náa Edom, ga̱jma̱a̱ mbá xúgíinʼ edomitas niguánú ninindxu̱ún xa̱bi̱i̱ David. Jeobá naʼni rí maʼngo̱o̱ David asndu náá má e̱jkha̱.
14 David niʼtáñajunʼ má xúʼko̱ náa xúgíʼ Israel ga̱jma̱a̱ niʼnimbánuu má xúʼko̱ numún xúgíinʼ xa̱bu̱ xó má kaʼyoo.
15 Joab a̱ʼdióo Zeruyá ikhaa naʼtáñajúúnʼ soldado, Jehosafat a̱ʼdióo Ahilud ikhaa naʼnirámáʼ dí naʼni rey.
16 Sadoc a̱ʼdióo Ahitub ga̱jma̱a̱ Ahimélec a̱ʼdióo Abiatar nindxu̱ún ndxajkun ga̱jma̱a̱ Savsá nindxu̱u̱ secretario.
17 Benaya a̱ʼdióo Jehoiadá naʼtáñajúúnʼ keretitas ga̱jma̱a̱ peletitas, ga̱jma̱a̱ e̱ji̱i̱n David niguánú ninindxu̱ún bi̱ ndiya̱ edxu̱u̱.
