Timbá libro ndrígóo Crónicas 19:1-19
19 Nda̱wa̱á, nikháñúu Nahás rey ndrígu̱ún ammonitas, ga̱jma̱a̱ a̱ʼdióo ni̱jkha̱nú ninindxu̱u̱ nuxi̱i̱ʼ rey.
2 Ikhú David niʼthí: “Maniu̱u̱ dí májánʼ* Hanún a̱ʼdióo Nahás xó má anu̱u̱* niʼniuʼ dí májánʼ ikhúún”. Ikha jngóo David nikuʼmiin xa̱bi̱i̱ mu magún gúníi a̱jkiu̱u̱n numuu dí nikháñúu anu̱u̱. Mú índo̱ xa̱bi̱i̱ David niguánú náa ku̱bu̱únʼ ammonitas mu muni̱i̱ a̱jkiu̱u̱n Hanún,
3 príncipes ndrígu̱ún ammonitas nitháán Hanún: “Lá nakuma̱a̱ʼ rí David nikuʼmiin xa̱bi̱i̱ muni̱i̱ a̱jkia̱a̱nʼ numuu rí nandoo maʼni mba̱a̱ ana̱a̱ʼ ráʼ. Lá raʼkháa nikuʼmiin xa̱bi̱i̱ maguwáʼ gúyamáánʼlú, ga̱jma̱a̱ muyejxi̱i̱ xuajñulú mu maʼni gámbáa xáʼ.”
4 Ikha jngóo Hanún niguajthun xa̱bi̱i̱ David, ni̱ʼda̱ stawúnʼ ga̱jma̱a̱ nirujtu mbá ta̱pha̱ xtíñún asndu náa tsagúúnʼ.* Ikhú nikuʼmiin magúun.
5 Rey David niʼdxuun rí niguáʼníí xa̱bu̱ bugi̱, numuu dí ra̱ʼkhá tháán niguma májti̱i̱nʼ, ikha jngóo mbá nacha̱ nikuʼmiin nguáthi̱i̱n xa̱bi̱i̱ mu magún gúraʼnúún ga̱jma̱a̱ mu muthúún: “Aguanálá má náa Jericó asndu índo̱ gáʼya̱a̱ stawanla, ikhú gáguwa̱a̱ʼ”.
6 Nda̱wa̱á, ammonitas niguánú ndiyáá rí nini̱ dí makiʼnáa* David, ikha jngóo Hanún gajmíi̱n ammonitas nixuʼma mbá 34 mil kilo* plata náa Mesopotamia,* náa Aram-Maacá ga̱jma̱a̱ náa Zobá mu mundu̱ʼu̱u̱n dí mumbañún ga̱jma̱a̱ carros, mangiin bi̱ nudrúwíin wáyú.
7 Nitiʼñáá mbá 32,000 carro, ma̱ngaa rey bi̱ xtáa náa Maacá ni̱jkha̱ gajmíi̱n xa̱bi̱i̱. Niguáʼnú ga̱jma̱a̱ nigi̱ʼi̱i̱n náa ridoo Medebá. Ammonitas nigájnún náa xuajñún ga̱jma̱a̱ nigimbúmíjná mu muxmijná.
8 Índo̱ David niʼdxuun rígi̱, nikuʼmaa Joab gajmíi̱n mbá xúgíinʼ soldado, asndu soldado bi̱ itháan xkujiinʼ.
9 Ammonitas nigún ga̱jma̱a̱ niguájun xawii mu muxmijná náa riejuun xuajin. Índo̱ reyes bi̱ niguwáʼ gíi̱nʼ wájíʼ náa xkua̱.
10 Índo̱ Joab ndiʼyoo rí soldado naguwáʼ mu maxmíjná gajmíi̱n náa inuu ga̱jma̱a̱ náa kidxuuʼ, ikhú niraʼwíin tikhuun soldado Israel bi̱ itháan xkujiinʼ ga̱jma̱a̱ niʼni rí maguajún xawii mu muxmijná gajmiún sirios.
11 Bi̱ eʼwíinʼ soldado niniñuuʼ rí maxnún ikha* ndxájuu Abisái, mu xúʼko̱ maguajún xawii muxmijná gajmiún ammonitas.
12 Ikhú niʼthúu̱n: “Á mu dí sirios itháan xkujiinʼ ki xóo ikhúún, ayi̱ gátani̱ kríñu̱u̱nʼ. Mú, á mu ammonitas itháan xkujiinʼ ki xóo ikháán, maʼgá gáni̱ kríña̱a̱nʼ.
13 Ndayóoʼ rí muguaʼdáá tsiaki̱i̱ ga̱jma̱a̱ rí xámíñulú ga̱jma̱a̱ numuu xuajñulú, ma̱ngaa ga̱jma̱a̱ numuu xuajñuu Dios ndrígulú. Jeobá má gáʼni rí májánʼ gáʼyoo”.
14 Ikhú Joab gajmíi̱n xa̱bi̱i̱ nigún mu muxmijná gajmiún sirios, ga̱jma̱a̱ sirios ningujuíin ragáñúún náa Joab.
15 Índo̱ ammonitas ndiyáá rí sirios nigáñún, ikhú mangiin ningujuíin ragáñúún náa Abisái, ga̱jma̱a̱ nitu̱ʼu̱u̱n náa xuajin. Nda̱wa̱á dí rúʼko̱ Joab nitanga̱a̱ náa Jerusalén.
16 Índo̱ sirios ndiyáá rí táʼngu̱u̱n gúni̱ gajmiún xa̱bu̱ Israel, ikhú nixuʼma ajngáa mu magimbúun sirios bi̱ kúwá náa mbájndi mbaaʼ dí rígá náa mañu Éufrates, bi̱ naʼtáñajúúnʼ nindxu̱u̱ Sofac, bi̱ kayá edxu̱u̱ náa soldado ndrígóo Hadadézer.
17 Índo̱ nijuiʼtháán David, mbá nacha̱ nigímbíin mbá xúgíinʼ soldado israelitas, nikidaa gajmíi̱n náa mañu Jordán, ga̱jma̱a̱ ni̱jkha̱nú náa kúwíin ikhiin, niwi̱ji̱ xawii maxmína̱ʼ gajmíi̱n. David niwi̱ji̱ xawii gajmíi̱n xa̱bi̱i̱ mu muxmijná gajmiún sirios, ga̱jma̱a̱ ikhú nigi̱ʼdi̱i̱ nixmijná.
18 Mú sirios nijngujuíin ragáñúún nini̱ israelitas. David nigudíin mbá 7,000 bi̱ nagún kudúún carro dí nuxmijná ga̱jma̱a̱, ma̱ngaa mbá 40,000 soldado sirios bi̱ nagún rajkúún, ga̱jma̱a̱ nixíyáa Sofac bi̱ naʼtáñajúúnʼ soldado.
19 Índo̱ xa̱bi̱i̱ Hadadézer ndiyáá dí táʼngu̱u̱n gúxmijná gajmiún israelitas, ikhú nimbánúún gajmiún David dí makuwá tsímáá ga̱jma̱a̱ niguánú ninindxu̱ún xa̱bi̱i̱. Ikhú bi̱ sirios ni táʼndún gúmbañún ammonitas.
Mbaʼa nota
^ O “tátée”.
^ O “íxtún”.
^ O “mawi̱yu̱u̱ʼ”.
^ Náa ajngáa hebreo naʼthí, “Aram-Naharaim”.
^ Náa ajngáa hebreo naʼthí, “náa ñawúunʼ”.
