Timbá libro ndrígóo Crónicas 20:1-8
20 Índo̱ nagi̱ʼdu̱u̱ tsiguʼ,* índo̱ reyes nagájnún mu muxmijná, Joab ndiyá edxu̱u̱ náa soldado bi̱ nitu̱ʼu̱u̱n náa mbañúúnʼ ammonitas, Joab ni̱jkha̱ ga̱jma̱a̱ niruguamáʼán xuajin Rabá, mú David niguanúu náa Jerusalén. Joab nito̱ʼo̱o̱ náa xuajin Rabá ga̱jma̱a̱ niʼni gámbáa.
2 David nirígú corona dí grígu náa edxu̱u̱ Malcam.* Ndiʼyoo dí ki̱wu̱n naʼni mbá 34 kilo* oro, ma̱ngaa tima itsí mitsaanʼ,* nigrigu náa edxu̱u̱ David. Ga̱jma̱a̱ ikhaa niguéjkha̱a̱ mbaʼa dí niguanáa náa xuajin.
3 Ma̱ngaa niguwíin xa̱bu̱ bi̱ kúwá náa xuajin, nixtúmiin dí murujtu itsí, majmúún ajua̱nʼ dí narujtu hierro ga̱jma̱a̱ hacha. Xígi̱ kaʼnii niʼni David gajmíi̱n mbá xúgíinʼ ammonitas. Nda̱wa̱á David gajmíi̱n mbá xúgíinʼ soldado nitangiín náa Jerusalén.
4 Nda̱wa̱á, mbu̱júu̱ nitangiín nixmijná gajmiún filisteos náa Guézer. Mbiʼi rúʼko̱ Sibecái xa̱bu̱ husatita nixíyáa Sipái mbáa bi̱ na̱ʼkha̱ náa refaím, ga̱jma̱a̱ filisteos niguánú ninindxu̱ún xa̱biu̱ún.
5 Mbu̱júu̱ má nixmijná gajmiún filisteos, Elhanán a̱ʼdióo Jaír nixíyáa Lahmí, ndxájuu Goliat xa̱bu̱ guitita, bi̱ kayá kudú* dí nindxu̱u̱ xóo xi̱gu̱ dí najmún bi̱ nuxmí.
6 Mbu̱júu̱ má nixmijná. Nixmijná náa Gat náa xtáa mbáa xa̱bu̱ bi̱ ra̱ʼkhá tháán mba̱yi̱i̱ʼ, bi̱ majun e̱ji̱i̱n ñawúunʼ ga̱jma̱a̱ majun e̱ji̱i̱n rajkhúu, mbá 24 dí mbá xúgíʼ. Xa̱bu̱ bigi̱ ma̱ngaa na̱ʼkha̱ náa refaím.
7 Numuu dí tséniñuuʼ ratsíjmiin xa̱bu̱ Israel, ikha jngóo Jonatán a̱ʼdióo Simeá ndxájuu David nixíyáa.
8 Bigi̱ nindxu̱ún bi̱ naguwáʼ náa refaím bi̱ kúwá náa Gat, nikháñún náa ñawúunʼ David gajmíi̱n xa̱bi̱i̱.
Mbaʼa nota
^ Xóo muʼthá, primavera mbáa rígi̱ nindxu̱u̱ gu̱nʼ marzo ga̱jma̱a̱ abril.
^ O “nagui̱i̱”.
^ O “lanza”.
