Timbá libro ndrígóo Crónicas 21:1-30
21 Ikhú Gixa̱a̱* ndiyáʼ xóo maʼni ngíníi xa̱bu̱ Israel ga̱jma̱a̱ nixkajxi̱i̱ a̱jkiu̱u̱n David dí maʼni mbá censo náa Israel.
2 Ikha jngóo David niʼthúu̱n Joab ga̱jma̱a̱ bi̱ kuya̱ edxu̱u̱ náa xuajin: “Aʼguala gúraxniin israelitas, gugíʼdi̱i̱ náa Beer-Seba asndu náa Dan, nda̱wa̱á gutu̱nʼla mu mba̱yo̱o̱ nguáthi̱i̱n xa̱bu̱ kúwá”.
3 Mú Joab niʼthúu̱n: “¡Jeobá gáʼni dí xa̱bu̱ xuajin maʼni mbá 100 nuthu itháan mbaʼin! Tátioʼ rey, lá raʼkháa xúgíinʼ má buʼko̱ nindxu̱ún xa̱bi̱i̱ tátioʼ ráʼ. Náá numuu dí tátioʼ nandoo maʼni rígi̱ rá. Náá numuu gáʼni dí israelitas matangi̱ín makiéʼkhún mbu̱júu̱ rá.”
4 Mú dí niʼthí rey niʼngo̱o̱ itháan ki xóo dí niʼthí Joab. Ikha jngóo Joab nigájnuu ni̱jkha̱ náa xúgíʼ Israel, nda̱wa̱á nitanga̱a̱ náa Jerusalén.
5 Ikhú Joab nixnúu David náa nigumarámáʼ mbiʼñún. Náa xúgíʼ Israel kúwíin 1 millón 100 mil xa̱bekha bi̱ kuda espada, ga̱jma̱a̱ náa Judá kúwá mbá 470,000 xa̱bekha bi̱ kuda espada.
6 Mú bi̱ naguwáʼ náa xuajin chíʼgíiʼ* ndrígóo Leví ga̱jma̱a̱ náa Benjamín na̱nguá nigumarámáʼ mbiʼñún, numuu dí Joab ndiʼyoo dí raʼkhí nindxu̱u̱ dí rey niʼthí maguma.
7 Rígi̱ tánigu̱u̱ʼ mbá kayuuʼ Dios bi̱ gajkhun, ikha jngóo nikuʼma dí mumíniiʼ xa̱bu̱ Israel.
8 David niʼthúu̱n Dios bi̱ gajkhun: “Nikiéʼkhúnʼ dí xígi̱ kaʼnii ni̱ni̱. Dí xúgi̱, mbá péñu, atani̱ mba̱a̱ a̱jkia̱a̱nʼ dí nikiéʼkúun xa̱bia̱a̱ʼ, ni̱ni̱ xóo mbáa xa̱bu̱ skágunʼ”.
9 Ikhú Jeobá niʼthúu̱n Gad, xa̱bu̱ bi̱ ndaʼyoo rí nawasngájmáá* ga̱jma̱a̱ numuu David:
10 “Ayuʼ gáratha̱a̱n David: ‹Rígi̱ dí naʼthí Jeobá: “Rígá mbá ajtsú dí ma̱ndoo matraʼwi̱i̱. Atraʼwíí náá guaʼyaa má gáʼndaaʼ ikháán dí magumán”›”.
11 Ikha jngóo Gad ni̱jkha̱ gáʼyoo David ga̱jma̱a̱ niʼthúu̱n: “Rígi̱ dí naʼthí Jeobá: ‹Atraʼwíí:
12 Ajtsú tsiguʼ dí marigá ewiʼ, ajtsú igu̱nʼ dí majngruiga̱a̱ʼ ratagáyaaʼ gúni̱ xa̱bu̱ sia̱nʼ, o ajtsú mbiʼi dí matamíniiʼ gáʼni espádóo Jeobá, xóo muʼthá, mbá nandii náa xúgíʼ xuajin, dí ángel ndrígióo Jeobá maʼni gámbáa náa xúgíʼ mbayuuʼ Israel›. Atatsaʼwáminaʼ májánʼ ga̱jma̱a̱ arathúnʼ ndiéjunʼ gáthúu̱n bi̱ nikuʼmún ma̱ʼkhá”.
13 David niriʼñuu Gad: “Gakhi̱i̱ rígi̱ e̱yo̱o̱ ikhúún. Itháan má nandoʼ dí mamínuuʼ náa ñawúunʼ Jeobá, numuu dí nagáwíinʼ a̱jkiu̱u̱n. Mú tsíyóʼ dí mamínuuʼ náa ñawúunʼ mbáa xa̱bu̱ú”.
14 Ikhú Jeobá nikuʼma mbá nandii náa Israel, ga̱jma̱a̱ nikháñún mbá 70,000 israelitas.
15 Ma̱ngaa Dios bi̱ gajkhun nikuʼmaa mbáa ángel náa Jerusalén mu maʼni gámbáa. Mú índo̱ ikhaa inu maʼni, Jeobá ndiʼyoo ga̱jma̱a̱ nigáwíinʼ a̱jkiu̱u̱n dí nikuʼma gamiéjunʼ rúʼko̱, ikhú niʼthúu̱n ángel bi̱ xtáa raʼni gámbóo xuajin: “¡Ikhí rá! Ataxruígúu ñawáanʼ”. Ángel ndrígióo Jeobá wíji̱ náa mijngii mbayuuʼ Ornán xa̱bu̱ jebuseo.
16 Índo̱ David nikujxi̱i̱ edxu̱u̱, ndiʼyoo mbáa ángel ndrígióo Jeobá náa majñuuʼ ku̱ba̱ʼ ga̱jma̱a̱ mekhu, kayá mbá espada náa ñawúunʼ naʼni jmbuu náa Jerusalén. David gajmíi̱n bi̱ kuya̱ edxu̱u̱ kugíʼ xtíin mi̱du̱,* ikhú ikhiin mbá nacha̱ niguáʼnduti̱ga̱ mbayííʼ.
17 David niʼthúu̱n Dios bi̱ gajkhun: “Lá raʼkháa ikhúún nikuʼmá dí magixniin xa̱bu̱ ráʼ. Ikhúún nikuʼdáminaʼ aʼkhá, ikhúún nikiéʼkhúnʼ, dí lá nini̱ mugu̱ bigi̱ rá. Tátá, Jeobá Dios ndrígóʼ, mbá péñu, atani̱ dí ñawáanʼ maʼni mamínuuʼ ikhúún ga̱jma̱a̱ bi̱ kúwá náa goʼwóo anu̱ʼ,* mú xádxáʼ jcháaʼ gamiéjunʼ rígi̱ dí maʼni mumíniiʼ xa̱bu̱ xuajñaanʼ”.
18 Ikhú ángel ndrígióo Jeobá nikuʼmaa Gad mu maʼthúu̱n David rí matsimuu ga̱jma̱a̱ maʼni mbá náa mikarámáʼ tsigijñaʼ náa inuu Jeobá, náa mbayuuʼ Ornán xa̱bu̱ jebuseo.
19 Ikhú David nitsimuu xó má Gad niʼthúu̱n, bi̱ niʼthúu̱n ga̱jma̱a̱ numuu mbiʼyuu Jeobá.
20 Ikhú Ornán nitangayii ga̱jma̱a̱ ndiʼyoo ángel, índo̱ a̱jkhui̱i̱n e̱ji̱i̱n bi̱ xtáa gajmíi̱n ndiyáá ángel nirkaʼwumijná. Ornán xtáa rarujtsi trigo.
21 Índo̱ David nitsimuu náa xtáa, Ornán ndiʼyoo, ikhú mbá nacha̱ nigájnuu náa mbayuuʼ ga̱jma̱a̱ nigiʼnduti̱ga̱* asndu mbayííʼ náa inuu David.
22 Ikhú David niʼthúu̱n Ornán: “Atago̱jo̱ʼ* mbaaʼ náa dí natiejunʼ mu xúʼko̱ ma̱ni̱ ikhí mbá náa mikarámáʼ tsigijñaʼ náa inuu Jeobá. Atago̱jo̱ʼ xó má nguáthá numuu, mu xúʼko̱ mawi̱ji̱i̱ dí naʼni numíniiʼ xa̱bu̱ xuajin”.
23 Mú Ornán niʼthúu̱n David: “Aguanáaʼ má ga̱jma̱a̱. Tátioʼ rey gáʼni dí ikhaa má gáʼndoo.* Gi̱i̱ kúwá xedi̱ mu maraxnajxíin xóo tsigijñaʼ dí nakarámáʼ ga̱jma̱a̱ xajpha náa najui̱ʼnu̱ tsígáʼ mu mi̱kha, ma̱ngaa trigo mu maraxnaxí xóo tsigijñaʼ rí tsígáʼ. Maxna̱a̱ʼ má xúgíʼ”.
24 Mú rey David niʼthúu̱n Ornán: “Na̱nguá, ikhúún ma̱tsi̱ xó má nguáthá numuu. Xáguanúʼ ga̱jma̱a̱ dí ndrígáaʼ ikháán mu maxnu̱u̱ Jeobá, ni má xáxnajxí tsigijñaʼ dí nakarámáʼ dí na̱nguá ni̱tsi̱”.
25 Ikha jngóo David nixnúu Ornán mbá 600 siclos* oro ga̱jma̱a̱ numuu mbaaʼ.
26 Ikhú David niʼni mbá náa mikarámáʼ tsigijñaʼ náa inuu Jeobá. Ma̱ngaa nixnájxi̱ tsigijñaʼ dí nakarámáʼ ga̱jma̱a̱ tsigijñaʼ dí tsímáá.* Niʼtákáñuu Jeobá, ga̱jma̱a̱ ikhaa niriʼñuu índo̱ nikuʼma aguʼ asndu mekhuíí náa nuxnajxi̱ tsigijñaʼ dí nakarámáʼ.
27 Ikhú Jeobá niʼtáñajuunʼ ángel dí makumáaʼ espádóo náa xtóo.
28 Índo̱ David ndiʼyoo dí Jeobá niriʼñuu náa mbayuuʼ Ornán xa̱bu̱ jebuseo, ikha jngóo nixnájxi̱ má xúʼko̱ tsigijñaʼ ikhí.
29 Mú guʼwá xtíin ndrígióo Jeobá dí Moisés niʼni náa ku̱ba̱ʼ mijxooʼ,* ga̱jma̱a̱ náa nuxnajxi̱ tsigijñaʼ dí nakarámáʼ nákha ikhú nirígá náa rí mitsídánʼ náa Gabaón.
30 Mú David táʼngo̱o̱ gáʼga asndu ñuʼún mu marajxu̱u̱ Dios, numuu dí ra̱ʼkhá tháán nimíñuu niʼni espada dí kayá ángel ndrígióo Jeobá.
Mbaʼa nota
^ O “tribu”.
^ O “visión”.
^ O “táteʼ”.
^ O “nixngutigamínáʼ”.
^ Náa ajngáa hebreo naʼthí, “araxnúʼ”.
^ Náa ajngáa hebreo naʼthí, “dí májánʼ má gáʼyoo iduu”.
^ O “desierto”.
