Timbá libro ndrígóo Crónicas 22:1-19
22 Ikhú David niʼthí: “Gi̱i̱ gárígá goʼwóo Jeobá, Dios bi̱ gajkhun, ga̱jma̱a̱ gi̱i̱ gárígá mbá náa xa̱bu̱ Israel muxnajxi̱ tsigijñaʼ dí nakarámáʼ”.
2 Nda̱wa̱á David nikuʼma dí magimbíin xa̱bu̱ bi̱ naguwaáʼ bi̱ kúwá náa ku̱ba̱ʼ Israel, ga̱jma̱a̱ nikuʼmiin dí muxui̱ʼta̱ ga̱jma̱a̱ murujtu itsí ma̱ngaa dí muni̱ májáanʼ mu majmaa náa maguma goʼwóo Dios bi̱ gajkhun.
3 David niniñuuʼ xawii mbaʼa ajua̱nʼ dí nindxu̱u̱ hierro mu maguma ga̱jma̱a̱ clavos dí majmaa náa xkrugua, xó má grapas, niniñuuʼ mbaʼa ajua̱nʼ dí nindxu̱u̱ cobre rí asndu tséʼngo̱o̱ mixtagiéwan,
4 ma̱ngaa niniñuuʼ mbaʼa ixi̱ cedro, numuu dí xa̱bu̱ Sidón ga̱jma̱a̱ Tiro ra̱ʼkhá tháán mbaʼa ixi̱ cedro niguwáʼ kudúún náa David.
5 David niʼthí: “A̱ʼdióʼ Salomón kaʼníí dxámá nindxu̱u̱, xóó nda̱a̱ dí ejmañuu,* goʼwóo Jeobá dí maguma mbaʼyóoʼ mani̱ndxu̱u̱ mba̱a̱, mu xúʼko̱ xúgíinʼ xa̱bu̱ xuajin maguánú mbuyáá dí nindxu̱u̱ kiejuunʼ ga̱jma̱a̱ mitsaanʼ.* Ikha jngóo maniʼñúuʼ dí majmuu”. David niniñuuʼ xawii mbaʼa dí majmaa nákha xóó tsékháñuu.
6 Ikhú nindxaʼóo Salomón bi̱ nindxu̱u̱ a̱ʼdióo, nirajkuáa ñawúunʼ dí maʼni goʼwóo Jeobá, Dios ndrígóo Israel.
7 David niʼthúu̱n a̱ʼdióo Salomón: “Nigájnuu náa a̱jkiu̱nʼ dí ma̱ni̱ mbá guʼwá náa marigá mbiʼyuu Jeobá Dios ndrígóʼ.
8 Mú nigruígú ajngóo Jeobá rígi̱: ‹Ikháán ra̱ʼkhá tháán mbaji̱ʼ eʼdi nitaxídíí ga̱jma̱a̱ nitaxmína̱ʼ. Xátani̱ mbá guʼwá náa marigá mbiʼyuʼ, numuu dí nitaxídíí eʼdi náa tsu̱du̱u̱ ku̱ba̱ʼ náa inuʼ.
9 ¡Natayáá ráʼ! maraʼdaa mbáa ada̱ bi̱ maxtáa tsímáá,* ma̱ni̱ dí mbayáa jxu̱u̱ʼ náa mbá xúgíinʼ xa̱bu̱ sia̱nʼ ndrígio̱o̱ bi̱ kúwá mbájndi náa ikhaa, numuu dí magumbiʼyuu Salomón,* náa xúgíʼ mbiʼi dí ikhaa gáxtáa ma̱ni̱ dí xa̱bu̱ Israel makuwá tsímáá ga̱jma̱a̱ xárígá gamíi.
10 Ikhaa nindxu̱u̱ bi̱ maʼni mbá guʼwá náa marigá mbiʼyuʼ. Ikhaa mani̱ndxu̱u̱ a̱ʼdióʼ ga̱jma̱a̱ ikhúún mani̱ndxu̱ʼ anu̱u̱.* Ma̱ni̱ rí maʼtáñajunʼ náa Israel mbajyúuʼ asndu kámuu›.
11 Dí xúgi̱ rá a̱ʼdióʼ, Jeobá gáxtáa ga̱jma̱á nindxa̱a̱ʼ ga̱jma̱a̱ xúgíʼ dí gátani̱ magajnúu májánʼ, maʼnga̱a̱ʼ matani̱ goʼwóo Jeobá Dios ndrígáaʼ, xó má ikhaa niʼthí ga̱jma̱a̱ numaaʼ.
12 Mú dí itháan gíʼdoo numuu dí Jeobá gáʼni dí makrua̱ʼa̱a̱ʼ ga̱jma̱a̱ majmañaaʼ índo̱ gáxnáaʼ dí maratañájunʼ náa Israel, mu xúʼko̱ matanimba̱a̱ʼ xtángoo ndrígóo Jeobá Dios ndrígáaʼ.
13 Á mu dí natanimba̱a̱ʼ tsumáá xtángoo ga̱jma̱a̱ dí na̱nda̱ʼa̱ maguma, dí Moisés nixnún xa̱bu̱ Israel xó má niʼtáñajuunʼ Jeobá, maraxtaa májánʼ. Gakhi̱i̱ a̱jkia̱a̱nʼ gátani̱ ga̱jma̱a̱ xámíñáaʼ. Xámíñáaʼ ni má xáguáʼáánʼ.
14 Ni̱ni̱ mbá tsiaki̱i̱ mba̱a̱ mu maniʼñúuʼ xawii dí majmaa náa goʼwóo Jeobá, niniʼñúuʼ mbá 3 millón 420 mil kilo* oro ga̱jma̱a̱ mbá 34 millón 200 mil kilo* plata, ma̱ngaa niniʼñúuʼ mbaʼa ajua̱nʼ dí nindxu̱u̱ cobre ga̱jma̱a̱ hierro dí asndu tséʼngo̱o̱ gíxtagiewan, ma̱ngaa ixi̱ ga̱jma̱a̱ itsí, mú ikháán má gátaʼyáʼ xóó itháan.
15 Xtaʼdiin mbaʼin bi̱ nuñejunʼ: Bi̱ nuxui̱ʼta̱ itsí, bi̱ nuni̱ guʼwá, bi̱ nutáá ixi̱, xtaʼdiin xa̱bu̱ bi̱ najmañún xúgíʼ enii ñajunʼ.
16 Rígá mba̱a̱ oro, plata, ajua̱nʼ dí nindxu̱u̱ cobre ga̱jma̱a̱ hierro. Atagíʼdi̱i̱ matiejunʼ, Jeobá má gáxtáa ga̱jma̱á nindxa̱a̱ʼ”.
17 Ikhú David niʼtáñajúúnʼ mbá xúgíinʼ príncipes bi̱ kúwá náa Israel mu mumbayíí a̱ʼdióo Salomón. Niʼthún:
18 “Lá na̱nguá xtáa ga̱jma̱á nindxa̱la Jeobá Dios ndrígala, lá raʼkháa ikhaa niniñuuʼ dí makuwáanʼla tsímáá* náa tsu̱du̱u̱ ku̱ba̱ʼ xáʼ. Ikhaa nixnájxi̱i̱n xa̱bu̱ xuajin náa ikhúún, Jeobá gajmíi̱n xa̱bu̱ xuajñuu nitu̱ʼu̱u̱n náa ku̱bu̱únʼ xa̱bu̱ buʼko̱.
19 Dí xúgi̱ rá, guʼyáaʼ Jeobá Dios ndrígala ga̱jma̱a̱ xúgíʼ a̱jkia̱la ga̱jma̱a̱ xúgíʼ xóo nindxa̱la,* ma̱ngaa gu̱ni̱ mbá guʼwá náa mbiʼyamajkuíí Jeobá, Dios bi̱ gajkhun, mu xúʼko̱ maʼga̱a̱ ikhí arca* dí nimbánuu ndrígóo Jeobá, ga̱jma̱a̱ xúgíʼ dí kaʼwu dí najmaa náa Dios bi̱ gajkhun maʼga̱a̱ náa guʼwá náa marigá mbiʼyuu Jeobá”.
Mbaʼa nota
^ O “wabaaʼ”.
^ O “nagui̱i̱”.
^ Náa ajngáa hebreo naʼthí, “mbayáa jxu̱u̱ʼ”.
^ Na̱ʼkha̱ náa ajngáa hebreo dí nandoo gáʼthúu̱n ‹tsímáá›.
^ O “tátée”.
^ Náa ajngáa hebreo naʼthí, “1,000,000 talentos”.
^ Náa ajngáa hebreo naʼthí, “mbu̱ya̱a̱ jxala”.
^ O “e̱jna̱”.
