Timbá libro ndrígóo Crónicas 23:1-32
23 Índo̱ David nikhi̱i̱ má ga̱jma̱a̱ inu makhañúu, nigíiʼ a̱ʼdióo Salomón mani̱ndxu̱u̱ rey náa Israel.
2 Ikhú nigímbíin mbá xúgíinʼ príncipes bi̱ kúwá náa Israel, ndxajkun ga̱jma̱a̱ levitas.
3 Nigixniin mbá xúgíinʼ levitas bi̱ guáʼdáá itháan dí 30 tsiguúnʼ, dí mbá xúgíinʼ ninindxu̱ún 38,000 xa̱bekha.
4 Náa mbá xúgíinʼ bugi̱, mbá 24,000 bi̱ nduyáá xóo ejkha̱ ñajunʼ náa goʼwóo Jeobá, mbá 6,000 bi̱ guáʼdáá mbá ñajunʼ ga̱jma̱a̱ bi̱ nunimbaníí xkujndu.
5 Mbá 4,000 bi̱ nuñewa̱a̱n xkrugua ga̱jma̱a̱ i̱mbá 4,000 bi̱ nuni̱ mba̱a̱ Jeobá ga̱jma̱a̱ ajmúú náa rí David niʼthí: “Ni̱ni̱ mu ma̱ni̱ ga̱jma̱a̱ ajmúú”.
6 Ikhú David niʼni wájíinʼ xó má mbiʼñún e̱ji̱i̱n Leví: Guersón, Cohat ga̱jma̱a̱ Merarí.
7 Náa guersonita xtáa Ladán ga̱jma̱a̱ Simeí.
8 Ladán nigiʼdiin mbá ajtsíin e̱ji̱i̱n, Jehiel bi̱ kayá edxu̱u̱, Zetam ga̱jma̱a̱ Joel.
9 Simeí nigiʼdiin ajtsíin e̱ji̱i̱n: Selomot, Haziel ga̱jma̱a̱ Harán. Bugi̱ ninindxu̱ún bi̱ ndiya̱ edxu̱u̱ náa guʼwún anu̱ún* bi̱ naguwáʼ náa Ladán.
10 Bugi̱ ninindxu̱ún e̱ji̱i̱n Simeí: Jáhat, Ziná, Jeús ga̱jma̱a̱ Berías. Mbá nájkui̱i̱n bugi̱ ninindxu̱ún e̱ji̱i̱n Simeí.
11 Jáhat ninindxu̱u̱ bi̱ kayá edxu̱u̱, ga̱jma̱a̱ Zizá nindxu̱u̱ bi̱ maʼni raga̱jmi̱i̱n. Numuu rí Jeús ga̱jma̱a̱ Berías na̱nguá niguáʼdiin mbaʼin e̱jñu̱ún. Ikha jngóo nigixniin xóo káaʼ mbóó goʼwóo anu̱ún, bi̱ kajkuáa ñawúunʼ rí mañewu̱u̱n.
12 Cohat nigiʼdiin mbá a̱jkhui̱i̱n e̱ji̱i̱n: Amram, Izhar, Hebrón ga̱jma̱a̱ Uziel.
13 E̱ji̱i̱n Amram ninindxu̱u̱ Aarón ga̱jma̱a̱ Moisés. Mú Aarón nixtaʼwíi wájíʼ kámuu mu maʼni kaʼwi̱i̱ náa rí phú Mikaʼwu ikhaa gajmíi̱n e̱ji̱i̱n, mu muxnajxi̱ tsigijñaʼ náa inuu Jeobá. Muni̱ ñajuunʼ ga̱jma̱a̱ muni̱ tsajkurámiinʼ xa̱bu̱ ga̱jma̱a̱ numuu mbiʼyuu Dios asndu kámuu.
14 Mú Moisés xa̱bi̱i̱ Dios bi̱ gajkhun, ikhaa gajmíi̱n e̱ji̱i̱n nikúwá náa xuajin chíʼgíiʼ* ndrígu̱ún levitas.
15 E̱ji̱i̱n Moisés ninindxu̱u̱ Guersom ga̱jma̱a̱ Eliezer.
16 Mbáa bi̱ a̱ʼdióo Guersom bi̱ mbiʼyuu Sebuel nindxu̱u̱ bi̱ kayá edxu̱u̱.
17 Bi̱ naguwáʼ* náa Eliezer ninindxu̱u̱ Rehabías bi̱ kayá edxu̱u̱. Eliezer na̱nguá nigiʼdiin eʼwíinʼ e̱ji̱i̱n. Mú Rehabías nigiʼdiin mbaʼin e̱ji̱i̱n.
18 Mbáa bi̱ a̱ʼdióo Izhar, bi̱ mbiʼyuu Selomit nindxu̱u̱ bi̱ kayá edxu̱u̱.
19 E̱ji̱i̱n Hebrón ninindxu̱u̱ Jerías bi̱ kayá edxu̱u̱, Amarías bi̱ maʼni raga̱jmi̱i̱n, ma̱ngaa Jahaziel bi̱ maʼni ragajtsíin, ga̱jma̱a̱ Jecameam bi̱ maʼni a̱jkhui̱i̱n.
20 E̱ji̱i̱n Uziel ninindxu̱u̱ Miqueas bi̱ kayá edxu̱u̱ ma̱ngaa Isías bi̱ maʼni raga̱jmi̱i̱n.
21 E̱ji̱i̱n Merarí ninindxu̱u̱ Mahlí ga̱jma̱a̱ Musí. Ga̱jma̱a̱ e̱ji̱i̱n Mahlí ninindxu̱u̱ Eleazar ma̱ngaa Quis.
22 Eleazar tágiʼdiin e̱ji̱i̱n jiámá índo̱ nikháñuu, i̱ndó wa̱ʼxa̱ʼ,* ikha jngóo e̱ji̱i̱n Quis, bi̱ kuñún* nidiin waʼxiinʼ.
23 E̱ji̱i̱n Musí ninindxu̱ún Mahlí, Éder ga̱jma̱a̱ Jeremot.
24 Bugi̱ ninindxu̱ún e̱ji̱i̱n Leví bi̱ nigumarámáʼ mbiʼñún xó má nguáthi̱i̱n kúwá náa guʼwún anu̱ún, bi̱ kuya̱ edxu̱u̱ náa guʼwún anu̱ún. Nigixniin ga̱jma̱a̱ nigumarámáʼ xó má mbiʼñún, nuni̱ ñajunʼ náa goʼwóo Jeobá asndu nákha guáʼdáá 20 tsiguúnʼ.
25 Numuu dí David niʼthí: “Jeobá, Dios ndrígóo Israel, niʼni dí xuajñuu mbayáa jxu̱u̱ʼ ga̱jma̱a̱ ikhaa maxtáa náa Jerusalén asndu kámuu.
26 Ma̱ngaa levitas xáʼyóoʼ magúun kuñu̱u̱n guʼwá xtíin ni má i̱ʼwáʼ dí najmaa mu muni̱ ñajunʼ”.
27 Niguma xó má niʼtáñajunʼ maguma David, nigixniin levitas bi̱ guáʼdáá itháan dí 20 tsiguúnʼ.
28 Ikhiin numbañún e̱ji̱i̱n Aarón náa ñajunʼ dí naguma náa goʼwóo Jeobá ga̱jma̱a̱ náa rexo̱o̱, náa nuphiʼtsu ga̱jma̱a̱ náa naguma kaʼwi̱i̱ xúgíʼ enii dí kaʼwu, ga̱jma̱a̱ náa i̱ʼwáʼ ñajunʼ dí naguma náa goʼwóo Dios bi̱ gajkhun.
29 Numbayíí nuni̱ pan dí karngujxi̱,* harina dí nuxnajxi̱ xóo tsigijñaʼ rí tsígáʼ, galleta mbawiʼ dí ragíʼdoo levadura, pan dí nigu̱ʼ náa e̱jui̱i̱, xúwáʼ dí kanda̱wa̱ʼ, nugiewan xúgíʼ rígi̱ nguáthá rígá ga̱jma̱a̱ nguáthá mba̱ʼu̱.
30 Mámbá miʼcha̱ ga̱jma̱a̱ mámbá wakíʼ, mbaʼyóoʼ dí muxnajxi̱mi̱jna̱ mu muxnáa núma̱aʼ ga̱jma̱a̱ muni̱ mba̱a̱ Jeobá.
31 Numbañún má xúʼko̱ índo̱ nuxnajxi̱ tsigijñaʼ gamajkhu dí nakarámáʼ náa Jeobá dí mbiʼi sábado, índo̱ nagi̱ʼi̱ gu̱nʼ rudiiʼ ga̱jma̱a̱ mbiʼi dí naguma ndxa̱a̱, xó má eʼthí náa xtángoo, nuni̱ má xúʼko̱ rígi̱ náa inuu Jeobá.
32 Ma̱ngaa nunimbaníí ñajunʼ dí kajkuáa ñawúúnʼ dí naguma náa guʼwá xtíin dí nagimbíi̱n, ma̱ngaa náa dí mikaʼwu, nuñajunʼ gajmiún a̱ngiu̱ún bi̱ nindxu̱ún e̱ji̱i̱n Aarón náa ñajunʼ dí naguma náa goʼwóo Jeobá.
Mbaʼa nota
^ O “tátiu̱ún”.
^ O “tribu”.
^ Náa ajngáa hebreo naʼthí, “e̱ji̱i̱n”.
^ O “i̱jín go̱ʼo̱”.
^ Náa ajngáa hebreo naʼthí, “a̱ngiu̱ún”.
^ Xóo muʼthá, pan dí najuixnájxi̱.
