Timbá libro ndrígóo Crónicas 24:1-31
24 Bi̱ naguwáʼ náa Aarón nirui̱ʼti̱i̱n xó má kúwá. E̱ji̱i̱n Aarón ninindxu̱u̱ Nadab, Abihú, Eleazar ga̱jma̱a̱ Itamar.
2 Nadab ga̱jma̱a̱ Abihú nikháñún nákha xóó tsékháñuu anu̱ún,* ikhiin na̱nguá niguáʼdiin e̱jñu̱ún, mú Eleazar ga̱jma̱a̱ Itamar ninindxu̱ún má xúʼko̱ ndxajkun.
3 David ga̱jma̱a̱ Sadoc, nirui̱ʼti̱i̱n xó má kúwá bi̱ naguwáʼ* náa Eleazar, náa Ahimélec, ga̱jma̱a̱ náa Itamar mu xúʼko̱ muni̱ ñajunʼ.
4 Bi̱ naguwáʼ náa Eleazar ikhí kúwá itháan mbaʼin bi̱ kuya̱ edxu̱u̱ ki xóo bi̱ naguwáʼ náa Itamar, nirui̱ʼti̱i̱n xígi̱ kaʼnii: Mbá 16 bi̱ kuya̱ edxu̱u̱ náa guʼwún anu̱ún bi̱ naguwáʼ náa Eleazar ga̱jma̱a̱ mbá 8 bi̱ kuya̱ edxu̱u̱ náa guʼwún anu̱ún bi̱ naguwáʼ náa Itamar.
5 Ma̱ngaa nirui̱ʼti̱i̱n xó má nigájnuu náa suerte,* mbá grupo niwa̱a̱ ga̱jma̱a̱ i̱mba̱ grupo, numuu dí kúwá bi̱ kuya̱ edxu̱u̱ náa rí kaʼwu, ga̱jma̱a̱ bi̱ kuya̱ edxu̱u̱ náa ñajunʼ dí naguma náa Dios bi̱ gajkhun dí nuni̱ bi̱ naguwáʼ náa Eleazar ga̱jma̱a̱ náa Itamar.
6 Ikhú Semaya a̱ʼdióo Netanel, secretáriu̱ún levitas, nigruaʼmáʼ mbiʼñún náa inuu rey, náa inún príncipes, náa inuu ndxajkun Sadoc, náa Ahimélec a̱ʼdióo Abiatar ga̱jma̱a̱ náa inún bi̱ kuya̱ edxu̱u̱ náa guʼwún anu̱ún ndxajkun ga̱jma̱a̱ levitas. Nigún rura̱ʼwi̱i̱n náa mámbá guʼwún anu̱ún: Mbá nuriya̱ʼ ga̱jma̱a̱ numuu Eleazar i̱mba̱ nuriya̱ʼ ga̱jma̱a̱ numuu Itamar.
7 Índo̱ niri̱ya̱ʼ suerte, Jehoiarib nigájnuu ginii mbiʼyuu, raga̱jmi̱i̱n Jedayá,
8 ragajtsíin Harim, ragajkui̱i̱n Seorim,
9 witsiin Malkiya, majuiin Mijamín,
10 juwiin Hacoz, migiñiiʼ Abías,
11 mijna gu̱wi̱i̱nʼ Jesúa, gu̱wi̱i̱nʼ Secanías,
12 bi̱ maʼni 11 Eliasib, bi̱ maʼni 12 Jaquim,
13 bi̱ maʼni 13 Hupá, bi̱ maʼni 14 Jesebeab,
14 bi̱ maʼni 15 Bilgá, bi̱ maʼni 16 Imer,
15 bi̱ maʼni 17 Hezir, bi̱ maʼni 18 Hapizez,
16 bi̱ maʼni 19 Petahías, bi̱ maʼni 20 Jehezquel,
17 bi̱ maʼni 21 Jakín, bi̱ maʼni 22 Gamul,
18 bi̱ maʼni 23 Delayá ga̱jma̱a̱ bi̱ maʼni 24 Maazías.
19 Rúʼko̱ nindxu̱u̱ ñajunʼ dí nini̱ náa riejuun goʼwóo Jeobá, xó má awan dí nigíʼ maguma wajin xiʼñúúnʼ Aarón, xó má Jeobá, Dios ndrígóo Israel niʼtáñajuunʼ maʼni.
20 Bugi̱ nindxu̱ún bi̱ xóó naguanún náa levitas: Bi̱ naguwáʼ náa Amram, ikhí xtáa Subael, bi̱ naguwáʼ náa Subael, ikhí xtáa Jehdeyá,
21 bi̱ naguwáʼ náa Rehabías: E̱ji̱i̱n Rehabías, ikhí xtáa Isías bi̱ kayá edxu̱u̱,
22 bi̱ naguwáʼ náa izharitas, ikhí xtáa Selomot, bi̱ naguwáʼ náa Selomot, ikhí xtáa Jáhat,
23 bi̱ naguwáʼ náa Hebrón, ikhí xtáa Jerías bi̱ kayá edxu̱u̱, bi̱ maʼni raga̱jmi̱i̱n nindxu̱u̱ Amarías, bi̱ ragajtsíin Jahaziel, bi̱ ragajkui̱i̱n Jecameam,
24 bi̱ naguwáʼ náa Uziel, ikhí xtáa Miqueas, bi̱ naguwáʼ náa Miqueas, ikhí xtáa Samir.
25 Ndxájuu Miqueas nindxu̱u̱ Isías, bi̱ naguwáʼ náa Isías ikhí xtáa Zacarías.
26 E̱ji̱i̱n Merarí nindxu̱u̱ Mahlí ga̱jma̱a̱ Musí, bi̱ naguwáʼ náa Jaazías, ikhí xtáa Beno.
27 Bi̱ naguwáʼ náa Merarí: Náa Jaazías, ikhí xtáa Beno, Soham, Zacur ga̱jma̱a̱ Ibrí,
28 bi̱ naguwáʼ náa Mahlí, ikhí xtáa Eleazar bi̱ na̱nguá nigiʼdiin e̱ji̱i̱n,
29 bi̱ naguwáʼ náa Quis: Náa e̱ji̱i̱n Quis, ikhí xtáa Jerahmeel,
30 bi̱ naguwáʼ náa Musí ninindxu̱u̱ Mahlí, Éder ga̱jma̱a̱ Jerimot.
Bugi̱ ninindxu̱ún e̱ji̱i̱n Leví xó má kúwá náa guʼwún anu̱ún.
31 Ikhiin mangiin niri̱ya̱ʼ suerte, xó má nini̱ a̱ngiu̱ún bi̱ nindxu̱ún e̱ji̱i̱n Aarón náa inuu rey David, náa Sadoc, náa Ahimélec ga̱jma̱a̱ náa inún bi̱ kuya̱ edxu̱u̱ náa guʼwún anu̱ún ndxajkun ga̱jma̱a̱ levitas. Tséʼniuu á mu guáʼdáá numún o na̱nguá, xúgíinʼ niri̱ya̱ʼ suerte.
Mbaʼa nota
^ O “tátiu̱ún”.
^ Náa ajngáa hebreo naʼthí, “e̱ji̱i̱n”. Ajngáa rígi̱ náa hebreo nandoo gáʼthúu̱n ‹a̱ʼdióo›, ‹a̱ʼdá xíñíinʼ›, o ‹bi̱ naguwáʼ náa ikhaa›.
